Gard ou lavi senp
1. Ki i vedir annan en “bon lizye”?
1 Nou bann aksyon i souvan ganny enfliyanse par sa ki nou lizye i konsantre lo la. Sa parol ki Zezi ti dir i alor byen apropriye: “Si ou lizye i bon ou lekor antye pou dan lalimyer”! (Mat. 6:22) Letan nou lizye i “bon” dan en sans spirityel i vedir i konsantre lo zis en sel bi e sa i fer lavolonte Bondye. Nou met Rwayonm Bondye premye e nou pa ganny distrer avek bann keksoz materyel ki pa tro neseser oubyen avek bann aktivite ki enterfer avek nou minister.
2. Kwa ki kapab enfliyans nou fason panse, me kwa ki pou ed nou?
2 Nou bezwen egzamin nou lekor: Sa ki nou krwar nou bezwen i kapab ganny enfliyanse par bann piblisite ki medya i dir nou nou bezwen oubyen par sa ki lezot i posede. Avan lans ou dan en proze oubyen aste en keksoz ki pou kout en kantite larzan, pran en kantite letan oubyen lenerzi, i pou bon pour “estimen konbyen i pou koute” par demann ou lekor, ‘Eski sa pou amelyor oubyen vin en baryer dan mon servis pour Zeova?’ (Lik 14:28; Fili. 1:9-11) I osi saz pour tanzantan rode ki mannyer nou kapab senplifye nou lavi pour nou kapab fer plis dan nou minister.—2 Kor. 13:5; Efe. 5:10.
3. Ki nou aprann avek en ser ki ti fer azisteman pour senplifye son lavi?
3 En ser ti deside pour li fer pionye ordiner. Dan plas rod en louvraz a mitan ki ti pou ase pour li ganny tou sa ki i ti bezwen, sa ser ti gard son louvraz a plen tan. Me apre en pe letan i ti dir: “Napa personn ki kapab lesklav pour de met. Mon ti bezwen sakrifye sa ki mon ti anvi pour mwan ganny sa ki mon ti bezwen. Mon’n realize ki bann keksoz materyel i vin vye e ou perdi lentere dan zot avek letan, e deplis mon ti pou epwize si mon ti kontinyen esey rod bann keksoz ki mon ti krwar mon ti bezwen.” Son sirkonstans ti permet li pour fer serten azisteman pour senplifye son lavi e sanz son travay. Sa in fer li posib pour li kapab kontinyen fer pionye.
4. Akoz i enportan pour nou viv en lavi senp?
4 I tre enportan pour nou viv en lavi senp akoz letan i kourt. Sak zour ki pase i anmenn nou en zour pli pros avek lafen sa move lemonn e konmansman nouvo lemonn Bondye. (1 Kor. 7:29, 31) Par port latansyon lo nou minister, nou pou sov nou lekor ek bann ki ekout nou.—1 Tim. 4:16.