Prepar Diskour piblik

TOU le semenn, laplipar kongregasyon Temwen Zeova i organiz en diskour piblik ki baze lo en size Biblik.

Si ou en ansyen oubyen en asistan ministeryel, eski ou pe montre levidans ki ou en orater piblik efikas, en ansennyan? Si wi, ou kapab ganny envite pour donn en diskour piblik. Lekol Minister Teokratik in ed plizyer dizenn milye frer kalifye pour sa privilez. Ler ou ganny dezinyen pour donn en diskour piblik, kote ki ou devret konmanse?

Etidye sa Plan

Avan ki ou fer okenn resers, lir sa plan e medit lo la ziska ki ou konpran li. Gard antet son tenm, ki tit sa diskour. Ki sa ki ou bezwen ansenny ou lodyans? Ki ou lobzektif?

Vin familye avek bann tit prensipal. Analiz sa bann pwen prensipal. Ki mannyer zot relye avek sa tenm? Anba sak pwen prensipal, plizyer pwen segonder i ganny mansyonnen. Bann lide ki siport bann pwen segonder i ganny ekrir anba sa bann pwen segonder. Egzamin konman ki sak seksyon sa plan i batir lo sa enn presedan, i entrodwir sa lot apre, e ede pour akonpli lobzektif sa diskour. Enn fwa ki ou konpran son tenm, lobzektif sa diskour, e konman bann pwen prensipal i akonpli sa bi, alor ou aprezan pare pour konmans devlop sa lenformasyon.

Okonmansman ou kapab vwar li itil pour mazin ou diskour konman kat oubyen senk pti diskour, sakenn avek en pwen prensipal. Prepar zot sakenn son tour.

Sa plan ki ganny fourni i en zouti preparasyon. Plan li menm i pa bann not ki ganny servi pour prezant sa diskour. I parey en leskelet. Ou pou bezwen met lavyann lo la, donn li en leker e donn li lavi.

Servi bann Verse

Zezi Kri ek son bann disip ti batir zot lansennyman lo Lekritir. (Lik 4:16-21; 24:27; Akt 17:2, 3) Ou osi ou kapab fer parey. Labib i devret baz pour ou diskour. Olye ki senpleman eksplik e aplik bann deklarasyon ki annan dan sa plan ki’n ganny fourni, konpran konman sa bann verse i siport sa bann deklarasyon, e apre ansenny par servi Labib.

Pandan ki ou prepar ou diskour, egzamin sak verse ki’n ganny mansyonnen dan sa plan. Not konteks sa bann verse. Serten verse i kapab senpleman fourni bann lenformasyon anplis ki itil. Pa fodre lir tou oubyen fer komanter lo la pandan ou prezantasyon. Swazir sa bann ki pli bon pour ou lodyans. Si ou konsantre lo bann verse ki’n ganny site lo sa plan, i probab ki ou pa pou bezwen servi lezot referans Biblik.

Sikse ou diskour pa depan lo lakantite verse ki ganny servi, me lo kalite lansennyman. Ler ou pe entrodwir bann verse, montre akoz ki zot pe ganny servi. Pran letan pour aplik zot. Apre ki ou’n lir en verse, kit ou Labib ouver anmezir ki ou diskit sa verse. I tre probab ki ou lodyans pou fer parey. Konman ki ou kapab atir latansyon ou lodyans e ed zot pour benefisye pli plennman avek Parol Bondye? (Nee. 8:8, 12) Ou kapab fer sa par leksplikasyon, ilistrasyon, ek laplikasyon.

Leksplikasyon. Ler ou pe prepare pour eksplik en verse kle, demann ou lekor: ‘Ki sa i vedir? Akoz mon pe servi sa verse dan mon diskour? Ki bann dimoun dan lodyans i kapab pe demann zot lekor konsernan sa verse?’ Petet ou bezwen analiz son konteks, sitiasyon zeneral ki ti egziste sa letan, sirkonstans presi sa verse, lenpresyon ki bann parol i transmet, lentansyon sa ekriven enspire. Sa i demann resers. Ou pou trouv en kantite lenformasyon valab dan bann piblikasyon ki ganny fourni par “lesklav fidel e pridan.” (Mat. 24:45-47, NW) Pa esey eksplik tou keksoz lo sa verse, me eksplike akoz ki ou’n envit ou lodyans lir sa verse an rapor avek sa pwen ki pe ganny diskite.

Ilistrasyon. Bi bann ilistrasyon se pour ed ou lodyans konpran pli oprofon en serten pwen oubyen pour ed zot rapel en pwen oubyen en prensip ki ou’n diskite. Bann ilistrasyon i ed dimoun konpran sa ki ou’n dir zot e zot asosye li avek en keksoz ki zot deza konnen. Se sa ki Zezi ti fer ler i ti donn son Sermon lo Montanny ki byen koni. “Bann zwazo ki anvole dan lezer,” “bann lis maron,” ‘en laport ki etrwat,’ en “lakaz lo ros,” ek bokou lezot lekspresyon parey, ki ti fer son lansennyman annan pwa, kler, e inoubliyab.—Mat., sapit 5–7.

Laplikasyon. Leksplikasyon ek ilistrasyon en verse pou transmet konnesans, me se laplikasyon sa konnesans ki anmenn rezilta. I vre, i responsabilite sa bann ki dan ou lodyans pour azir lo mesaz Labib, me ou kapab ed zot konpran kwa ki devret ganny fer. Enn fwa ki ou asire ki ou lodyans i konpran sa verse ki pe ganny diskite e vwar son relasyon avek sa pwen ki pe ganny diskite, pran sifizaman letan pour montre zot konman i devret fer lefe lo zot krwayans ek kondwit. Mansyonn bann benefis pour rezet bann move lide oubyen kondwit ki pa an armoni avek sa laverite ki pe ganny diskite.

Anmezir ki ou reflesir lo konman pour aplik Labib, rapel ki dimoun ki dan ou lodyans i sorti dan diferan nivo lavi e fer fas avek diferan kalite sirkonstans. I kapab annan bann nouvo ki enterese, bann zenn, bann pli aze, ek sa bann ki pe lite avek diferan kalite problenm personnel. Fer ou diskour pratik e ki adapte avek lavi bann dimoun ki dan lodyans. Evite donn konsey ki donn lenpresyon konmsi ou pe target zis en pti gin dimoun.

Desizyon sa Orater

Serten desizyon ki konsern ou diskour in deza ganny fer pour ou. Bann pwen prensipal in ganny klerman endike, ensi ki lakantite letan ki ou devret dedye lo sak pwen prensipal. I ou responsabilite pour fer okenn lezot desizyon. Ou kapab swazir pour pas plis letan lo en serten pwen segonder e mwens lo lezot. Pa panse ki ou devret diskit tou pwen segonder lo menm degre. Sa i kapab fer ou pas vitman lo bann lenformasyon e i kapab vin tro bokou pour ou lodyans. Konman ki ou kapab determinen kwa ki pour devlop plis ek kwa ki ou pour zis mansyonn an bref, oubyen an pasan? Demann ou lekor: ‘Ki pwen ki pou ed mwan pour transmet lide santral sa diskour? Lekel ki ofer pli gran potansyel pour benefisye mon lodyans? Si mon pa koz lo tel verse ki’n ganny mansyonnen ek sa pwen ki relye avek, eski sa pou afeblir mon rezonnman e lafason ki bann pwen i swiv kanmarad?’

Fer zefor pour evite enkli lenformasyon ki ou pa asire si i vre oubyen lopinyon personnel. Menm Garson Bondye, Zezi Kri, ti evite koz dapre ‘son prop orizinalite.’ (Zan 14:10) Rekonnet rezon akoz dimoun i vin bann renyon Temwen Zeova se pour ekout Labib ganny diskite. Si ou’n arive ganny konsidere konman en bon orater, i tre probab se akoz ou fer li en labitid pour atir latansyon, non pa lo ou menm, me lo Parol Bondye. Pour sa, ou bann diskour i ganny apresye.—Fili. 1:10, 11.

Aprezan ki ou’n transform en plan avek zis bann lide zeneral an en leksplikasyon nourisan lo Labib, ou bezwen aprezan repet ou diskour. I bon pour fer li aotvwa. Keksoz enportan se ki ou bezwen fer sir ki ou annan tou pwen byen antet. Ou devret kapab met ou leker dan ou prezantasyon, anim sa lenformasyon, e donn en prezantasyon byen vivan lo laverite. Avan ki ou donn ou diskour, demann ou lekor: ‘Ki mon pe ekspekte akonpli? Eski bann pwen prensipal i evidan? Eski mon’n vreman fer Labib vin baz mon diskour? Eski sak pwen prensipal i swiv kanmarad dan en fason natirel? Eski sa diskour i batir lapresyasyon pour Zeova e pour son bann dispozisyon? Eski son konklizyon i relye etrwatman avek sa tenm, eski i montre lodyans ki zot bezwen fer, e motiv zot pour fer li?’ Si ou kapab reponn wi pour sa bann kestyon, alor ou dan en pozisyon pour ‘fer byen avek konnesans,’ pour benefis kongregasyon e pour loner Zeova!—Prov. 15:2.

LER OU DISKOUR POU GANNY PREZANTE ATRAVER EN ENTERPRET

Souvan i annan bokou diferan langaz dan en pei, alor bann orater piblik i kapab ganny demande pour donn bann diskour lo Labib atraver bann enterpret. Si ou ganny envite pour donn en diskour avek lasistans en lot dimoun, sa bann konsey swivan pou ed ou ek ou enterpret.

Lefikasite ou diskour pou depan bokou lo travay sa enterpret. Menm si i en enterpret eksperyanse, i pou fer sa pli byen si ou ed li prepare.
Zeneralman, ou devret redwir ou diskour omwen en tyer pour permet enterpretasyon. (Kominik avek siny i en leksepsyon, vi ki i kapab ganny prezante preski anmenmtan.)
Avan ki ou donn sa diskour, revwar avek sa enterpret plan zeneral ou diskour ek son lobzektif. Si ou partisipasyon i en maniskri dan en lasanble, les sa enterpret vwar en kopi byen davans.
Diskit avek sa enterpret bann verse ki ou pou servi. Fer sir ki sa Labib dan langaz lokal i transmet menm panse avek ou Labib. Montre sa enterpret ki bann lekspresyon dan bann verse ki pou ganny met lanfaz lo la oubyen eksplike.
Deside si sa bann verse pou ganny lir dan tou le de langaz oubyen dan zis enn. Lir dan langaz ki ou lodyans i konpran i kapab sifi.
Dir bann dat, nimero ek bann sitasyon verse tro vit i kapab koz problenm. Servi bann poz apropriye, e i pli favorab pour servi bann nimero konplet (par egzanp servi 100 olye ki 105) pour statistik.
Diskit okenn ilistrasyon, langaz ek lekspresyon ki pa familye ki ou deside servi. Fer sir ki ou enterpret i konpran zot e ki i posib pour transmet bann konsep dan langaz ki lodyans i koze.
Ler ou pe koze, servi bann fraz kourt. Eksprim bann panse konplet avan ki ou arete pour sa enterpret koze. (I pou fer resorti bann panse, pa neseserman tou mo.) Pour enterpretasyon konsekitif, les sa enterpret fini avan ki ou kontinyen.
Sa enterpret i depan lo ou oter lavwa e fason ki ou prononse.