Fer resorti bann Pwen prensipal

KI BANN pwen prensipal en diskour? Zot bann lide enportan ki ganny devlope oprofon. Zot bann lide ki esansyel pour ou akonpli ou lobzektif.

En laspe enportan pour fer resorti bann pwen prensipal i ler ou swazir e prepar lenformasyon avek sazes. Fer resers pour en diskour i souvan prodwir plis lenformasyon ki kapab ganny itilize. I kapab annan osi bann landrwa dan ou diskour kot ou santi ki ou bezwen azout serten lenformasyon. Konman ou kapab determinen ki lenformasyon pour servi e, si i neseser, ki lenformasyon ki ou bezwen azoute?

Premyerman, konsider ou lodyans. Eski sa topik i preski antyerman nouvo pour zot, oubyen zot ase familye avek? Eski laplipar zot i dakor avek sa ki Labib i dir lo sa topik, oubyen serten i annan tandans pour doute? Ki kalite difikilte ki zot fer fas avek dan lavi toulezour ler zot esey aplik sa ki Labib i dir lo sa topik? Dezyenmman, fer sir ki dan ou lespri ou lobzektif pour prezant sa diskour i kler. An servan sa de fakter, evalye sa lenformasyon e gard selman sa ki vreman apropriye.

Si ou’n ganny en plan debaz avek en tenm ek bann pwen prensipal, ou devret swiv sa plan. Toutfwa, si ou gard antet sa bann fakter presedan ler pe devlop sak pwen prensipal, sa pou amelyor valer ou prezantasyon.

Ler ou pa ganny okenn plan, alor i depan lo ou pour swazir bann pwen prensipal. Kisisa bann pwen prensipal? Zot pa senpleman bann laspe enteresan ki ganny deklare an bref. Zot bann lide enportan ki ganny devlope oprofon. Zot sa bann lide ki esansyel pour ou akonpli ou lobzektif.

Plizyer Fason pour organiz ou Lenformasyon. I annan diferan metod ki kapab ganny servi pour organiz parti prensipal ou diskour. Anmezir ki ou vin familye avek sa bann metod, ou pou dekouver ki plizyer i kapab efikas, depandan lo ou lobzektif.

En metod fleksib i enplik diviz sa diskour par topik. (Sak pwen prensipal i neseser swa pour konpran ou size oubyen pour atenn ou lobzektif.) En lot metod i laranzman kronolozik. (Par egzanp, bann levennman avan Deliz, i kapab swiv par bann levennman avan ki Zerizalenm ti ganny detri an 70 N.L., ki finalman, kapab swiv par bann levennman dan nou letan.) En trwazyenm metod i lakoz ek lefe. (Sa i kapab ganny devlope dan tou le de direksyon. Par egzanp, ou kapab konmans avek en sitiasyon ki fek arive, sa lefe, e apre montre son lakoz.) En katriyenm metod i enplik bann opozisyon. (Ou fer diferans ant bon avek move oubyen pozitif avek negatif.) Parler en diskour pou enkli plis ki en metod.

Ler zot ti fer bann fo lakizasyon kont Etyenn devan Sannedren Zwif, Etyenn ti donn en diskour pwisan ki ti swiv en metod kronolozik. Ler ou lir Akt 7:2-53, obzerve ki bann pwen ti ganny swazir avek en serten lobzektif. Etyenn ti baz son rezonnman lo listwar ki son lodyans pa ti kapab demanti. I ti fer resorti legzanp Zozef ek son bann frer ensi ki Izrael dan letan Moiz. I ti apre demontre ki sa leta lespri ki bann Zwif dan bann zenerasyon presedan ti annan, ti sa menm leta lespri ki ti ganny manifeste par sa bann ki ti anmenn lanmor Zezi Kri. Alor son diskour antye ti devlop ver en konklizyon pwisan.

Pa servi tro bokou Pwen prensipal. I annan selman detrwa pwen esansyel pour devlop nenport tenm. Dan lamazorite ka, napa plis ki senk pwen. Sa i vre ki swa ou pou koz pour 5 minit, 10 minit, 30 minit oubyen plis. Pa esey fer resorti tro bokou pwen. Normalman ou lodyans i kapab anmas selman detrwa diferan lide dan en diskour. E pli sa diskour i long, pli bann pwen enportan i devret resorti klerman e avek lafors. Pour en prezantasyon kourt, de pwen prensipal i kapab sifi. Rarman ki i devret annan plis ki senk.

Nenport ki kantite pwen prensipal ki ou servi, fer sir pour devlop sak pwen sifizaman. Donn sa lodyans sifizaman letan pour egzamin sak pwen prensipal afen ki i byen antre dan zot lespri.

Ou diskour i devret donn en lenpresyon senplisite. Sa i pa toultan depan lo lakantite lenformasyon ki ganny prezante. Si ou bann pwen i klerman ganny groupe anba zis detrwa tit prensipal e ou devlop zot enn alafwa, sa diskour pou vin fasil pour swiv e difisil pour oubliye.

Fer resorti ou bann Pwen prensipal. Si ou lenformasyon i ganny byen aranze, i pa pou difisil pour ranforsi lenportans ou bann pwen prensipal par mwayen ou prezantasyon.

Fason mazer pour fer resorti en pwen prensipal se pour prezant bann laprev, bann verse Labib, ek lezot lenformasyon dan en tel fason ki sa bann keksoz i fikse latansyon lo bann pwen prensipal e elabor lo la. Tou bann pwen segonder i devret klarifye, prouve, oubyen elabor sa pwen prensipal. Pa azout bann lide ki napa nanryen pour fer avek sa topik zis akoz i enteresan. Anmezir ki ou devlop bann pwen segonder, montre klerman zot konneksyon avek sa pwen prensipal ki zot siporte. Pa les lodyans determin li menm konman bann pwen prensipal e segonder i relye avek kanmarad. Sa konneksyon i kapab ganny montre par repet detanzaot bann mo kle ki eksprim panse prensipal oubyen par repet lobzektif sa pwen prensipal.

Serten orater i fer resorti bann pwen prensipal par mansyonn zot par nimero. Menm si sa i en fason pour fer resortir bann pwen prensipal, i pa devret ranplas swazir byen e devlopman lozik sa lenformasyon li menm.

Ou kapab deside pour deklar ou pwen prensipal okonmansman avan ki ou prezant bann largiman ki siport sa pwen. Sa pou ed lodyans pour apresye valer sa ki swiv, e i pou osi aksantye sa pwen prensipal. Ou kapab ranforsi sa pwen par rezim li apre ki i’n ganny devlope plennman.

Dan Predikasyon. Sa bann prensip ki’n ganny diskite pli boner i pa zis aplik avek bann diskour formel me osi avek konversasyon ki ou fer dan predikasyon. Ler ou pe prepare, pran an konsiderasyon nenport sitiasyon mazer ki dimoun dan ou teritwar i annan dan zot lespri. Swazir en tenm ki permet loportinite pour montre konman lesperans ki Labib i ofer pou rezourd sa sitiasyon. Petet swazir de pwen prensipal pour devlop sa tenm. Deside ki verse ki ou pou servi pour siport sa bann pwen. Apre plàn konman ou pou konmans ou diskisyon. En tel preparasyon i permet sa kalite fleksibilite ki demande dan en konversasyon. I osi ed ou pour dir serten keksoz ki sa dimoun dan predikasyon pou rapel.