Fer en Plan

LER zot ganny dezinyen pour prezant en ekspoze, bokou i travay dir pour ekrir li an detay e an antye, konmans avek lentrodiksyon toudilon ziska konklizyon. Avan ki sa diskour i fini ganny prepare, i kapab ki zot bezwen reekrir li plizyer fwa. Sa prosedir i kapab pran letan.

Eski ou prepar ou bann ekspoze dan sa fason? Eski ou ti a kontan aprann en fason pli fasil? Si ou aprann konman pour prepar en plan, ou pou nepli bezwen ekrir tou keksoz. Sa pou donn ou plis letan pour egzers prezantasyon sa ekspoze. Ou bann prezantasyon pa pou zis pli fasil pour fer me i pou pli enteresan pour ekoute e i pou pli motiv ou lodyans.

Byensir, pour fer en diskour piblik dan kongregasyon, en plan debaz i ganny fourni. Sepandan, sa i pa leka pour laplipar lezot ekspoze. Ou kapab ganny zis en topik oubyen en tenm. Oubyen ou kapab ganny demande pour kouver lenformasyon spesifik dan bann piblikasyon. Parler ou kapab senpleman ganny zis detrwa lenstriksyon. Pour bann partisipasyon parey, ou bezwen prepar ou prop plan.

Sa legzanp lo paz 41 pou donn ou en lide lo konman en plan an bref i kapab ganny prepare. Remarke ki sak pwen prensipal i konmans lo kote gos e i ganny ekrir an gro let. Par anba sak pwen prensipal i annan bann lide ki siport li. Bann pwen adisyonnel ki pou ganny servi pour devlop sa bann panse i ganny mansyonnen anba zot e zot antre enpe anndan apartir kote gos. Egzamin sa plan avek bokou swen. Remarke ki sa de pwen prensipal i relye direkteman avek tenm. Osi, obzerve, ki bann pwen segonder i pa senpleman bann keksoz enteresan. Plito, sakenn i siport sa pwen prensipal anba ki zot ganny trouve.

Ler ou prepar en plan, i kapab pa egzakteman parey sa legzanp. Me si ou konpran bann prensip ki enplike, sa pou ed ou organiz ou lenformasyon e prepar en bon ekspoze dan en serten kantite letan rezonnab. Konman ki ou devret fer?

Analize, swazir, e organize

Ou bezwen en tenm. Ou tenm i pa senpleman en topik zeneral ki kapab ganny reprezante par zis en mo. Ou tenm i sa lide santral ki ou anvi transmet, e i endik laspe sa topik ki ou deside diskite. Si en tenm in ganny swazir pour ou, analiz sak mo prensipal dan sa tenm avek bokou swen. Si pour devlop en tenm ki baze lo en lartik dan en piblikasyon, etidye sa lenformasyon avek sa tenm antet. Si ou’n ganny zis en topik pour devlope, alor i pou depan lo ou pour swazir en tenm. Sepandan, avan ou fer sa, ou kapab trouv li itil pour fer enpe resers. Par gard ou lespri ouver, ou pou souvan trouv bann nouvo lide.

Anmezir ki ou pran sa bann pa, kontinyen demann ou lekor: ‘Akoz ki sa lenformasyon i enportan pour mon lodyans? Ki mon lobzektif?’ Lobzektif pa devret zis pour kouver lenformasyon oubyen pour fer en ekspoze ki ranpli avek en varyete keksoz, me se pour akonpli en serten keksoz ki pou benefisye ou lodyans. Ler ou lobzektif i byen kler, ekrir li. Kontinyen rapel ou lekor sa lobzektif anmezir ki ou prepare.

Apre ki ou’n determin ou lobzektif e ou’n swazir en tenm ki al avek (oubyen analiz konman ki sa tenm ki’n ganny swazir pour ou i adapte avek sa lobzektif), ou kapab fer bann resers ki santre zis lo sa tenm. Rod lenformasyon ki pou annan valer pratik pour ou lodyans. Pa kontant ou avek bann lenformasyon ki zeneral, me rod bann pwen spesifik ki enformatif e vreman itil. Esey ziz byen lakantite resers ki ou bezwen fer. Dan laplipar ka ou pou vitman ganny plis lenformasyon ki ou kapab servi, alor ou pou bezwen swazir.

Idantifye bann pwen prensipal ki ou bezwen diskite pour ou kapab devlop ou tenm e akonpli ou lobzektif. Sa bann pwen prensipal pou vin ou striktir, ou plan debaz. Ki kantite pwen prensipal ki sa plan i devret annan? Petet de i ase pour en pti diskisyon, e ordinerman pour en gran diskour senk i sifi. Ler ou annan pli pti gin pwen prensipal, i pli probab ki ou lodyans pou rapel zot.

Enn fwa ki ou annan ou tenm ek bann pwen prensipal antet, organiz ou lenformasyon ki ou’n trouve dan ou resers. Deside lekel ki relye etrwatman avek ou bann pwen prensipal. Swazir bann detay ki pou azout orizinalite avek ou prezantasyon. Ler ou swazir bann verse pour siport bann pwen prensipal, not bann lide ki pou ed ou rezonn lo sa bann verse dan en fason enteresan. Met sak lide anba sa pwen prensipal ki i apartenir. Si serten lenformasyon pa adapte avek okenn pwen prensipal, pa servi li—menm si i byen enteresan—oubyen met li dan ou koleksyon personnel pour servi en lot moman. Gard selman bann pli bon lenformasyon. Si ou esey kouver tro bokou, ou pou bezwen koz pli vit e ou prezantasyon pa pou oprofon. I pli meyer transmet detrwa pwen ki annan vre valer pour lodyans e pour fer li byen. Pa depas letan.

A sa staz si ou pa’n fer li pli boner, aranz ou lenformasyon dan en lord lozik. Lik ki ti ekrir Levanzil ti fer sa. Apre ki i ti’n kolekte bokou fe ki relye avek son topik, i ti met zot “byen an-ord.” (Lik 1:3) Ou kapab aranz ou lenformasyon dan lord kronolozik oubyen par topik, si posib dapre lakoz ek konsekans oubyen problenm ek solisyon, depandan lo sa ki pli efektiv pour ou atenn ou lobzektif. Ou pa devret en sel kou sorti lo en lide pour al lo en lot lide. Sa bann ki pe ekout ou i devret ganny gide fasilman lo en lide pour en lot, san okenn lespas ant bann lide ki difisil pour zwenn ansanm. Lodyans i devret ariv lo bann konklizyon lozik par bann levidans ki ou prezante. Ler ou organiz ou bann pwen, mazin ki lenpresyon ou prezantasyon pou annan lo ou lodyans. Eski zot pou fasilman swiv ou fason rezonnen? Eski zot pou ganny motive pour azir dapre sa ki zot tande, an armoni avek lobzektif ki ou annan antet?

Apre, prepar en lentrodiksyon ki pou fer ou lodyans enterese dan sa topik e ki endik zot ki sa ki ou pe al diskite i annan vre valer pour zot. Petet i bon ekrir ou bann premye fraz. Finalman, plàn en konklizyon ki pou motiv ou lodyans e ki an akor avek ou lobzektif.

Si ou prepar ou plan byen boner, ou pou annan sifizaman letan pour rafin li avan ki ou prezant sa ekspoze. Ou kapab vwar li neseser pour siport serten lide avek detrwa statistik, en ilistrasyon, oubyen avek en leksperyans. Par servi en levennman resan oubyen serten nouvel lokal i kapab ed ou lodyans pour vwar pli fasilman lenportans pour aplik sa lenformasyon. Pandan ki ou repas lo ou ekspoze, ou kapab vwar pli byen bann loportinite pour adapte sa lenformasyon avek ou lodyans. Sa prosedir analize e rafinen i esansyel pour prepar bon lenformasyon pour fer li vin en ekspoze efektiv.

Petet serten orater i bezwen pli bokou not ki lezot. Me si ou organiz ou lenformasyon anba zis detrwa pwen prensipal, retir sa bann ki pa vreman siport sa bann pwen, e met ou bann lide dan en lord lozik, ou pou dekouver ki avek en pti gin leksperyans, ou pou nepli bezwen ekrir tou. Pa sa pou sov letan! E kalite ou ekspoze pou amelyore. I pou evidan ki ou pe vreman benefisye atraver ledikasyon Lekol Minister Teokratik.