Servi en Plan

SA POSIBILITE pour servi en plan ler zot pe koze i rann bokou dimoun nerve. Zot santi zot mwen per si tou keksoz ki zot pe al dir in ganny ekrir oubyen in ganny aprann parker.

Pourtan, an realite, toulezour nou koze san konsilte en papye ki nou’n ekrir tou keksoz lo la. Nou fer li dan konversasyon avek bann fanmiy ek zanmi. Nou fer li ler nou pe partisip dan predikasyon. E nou fer li ler nou pe ofer bann lapriyer senser, swa an prive oubyen pour en group.

Ler ou prezant en diskour, eski i fer en diferans si ou servi en maniskri oubyen en plan? Kantmenm ler nou lir en papye ki’n ganny prepare i kapab ede pour fer sir ki nou dir bann keksoz ki egzakt e servi bann mo byen swazir, me i pa pou arive tous leker dimoun otan posib. Ler ou lir plis ki detrwa fraz, ou pou normalman adopte en vites e en ton lavwa ki diferan avek lafason ki ou koze dan lavi toulezour. Si ou akord plis latansyon lo ou not ki lo ou lodyans, bokou i kapab pa ekout atantivman parey zot ti pou fer si zot ti santi ki ou ti pe vreman mazin zot e pe adapte ou lenformasyon dapre zot sirkonstans. Pour ki en diskour i vreman motiv lezot, i pou pli meyer si ou koze plito ki lir ou prezantasyon.

Lekol Minister Teokratik in ganny prepare pour ed nou dan lavi toulezour. Ler nou rankontre bann zanmi, nou pa tir en papye e lir nou bann panse avek zot zis pour fer sir ki nou servi bann pli bon mo. Dan predikasyon, nou pa anmenn en papye kot tou in ganny ekrir pour lir, akoz nou per pangar nou kapab oubliy serten pwen ki nou anvi partaz avek dimoun. Ler pe fer demonstrasyon dan lekol lo konman pour rann temwannyaz dan bann tel sirkonstans, egzerse pour koz dan en fason ki pli natirel posib. Avek en bon preparasyon, ou pou dekouver ki en plan, swa antet oubyen an ekrir, i normalman sifi pour ou rapel bann panse prensipal ki ou anvi diskite. Me konman ou kapab devlop konfyans ki neseser pour fer ou ekspoze par servi en plan?

Organiz ou bann Lide. Pour kapab servi en plan ler ou pe koze, ou bezwen organiz ou bann lide. Sa i pa vedir ki ou bezwen swazir bann mo ki ou deside servi. I senpleman vedir ki ou reflesir avan ki ou koze.

Dan lavi toulezour, en dimoun ki azir vitman e san reflesir i kapab vwar li pe dir keksoz san realiz konsekans ki apre plitar i swete ki i pa ti’n dir sa. I annan lezot dimoun ki kapab rabase, sorti lo en lide pour al lo en lot. Sa de tandans i kapab ganny rezourd dan en fason efikas par pran enpe letan pour prepar en plan byen senp dan ou lespri avan konmans koze. Premyerman, fikse ou lobzektif antet, apre swazir bann pa ki ou bezwen pran pour kapab akonpli ou lobzektif, e aprezan konmans koze.

Eski ou pe prepar pour predikasyon? Pran letan pour pa zis organiz ou sak predikasyon me osi pour organiz ou bann lide. Si ou deside pour servi enn parmi bann prezantasyon ki’n ganny sizere dan Nou Minister Rwayonm, lir li plizyer fwa pour ou kapab klerman met antet bann lide prensipal. An bref, dir sa bann lide prensipal dan enn oubyen de fraz. Adapte bann mo dapre ou prop personnalite e avek sitiasyon ki egziste dan ou teritwar. Ou pou trouv li itil pour annan en plan antet. Ki ou kapab enkli dan sa plan? (1) En lentrodiksyon, ou kapab mansyonn serten keksoz ki konsern bokou dimoun dan ou kominote. Envit sa dimoun pour donn son pwenn-vi. (2) Annan antet serten keksoz spesifik ki ou ava kapab partaze lo sa size, enkli enn oubyen de verse ki montre sa ki Bondye in promet pour fer pour anmenn soulazman. Si ou ganny loportinite, aksantye ki Zeova pou fer sa par mwayen son Rwayonm, son gouvernman dan lesyel. (3) Ankouraz sa dimoun pour azir dapre sa ki zot in diskite. Ou kapab ofer bann piblikasyon oubyen en letid Labib e fer bann laranzman konkret pour kontinyen sa diskisyon.

Annan en plan antet i ava sifi pour en tel prezantasyon. Si ou anvi konsilte en plan lo papye avan ou premye vizit, sa plan pou tre probab kontyen zis detrwa mo pour ou lentrodiksyon, enn oubyen de verse Labib, ek en not bref lo sa ki ou anvi enkli dan ou konklizyon. Prepar e servi en tel plan i anpes nou rabase; i ed nou pour kit en mesaz kler e fasil pour rapel.

Si souvan ou rankontre serten kestyon oubyen lobzeksyon dan ou teritwar, ou kapab trouv li itil pour fer resers lo sa size. Souvan-d-fwa, ou bezwen selman de oubyen trwa pwen debaz avek bann verse ki apiy sa lide. “Sujets de conversation bibliques” oubyen bann soutit an gro lekritir nwar dan liv Comment raisonner à partir des Écritures i kapab fourni egzakteman sa kalite plan ki ou bezwen. Ou kapab trouv en sitasyon apropriye dan en lot sours ki ou anvi enkli. Ekrir en plan an bref, atas en fotokopi sa sitasyon avek, e gard zot ansanm avek lezot keksoz predikasyon. Ler en dimoun dan predikasyon i soulev sa kestyon oubyen lobzeksyon, les li konnen ki ou apresye sa loportinite pour donn en rezon pour sa ki ou krwar. (1 Pyer 3:15) Servi sa plan konman en baz pour ou larepons.

Ler ou pe al reprezant ou fanmiy, en group letid liv, oubyen kongregasyon dan lapriyer, i osi itil pour organiz ou bann lide. Dapre Lik 11:2-4, Zezi ti donn son bann disip en plan senp pour en lapriyer profon. Zour dedikasyon tanp an Zerizalenm, Salomon ti fer en gran lapriyer. I kler ki i ti reflesir lo sa size byen davans. I ti fikse latansyon premyerman lo Zeova ek Son promes avek David; apre lo tanp; e apre, enn alafwa, lo bann sitiasyon spesifik ek bann group dimoun. (1 Rwa. 8:22-53) Nou kapab benefisye atraver sa bann legzanp.

Gard ou Plan Diskour senp. Eski ou plan in ganny fer pour servi ler pe donn en ekspoze? Ki kantite i devret enkli?

Mazinen ki bi en plan se pour ed ou rapel bann lide. Ou kapab santi ki i pou itil pour ekrir detrwa fraz pour servi konman en lentrodiksyon. Me apre sa, konsantre lo bann lide, pa lo bann mo. Si ou ekrir sa bann lide dan laform bann fraz, i vomye servi bann fraz kourt. Sa detrwa pwen prensipal ki ou deside devlope i devret resorti byen kler dan ou plan. Sa i kapab ganny akonpli par ekrir zot an gro let, souliny bann pwen, oubyen mark zot avek en lot kouler. Anba sak pwen prensipal, ekrir bann lide ki ou anvi servi ler pe devlop sak pwen. Mansyonn bann verse ki ou deside lir. I normalman pli meyer pour lir dan Labib. Fer not konsernan bann ilistrasyon ki ou anvi servi. Ou kapab osi annan serten lenformasyon profann enportan e apropriye. Enkli dan ou not ase lenformasyon pour kapab prezant bann fe spesifik. I pou pli fasil pour servi sa plan si i annord e prop.

Serten i servi bann plan ki tre senp. En plan i kapab konpoze avek detrwa mo enportan, not referans bann verse ki sa orater pou site parker, e desen oubyen portre ki ed li rapel bann lide. Avek sa bann not senp, en orater i kapab prezant son lenformasyon dan en lord lozik e koz parey i fer toulezour. Sa i lobzektif sa leson.

Lo paz 39 ziska 42 dan sa liv, ou pou trouv sa diskisyon lo konman “Fer en Plan.” I pou tre itil pour lir sa lenformasyon pandan ki ou pe travay lo Letid “Servi en Plan.”

Konman pour servi en Plan. Sepandan, ou bi aprezan, i pa senpleman pour prepar ou ekspoze an servan en plan. Se pour servi sa plan dan en fason efikas.

Premye pa dan servi ou plan se pour prepar ou prezantasyon. Get sa tenm, lir sak pwen prensipal, e klerman vwar e konpran relasyon ki egziste ant sak sa bann pwen prensipal avek tenm. Port latansyon lo lakantite letan ki kapab ganny dedye avek sak pwen prensipal. Aprezan retourn okonmansman e etidye sa premye pwen prensipal. Reviz bann largiman, verse, ilistrasyon, ek legzanp ki ou deside servi pour devlop sa pwen. Pas lo sa lenformasyon plizyer fwa ziska ki sa seksyon ou diskour i byen kler pour ou. Fer menm parey avek sak lezot pwen prensipal. Konsider kwa ki ou kapab retire, si i neseser, pour kapab fini aler. Apre reviz sa diskour an antye. Konsantre lo bann lide, pa lo bann mo. Pa aprann sa diskour parker.

Ler ou prezant sa diskour, ou devret kapab mentenir bon kontakt vizyel avek ou lodyans. Apre ki ou’n lir en verse, ou devret normalman kapab rezonn lo la par servi ou Labib me san retournen pour get ou bann not. Pareyman, si ou servi en ilistrasyon, koz parey ou ti pou fer avek bann zanmi olye ki lir li lo ou not. Anmezir ki ou koze, pa get ou not pour sak fraz. Koz sa ki sorti dan ou leker, e ou pou tous leker sa ki pe ekout ou.

Ler ou kapab byen mannye lar koze par servi en plan, ou pou’n pran en pa annavan byen enportan pour vin en orater piblik efikas.