Ki mannyer prepar en Prezantasyon Magazin
1. Akoz i pli meyer pour prepar en prezantasyon magazin ki personnel olye esey memoriz en sizesyon ki’n ganny donnen dan Nou Minister Rwayonm?
1 Petet ou demann ou lekor, ‘Akoz nou bezwen prepar bann prezantasyon magazin vi ki zot aparet dan sak nimero Nou Minister Rwayonm?’ Menm si en kantite in vwar sa bann sizesyon prezantasyon in ede, kantmenm sa en preparasyon personel i neseser. En prezantasyon ki efikas dan en teritwar i pa forseman pratik dan en lot. Se pour sa rezon, nou pa devret santi nou oblize pour prezant magazin egzakteman mo pour mo parey i ganny sizere. Menm si nou swazir pour servi sa bann sizesyon pour prezant nou magazin, i pli meyer pour eksprim nou dan nou prop mo.
2. Kwa ki enplike ler pe determinen ki lartik ou pou konsantre lo la?
2 Swazir en Lartik: Apre ki ou’n lir ou magazin, swazir en lartik apropriye pour ou teritwar ki ou’n trouv enteresan. Ou konviksyon ek lantouzyasm ler pe prezant sa lartik i kapab pous sa met lakour pour anvi lir li osi. Kantmenm ou konsantre lo en lartik ki enteres laplipar dimoun dan ou teritwar, konn byen bann lezot lartik dan sa magazin. Sa pou ed ou aziste ou prezantasyon si ou zwenn en dimoun ki enterese avek en lot size.
3. Ki kalite lentrodiksyon ou servi pour ganny meyer rezilta?
3 Demann en Kestyon: Apre, fer en bon preparasyon lo sa ki ou pou dir an premye. Ou lentrodiksyon i enportan. Sa ki kapab ede se pour demann sa met lakour en kestyon ki fer reflesir pour stimil son lentere dan sa lartik ki ou’n swazir pour prezante. Kestyon lopinyon i souvan mars byen. Evit demann bann kestyon ki kapab met sa met lakour dan lanbara oubyen fer li santi i bezwen defann son lekor.
4. Ler sirkonstans i permet nou lir en verse Labib avek sa met lakour, ki benefis sa i anmennen?
4 Lir en Verse Labib: Finalman, swazir en verse pour lir avek sa met lakour si sirkonstans i permet, petet enn ki trouve dan sa lartik ki ou pou prezante. Ler ou lir en verse sa pou ed sa met lakour vwar ki nou mesaz i sorti dan Parol Bondye. (1 Tesa. 2:13) Sa verse pou osi donn li en temwannyaz menm si i refiz sa magazin. Serten in stimil lentere sa met lakour par lir en verse avan poz en kestyon spesifik. Ou kapab entrodwir en verse an dizan, “Mon ti a kontan ganny ou lopinyon lo sa ki sa verse Labib i dir.” Apre diriz latansyon sa dimoun lo en pwen ki relye avek sa verse dan sa magazin e fer en komanter bref pour stimil son lentere en pe plis avan propoz li sa magazin.
5. Ki bann keksoz ou bezwen gard antet ler pe prepar prezantasyon magazin?
5 Napa okenn lareg strik lo ki pour dir ler pe ofer magazin. An zeneral, i pli meyer pour gard ou prezantasyon senp e bref. Servi en lapros ki ou santi ou alez avek e ki’n anmenn ou bann bon rezilta. Konsantre lo gran valer sa bann magazin, e montre lantouzyasm. Si ou’n byen prepare, ou pou vin pli efikas pour plas bann Latour Veyer ek Awake! avek sa bann ki “dan dispozisyon neseser pour lavi eternel.”—Akt 13:48, NW.