Eski ou pe akonpli ou Minister oprofon?
1 Dan liv Akt, nou ganny dir ki bann disip Zezi ti akonpli zot minister par donn bann dimoun en ‘temwannyaz oprofon.’ (Akt 2:40, NW; 8:25; 28:23) San dout sa ti lobzektif zapot Pol. (Akt 20:24) Eski sa i ou lobzektif konman en minis sa bon nouvel? Konman ou kapab akonpli sa?
2 Prepar ou Prezantasyon: Pour garanti ki ou donn en bon temwannyaz dan minister, preparasyon i enportan. Sa i vre sirtou kan ou pe ofer magazin, lefe ki size ki ganny prezante i sanze konstaman. Pour ed nou pour pli byen ekipe, sa nimero Nou Minister Rwayonm pe entrodwir en nouvo laspe—sa parti lo kote gos, i montre en lalis ki kontyen bann legzanp konman pour prezant Latour Veyer ek Réveillez-vous! aktyel. En size apropriye ki pou atir en kantite dimoun pou ganny fer resorti dan sak nimero. Konman ou kapab devlop sa bann prezantasyon bref?
3 Swazir en sizesyon ki ou mazinen pou pli efikas dan ou teritwar. Lir sa bann lartik byen, e obzerv bann pwen spesifik ki kapab stimil lentere. Rod en teks ki’n ganny site dan sa magazin ki relye avek sa diskisyon e ki ou kapab lir avek sa dimoun. Azout en konklizyon bref pour ankouraz sa dimoun pour lir sa magazin e en leksplikasyon bref si i apropriye, ki sa dimoun i kapab fer en kontribisyon pour siport travay bann Temwen Zeova dan lemonn antye. Aprezan, egzers ou prezantasyon.
4 Plàn pour servi Labib: Si ou fer en bon preparasyon, en teks i souvannfwa kapab ganny enkli dan ou prezantasyon. Par egzanp, bann proklanmater eksperyanse dan plizyer landrwa pe ganny bon rezilta par al kot lakour bann dimoun avek Labib dan zot lanmen, apre ki zot in dir bonzour sa met lakour, zot dir:
◼ “Nou pe demann bann dimoun si zot krwar sa . . .” Lir Zenez 1:1, e apre demande: “Eski ou dakor avek sa deklarasyon?” Si sa dimoun i dakor, alor dir: “Mon osi mon dakor. Me, eski ou panse ki si Bondye in kree tou keksoz, i osi responsab pour mesanste?” Apre ki ou’n ekout larepons sa dimoun, lir Eklezyast 7:29. Ouver liv Konnesans lo paz 71, e lir paragraf 2. Ankouraz sa dimoun pour lir sa liv. Si sa dimoun pa dakor avek sa deklarasyon dan Zenez 1:1, ankouraz li pour egzamin liv Créateur.
5 Pourswiv tou Lentere: Ou pa pou kapab akonpli ou minister plennman si ou pa pourswiv lentere ki’n ganny trouve. Kan ou’n antretenir en bon diskisyon, menm si ou’n plas magazin oubyen lezot piblikasyon, not non sa dimoun ek son ladres. Avek zel esey kiltiv lentere sa dimoun par retourn vitman. E byensir, ofer en letid Labib.
6 Bann disip premye syek ti konnen ki Zezi ti’n konmann zot “pour donn en temwannyaz oprofon.” (Akt 10:42, NW ) Sa menm konmann i aplik pour nou, akoz i sa sel fason ki nou pou kapab fer disip. (Mat. 28:19, 20) Annou fer tou nou posib pour akonpli nou minister oprofon.—2 Tim. 4:5.