Ofer bann magazin ki servi konman temwen pour laverite
1. Ki rol Latour Veyer ek Awake! i zwe?
1 Latour Veyer pe anons Rwayonm Zeova ek Awake! i sa mwayen prensipal pour pres lo Rwayonm e fer disip. (Mat. 24:14; 28:19, 20) I en plezir pour nou prezant sa de magazin ki toultan aler, regilyerman ler nou partisip dan bann diferan laspe servis Rwayonm.
2. Ki sanzman ki’n ganny fer dan Latour Veyer ek Awake!, e akoz?
2 Pour plizyer lannen nou’n vwar bann sanzman dan groser ek konteni sa bann magazin e osi bann metod ki nou servi pour distribye zot. Sa bann sanzman in ganny fer avek bi pour fer bann magazin pli atiran e efikas, pour permet ki sa mesaz Rwayonm i tous leker ‘tou dimoun pour ki zot a ganny sove e ganny konnesans laverite.’—1 Tim. 2:4.
3. Ki mannyer bann magazin pou ganny servi dan predikasyon?
3 Depi Zanvye 2006, nou’n kapab fasilman byen servi bann diferan prezantasyon pour Awake! lefet ki i sorti zis en fwa tou le mwan. Aprezan nou pou kapab servi diferan prezantasyon pour ofer zis enn dan sa de Latour Veyer pe anons Rwayonm Zeova dan nou minister. Bann diferan prezantasyon pour sak magazin i ganny trouve lo dernyen paz Nou Minister Rwayonm. Sa bann prezantasyon i normalman met lanfaz lo bann premye lartik dan sa magazin, me lezot lartik ki bokou dimoun i trouv enteresan pou osi ganny prezante. Sa bann prezantasyon ki ganny sizere i kapab pli byen ganny servi dan en fason efikas ler nou byen konn sa lartik ki pe ganny prezante e servi nou prop mo pour adapte sa prezantasyon avek nou teritwar.
4. Akoz i kapab pli efikas pour servi lezot prezantasyon apard ki sa ki’n ganny sizere dan Nou Minister Rwayonm?
4 Menm si Nou Minister Rwayonm i enkli de sizesyon pour sak magazin, ou kapab servi en lot prezantasyon konpletman diferan si ou anvi. En rezon pour fer sa i kapab ki en lot lartik ti pou pli enteres dimoun dan ou teritwar ki sa de. Oubyen i kapab ki ou santi ki ou pou kapab fer en pli bon prezantasyon par servi en lartik ki’n pli enteres ou.
5. Avan nou prepar en prezantasyon pour ofer en magazin, ki ou devret fer?
5 Konman pour prepar ou prezantasyon: Premyerman, ou devret konn byen sa lartik ki ou anvi prezante. Pa toultan ki ou pou kapab konn tou lartik dan sa magazin avan ou konmans prezant li dan predikasyon. Kantmenm sa, ou devret demontre lantouzyasm ek senserite ler ou prezant sa lartik ki ou’n swazir. Ou kapab fer sa si selman ou byen konn sa lenformasyon ki ou pou prezante.
6. Ki mannyer nou kapab prepar nou prop prezantasyon?
6 Apre, dan ou preparasyon konmans en konversasyon dan en fason ki ou pou fasilman kapab adapte ou prezantasyon avek nenport ki dimoun. En kestyon ki relye avek sa lartik ki pou evey lentere sa dimoun i kapab ganny servi pour konmans en konversasyon. Toultan depan lo pwisans Parol Bondye pour tous leker dimoun. (Ebr. 4:12) Swazir en teks Labib ki relye avek sa size ki ou pou koz lo la, preferableman enn ki’n ganny mansyonnen oubyen site dan sa lartik ki ou pe prezante. Reflesir konman ou pou relye sa teks Labib avek sa lartik.
7. Ki mannyer nou kapab kontinyen rafin nou bann prezantasyon?
7 Tou loportinite: Pour en prezantasyon vreman mars byen, i bezwen ganny servi. Partisip dan distribisyon magazin avek ou kongregasyon dan Sanmdi. Ofer bann magazin avek dimoun ki’n deza aksepte lezot piblikasyon. Toultan ofer magazin avek ou letid Labib e avek lezot dimoun ki prezan ler ou pe fer en retourn vizit. Ou kapab plas bann magazin avek dimoun ki ou koz avek ler ou al aste konmisyon, ler ou pe vwayaze, oubyen ler ou pe espere pour vwar dokter. Rafin ou bann prezantasyon anmezir ou pe servi zot pandan sa mwan.
8. Dan ki fason Latour Veyer ek Awake! i inik?
8 Bann magazin Latour Veyer ek Awake! i inik. Zot loue Zeova konman sa Souvren liniver. (Akt 4:24) Zot rekonfort dimoun avek sa bon nouvel lo Rwayonm Bondye e ankouraz zot pour annan lafwa dan Kris Zezi. (Mat. 24:14; Akt 10:43) Anplis ki sa, zot vey lo bann levennman lemonn anmezir zot akonplir profesi Labib. (Mat. 25:13) Ed bann endividi dan ou teritwar pour benefisye avek sa bann magazin par met ou pare pour ofer zot sak loportinite byen apropriye ki ou gannyen!
9. Konman nou kapab poz fondasyon pour en retourn vizit?
9 Ler ou reisi plas en magazin, oubyen menm si ou ganny en konversasyon spirityel byen amikal avek en dimoun, met ou pare pour demann en kestyon oubyen dir en parol ki pou fer reflesir, ki pou kapab fer li posib pour ou fer en retourn vizit e tenir en lot konversasyon spirityel. Si nou devoue dan sa travay pour senm lagrenn laverite, nou kapab asire ki Zeova pou ouver leker bann ki senserman anvi konn e servi Li.—1 Kor. 3:6.