En travay ki anmenn bokou lazwa
1. Ki travay ozordi ki pe ed bann dimoun ganny geri spirityelman?
1 Bann dimoun ki ti vwar bann dimoun ganny geri fizikman dan premye syek ti vreman kontan. (Lik 5:24-26) Dan nou letan, nou kontan pour partisip dan sa travay ki geri dimoun spirityelman. (Rev. 22:1, 2, 17) Pa i vreman gou ler nou lir bann leksperyans kot Parol Zeova ek son lespri sen in sanz lavi en dimoun! Annefe, nou ganny plis lazwa kan nou pran par dan sa travay par kondwir en letid Labib ki progrese.
2. Ki lazwa nou kapab eksperyanse anmezir nou ansenny en dimoun laverite?
2 Ki mannyer Bondye i apele? Akoz Bondye i permet soufrans? Ki Rwayonm Bondye pou fer pour limanite? I en plezir pour nou, pa zis kan nou pe reponn sa bann kestyon, me osi kan nou vwar lazwa lo figir sa etidyan kan i aprann laverite. (Prov. 15:23; Lik 24:32) Anmezir ki en etidyan Labib i progrese, i kapab konmans servi non Zeova, sanz son fason abiye ek son laparans, aret pratik bann move keksoz ki i ti fer avan e konmans rann temwannyaz avek lezot. Si i progrese ziska dedikasyon ek batenm, i pou vin enn nou frer ek konpanyon travay. Nou annan rezon pour zwaye, sak fwa i fer enn sa bann pa pozitif.—1 Tesa. 2:19, 20.
3. Ki bann pa pratik nou kapab pran pour nou kapab konmans en letid Labib?
3 Eski ou kapab donn en koudmen? Si ou ti a kontan partisip dan sa travay ki anmenn bokou lazwa plis ki okenn lezot travay, demann Zeova pour donn ou sa privilez pour kondwir en letid Labib, e apre sa, azir an armoni avek ou lapriyer. (1 Zan 5:14) Pres kot i annan dimoun ek sa ler apropriye kot ou pou zwenn zot. Ofer letid Labib dan tou moman ki apropriye. (Ekle. 11:6) Kan ou zwenn en dimoun ki demontre lentere e ou plant en lagrenn laverite, retournen pour aroz li.—1 Kor. 3:6-9.
4. Akoz ki nou pa devret tarde pour ofer letid Labib?
4 I ankor annan en kantite dimoun ki lafen e swaf ladrwatir. Lekel ki pou etidye Labib avek zot pour ed zot satisfer zot bezwen spirityel? (Mat. 5:3, 6) Annou ofer nou lekor volonterman pour ede konplet sa travay predikasyon e fer disip avan lafen letan larekolt.—Iza. 6:8.