Eski ou zanfan in pare?

1. Akoz bann zanfan lekol i bezwen met zot pare?

¹ Zanvye, en nouvo lannen lekol pou konmanse. Ou zanfan pou san dout eksperyans bann nouvo kalite defi ek presyon. I pou osi annan nouvo loportinite pour servi konman “temwen pour laverite.” (Zan 18:37) Eski ou zanfan in pare?

2. Pour ki ou zanfan i pare, kwa ki i bezwen konnen?

² Eski ou zanfan i konpran byen kler kwa ki enplike kan nou dir ki nou pa partisip dan bann aktivite patriyotik ek bann lafet payen e akoz i mal pour partisip dan sa bann tel aktivite? Eski i’n met li pare pour fer fas avek presyon pour fer bann letid pli avanse, pwente, e servi drog ek lalkol? Eski i pou zis dir ki son larelizyon i defann fer sa bann keksoz oubyen i konnen konman pour eksplik son krwayans?​—1 Pyer 3:15.

3. Ki mannyer paran i kapab servi Ladorasyon Fanmir pour prepar zot zanfan?

³ Servi Ladorasyon Fanmir: Byensir, ou pou diskit lo bann keksoz ki souleve pandan lannen. Kan ou fer en zefor spesyal pour koz avek ou zanfan avan ki lekol i konmanse lo bann defi ki i kapab rankontre, sa pou donn li konfidans. Akoz ou pa servi Ladorasyon Fanmir pour fer sa? Ou kapab demann ou zanfan kwa ki enkyet li plis avan ki i retourn lekol. Ou osi kapab koz lo bann keksoz ki zot in deza koz lo la dan bann lannen oparavan vi ki la i’n vin pli gran e son konprenezon in ogmante. (Ps. 119:95) Ou kapab fer bann legzersis kot ou fer krwar ki ou en ansenyan, school counselor oubyen en kanmarad lekol ou zanfan. Ansenny ou zanfan konman pour defann son krwayans dapre Labib e konman pour servi bann zouti parey liv Reasoning ek Young People Ask. En paran ti fer bann legzersis pour prepar son bann zanfan pour apros zot nouvo ansenyan o konmansman lekol sak lannen pour fer zot konnen ki zot en Temwen Zeova.​—Vwar Latour Veyer le 15 Desanm 2010, paz 3-5.

4. Kwa ki bann paran saz pou anvi fer?

⁴ Bann defi ki bann zenn Kretyen i bezwen rankontre pandan sa bann dernyen zour pe vin pli “difisil” pour fer fas avek. (2 Tim. 3:1) Bann paran ki saz pou esey mazin davans bann problenm ki zot zanfan i kapab rankontre e ed zot pour prepare pour fer fas avek sa bann problenm. (Prov. 22:3) Avan ki nouvo lannen lekol i konmanse, fer tou sa ki ou kapab pour met ou zanfan pare.