Eski ou’n pare pour al lekol?
1. Ki loportinite pe esper ou kan ou pou konmans lekol?
1 An Zanvye, ki swa i zot premye lannen oubyen i annan ankor en lot lannen pour zot al lekol, zot bann zenn Kretyen zot pou eksperyans bann nouvo kalite defi ek presyon. Me zot osi annan bann nouvo loportinite devan zot pour servi konman “temwen pour laverite.” (Zan 18:37) Eski zot in byen prepare e pare pour rann temwannyaz?
2. Dan ki fason ki ou’n pare pour lekol?
2 Pour ed ou reisi dan tou laspe lavi, ou’n ganny en bon formasyon avek Zeova, ou paran ek lesklav fidel e pridan. (Prov. 1:8; 6:20; 23:23-25; Efe. 6:1-4; 2 Tim. 3:16, 17) San dout ziska aprezan ou konnen ki defi ou ekspekte gannyen kot lekol. Vi ki ou konnen ki kalite lanvironnman ou pou fer fas avek kot lekol e ou’n ganny sa formasyon sorti kot Bondye, prepare pour ou donn en temwannyaz. (Prov. 22:3) Egzamin o serye sa lenstriksyon ek bann sizesyon byen itil ki sorti dan Labib ki trouve dan sa de volim liv Young People Ask ek bann lartik ki abord bann size parey ki ganny pibliye dan Awake! regilyerman.
3. Dan ki fason ou pou kapab donn en temwannyaz?
3 Ou teritwar personnel pou permet ou donn en temwannyaz dan plizyer fason. Kan lezot i obzerv ou bon legzanp dan ou laparans, ou fason sanze, ou fason koze, ou kondwit, respe ki ou demontre pour ou bann ansennyan ek kanmarad lekol, menm ou rezilta lekol e si zot santi ki ou annan en bi dan lavi, serten i kapab demande: “Akoz ou telman diferan?” (Mal. 3:18; Zan 15:19) Sa i kapab donn ou sa loportinite pour ou donn en temwannyaz e eksplik zot ou krwayans. (1 Tim. 2:9, 10) I tre probab ki tou dilon lannen ou pou fer fas avek bann defi ki annan pour fer avek bann seremoni nasyonal ek bann lafet. Si zot demann ou akoz ou pa partisipe ou osi, eski ou pou zis dir: “Mon en Temwen Zeova e dan mon larelizyon nou pa partisip dan sa bann lafet” oubyen eski ou pou sezi sa loportinite pour donn en temwannyaz lo Zeova, ou Papa ki ranpli avek lanmour? Avek led Zeova, si ou fer en bon preparasyon, ou pou pare pour donn en bon temwannyaz avek ou ansennyan, kanmarad lekol ek lezot.—1 Pyer 3:15.
4. Akoz ou konfidan ki ou kapab reisi ou lekol sa lannen?
4 Menm si petet ou en pe per kan ou mazin pour al lekol, mazinen ki ou annan sipor plizyer dimoun ki anvi ou reisi ou lekol sa lannen. Deplis, nou osi nou byen kontan kan nou mazin konsernan sa loportinite ki ou annan pour donn en temwannyaz avek lezot dan ou teritwar personnel. Alor, pran kouraz e met pare pour al lekol!