Pa bezwen ezite!
1. Nou bezwen kouraz pour fer kwa e akoz?
1 Eski ou’n deza ezite pour donn en temwannyaz kot lekol akoz ou ti per pangar ou a ganny sikannen? Pa i vreman demann bokou kouraz pour koze sirtou si ou en dimoun ki timid! Kwa ki kapab ed ou?
2. Ki mannyer nou kapab servi bon zizman ler nou pe donn temwannyaz kot lekol?
2 Servi bon zizman: Menm si lekol i ou teritwar personnel, pa oubliye ki ou pa oblize konmans en konversasyon spirityel avek tou dimoun zis parey ou ti pou fer ler pe pres portanport. Servi bon zizman pour konnen kan i sa bon moman pour koze. (Ekle. 3:1, 7) Bann size ki ganny diskite dan laklas oubyen devwar ki ou gannyen pour fer i kapab donn ou loportinite pour eksprim ou lafwa. Petet en kanmarad laklas pou osi demann ou akoz ou pa partisip dan serten aktivite. Serten Kretyen i deside pour enform zot ansennyan depi o konmansman lannen skoler ki zot Temwen Zeova e zot osi donn zot ansennyan bann piblikasyon ki eksplik nou krwayans. Parler lezot i kit piblikasyon lo biro pour fer zot kanmarad laklas anvi demann zot kestyon.
3. Ki mannyer ou kapab prepar ou pour donn en temwannyaz kot lekol?
3 Prepar byen: Si ou prepar byen, ou pou annan plis konfidans pour defann ou lafwa. (1 Pyer 3:15) Alor esey mazin ki kestyon lezot i kapab demande e rode ki mannyer ou pou reponn. (Prov. 15:28) Si i posib, kit en Labib ensi ki detrwa piblikasyon parey liv Reasoning, Young People Ask ek bann piblikasyon lo kreasyon kot lekol pour ou kapab refer avek ler ou bezwen. Demann ou paran pour fer bann legzersis lo ki mannyer pour reponn bann kestyon ki ou kanmarad lekol i kapab demande, pandan zot ladorasyon an fanmir.
4. Akoz i byen pour ou kontinyen prese kot lekol?
4 Reste pozitif: Pa bezwen mazinen ki ou bann kanmarad lekol pou toultan sikann ou ler ou koz konsernan laverite. Petet serten pou menm admir ou pour ou kouraz e pou menm ekout ou. Me pa dekouraze menm si personn pa demontre lentere. Zeova pou apresye ou zefor. (Ebr. 13:15, 16) Kontinyen demann li led pour ou kapab koz avek “lasirans san okenn lafreyer.” (Akt 4:29; 2 Tim. 1:7, 8) Pa ou pou vreman kontan si en dimoun i ekout ou! Sa dimoun i menm kapab dedye son lavi avek Zeova en zour.