Lekol Minister Teokratik pour 2002
1 Laplipar dimoun i pran sa abilite pour koze pour en nanryen ditou. Parkont, sa abilite pour koze i en kado ki sorti kot Zeova. I permet nou kominik avek lezot e eksprim nou panse ek santiman. Pli enportan ki tou, nou kapab servi sa abilite pour loue nou Bondye.—Pson. 22:22; 1 Kor. 1:4-7.
2 Lekol Minister Teokratik i form zonm, fanm ek zanfan pour deklar non Zeova. (Pson. 148:12, 13) Progranm lekol pour 2002 i kouver en gran varyete size Biblik ki kapab ed nou personnelman e osi servi dan minister. Par prepare pour lekol e partisip ladan, nou kapab ogmant nou konnesans ek nou abilite konman bann ansennyan Parol Bondye.—Pson. 45:1.
3 Lir Labib toulezour: Si nou abitye annan nou Labib toultan avek nou, nou kapab profit nenport letan lib ki nou annan pour lir li. Laplipar nou, nou annan enpe letan lib pandan lazournen ki nou kapab servi pour lir Labib. Nou pou vreman benefisye si nou lir omwen en paz sak zour, e sa i sifi pour nou kontinyen swiv sa progranm lektir Labib dan progranm lekol.—Pson. 1:1-3.
4 Sa abilite pour lir byen Labib i kapab ed nou pour tous leker bann ki ekout nou e motiv zot pour loue Zeova. Bann frer ki fer Ekspoze No. 2 dan lekol i devret egzerse, egzerse, egzerse, e fer li aotvwa. Sirveyan lekol pou felisit e donn bann sizesyon pour amelyor lektir.
5 Servi Liv Comment raisonner: Ekspoze No. 3 ek No. 4 i baze lo liv Comment raisonner. Petet laplipar nou nou devret esey servi sa liv pli souvan dan minister. Bann ser i devret swazir bann senn ki apropriye avek sa teritwar. Sirveyan lekol i devret port en latansyon partikilye lo konman ki bann etidyan i ansennyen e servi Labib.
6 Fotespere ki Lekol Minister Teokratik i ed nou tou pour kontinyen servi sa don pour koze ki Bondye in donn nou pour deklar sa bon nouvel e pour loue nou gran Bondye, Zeova!—Pson. 34:1; Efe. 6:19.