Konman Lekol Minister Teokratik i benefisye nou
1 Pep Zeova i annan sa loportinite inik pour resevwar ledikasyon teokratik. (Iza. 54:13; Zan 6:45) Me kantite ki nou benefisye i depan bokou lo zefor ki nou fer. Eski ou kapab rekonnet lefe pozitif ki Lekol Minister Teokratik pe fer lo ou spirityalite?
2 Bon Komanter: Bokou sirveyan lekol in remarke ki sa letid oprofon lo bann pwen lansennyman in amelyor lefikasite zot kongregasyon dan predikasyon. Deplis, en sirveyan lekol in vwar ki gras a sa laranzman partisipasyon lodyans dan pwen biblik enteresan, bokou dimoun pe swiv sa progranm lektir Labib. Konsernan Ekspoze No. 2, bokou frer in byen apresye bann byenfe ki zot in gannyen par konsantre zis lo sa lenformasyon ki pou ganny lir san bezwen prepar en lentrodiksyon ek konklizyon. Bann frer ki ganny sa ekspoze i aprezan konsantre plis pour amelyor zot abilite pour lir.—1 Tim. 4:13.
3 Tou Dimoun i kapab benefisye: Fer komanter dan bann renyon i kapab vin en lazwa. (Prov. 15:23) Lefe ki nou ganny bann kestyon revizyon oral davans i permet nou prepar e partisip dan revizyon fasilman. Deplis, depi dan Latour Veyer le 1 Zanvye 2004, i’n annan bann pwen enteresan dan bann liv Labib ki koresponn avek nou lektir Labib dan Lekol Minister Teokratik. Sa bann lartik in ed bokou dimoun pour fer bann bon komanter pandan pwen biblik enteresan.
4 Tou dimoun ki antre dan sa lekol i annan sa privilez spesyal pour prepar e fer bann ekspoze. Nou tou nou kapab benefisye avek komanter pozitif ki sirveyan lekol i fer lo lestrad. Sak etidyan i benefisye plis avek konsey ki sa sirveyan lekol i kapab ofer an prive apre renyon. Bann legzersis alafen sak sapit ki koz lo en pwen lansennyman dan liv Benefisye atraver Ledikasyon Lekol Minister Teokratik i ed sa etidyan plis ankor.
5 Ler bann lide pratik ki baze lo Labib i ganny ofer pandan e apre lekol, not zot dan ou kopi liv Lekol Minister. Reflesir lo sa ki ou’n aprann, e egzaminen konman sa ledikasyon ki sorti kot Bondye pe amelyor ou spirityalite.