Zeova pe form nou pour fer sa travay
1. Ler Zeova i donn bann imen en travay pour fer, kwa ki i osi fer?
1 Ler Zeova i donn imen en travay pour fer i osi ed zot pour arive fer li. Par egzanp, ler Zeova ti demann Noe pour konstri lars, en keksoz ki Noe pa ti’n zanmen fer oparavan, I ti osi dir li ki mannyer pour fer. (Zen. 6:14-16) Ler Moiz ti ganny demande pour apros Faraon ek bann ansyen dan nasyon Izrael, Zeova ti donn li sa lasirans: “Mon pou met mon parol dan ou labous e mon pou montre ou sa ki ou devret dir.” (Egz. 4:12) An sa ki konsern desarz nou responsabilite pour al prese, Zeova pa les nou tousel. I pe form nou pour fer sa travay atraver Lekol Minister Teokratik ek Renyon Servis. Ki mannyer nou kapab benefisye avek sa formasyon?
2. Ki mannyer nou kapab benefisye atraver Lekol Minister Teokratik?
2 Lekol Minister Teokratik: Lir e etidye sa ki lo progranm Lekol Minister Teokratik avan ki ou al renyon. Anmezir ki ou obzerv lafason ki sa bann etidyan i devlop zot size sa pou ed ou vin en meyer ansennyen. (Prov. 27:17) Anmenn ou liv Lekol Minister avek ou dan renyon. Ler sa sirveyan pe refer avek sa liv apre ki sak zelev in fini fer son size, souliny bann pwen enportan ki ou anvi aplike e pran bann not dan sa lespas akote paz. Meyer fason pour benefisye avek sa lekol se ler nou partisipe. Eski ou dan lekol? Kan ou ganny en size pour fer, prepar byen, aplik sa bann konsey ki ou gannyen e servi sa ki nou’n aprann dan predikasyon.
3. Ki mannyer nou kapab benefisye atraver Renyon Servis?
3 Renyon Servis: Nou pou pli byen rapel bann sizesyon ki’n ganny prezante dan Renyon Servis si nou lir sa bann lenformasyon ki pou ganny prezante davans e prepar en komanter. Si nou gard nou komanter kourt, i pou annan plis dimoun ki pou ganny sans partisipe. Get byen bann demonstrasyon ki ganny fer e servi bann sizesyon ki pou ed ou vin pli efikas dan ou minister. Gard en kopi sa bann lartik ki koz lo predikasyon ki trouve dan Nou Minister Rwayonm ki pou kapab servi ou pli tar.
4. Akoz nou bezwen servi byen sa formasyon ki nou gannyen dan Renyon Servis?
4 Parey sa travay ki Noe ek Moiz ti gannyen, sa travay predikasyon ki nou’n ganny demande pour fer dan lemonn antye i osi en defi. (Mat. 24:14) Nou pou kapab reisi selman si nou depan lo Zeova nou Gran Enstrikter e servi byen sa bann formasyon ki i donn nou.—Iza. 30:20.