Bann referans pour Kaye renyon Nou minister ek lavi Kretyen
6-12 OUT
BANN TREZOR DAN PAROL BONDYE | LIK 17-18
“Remersye lezot”
not letid dan nwtsty-E dan Li 17:12, 14
dis zonm ki ti annan lalep: Dan letan ki Labib ti ganny ekrir, bann lepre ti zwenn ansanm oubyen viv ansanm pour ki zot kapab ed kanmarad. (2Rw 7:3-5) Dapre Lalwa Bondye bann lepre ti bezwen ganny met an karantenn. Ler en lepre ti pe vin parmi lezot dimoun, i ti bezwen kriye: “Enpir! Enpir!” (Le 13:45, 46) Parey Lalwa ti demande, sa bann lepre ti debout lwen avek Zezi.—Vwar not letid dan nwtsty-E dan Mt 8:2 ek Leksplikasyon bann mo “Lalep, lepre.”
Al kot bann pret pour zot ganny egzaminen: Dapre Lalwa Moiz, en pret ti bezwen verifye si en lepre ti’n ganny geri. Sa lepre ki ti ganny geri ti bezwen al kot tanp e anmenn en lofrann oubyen en kado, swa de zwazo, dibwa sed, lalenn rouz fonse ek en brans izop. (Le 14:2-32) Vi ki Zezi Kri ti anba Lalwa ler i ti lo later, i ti rekonnet lotorite ki bann pret ti annan anba Lalwa, alor i ti dir bann ki i ti’n geri avek lalep pour al kot pret.—Mt 8:4; Mr 1:44.
w08-E 1/8 14-15 ¶8-9
Akoz nou devret demontre lapresyasyon?
Eski Zezi pa ti antren sa bann ki pa ti’n demontre lapresyasyon? Sa verse i dir: “Alor Zezi ti dir: ‘Pa tou le dis zonm in ganny geri? Me alor, oli sa nef lezot? Eski napa personn ankor ki’n vin rann glwar Bondye eksepte sa zonm sorti dan en lot nasyon?’”—Lik 17:17, 18.
Sa nef lezot lepre pa ti bann move dimoun. Pli boner zot ti’n demontre lafwa dan Zezi e zot ti pare pour obei li, al Zerizalenm pour bann pret egzamin zot. Par kont, menm si zot ti vreman apresye sa ki Zezi ti’n fer pou zot, zot pa ti demontre zot lapresyasyon anver li. Zezi ti dezapwente. Me nou ler dimoun i tret nou byen, eski deswit nou dir mersi e kan i apropriye demontre lapresyasyon par ekri en pti not?
Rod bann perl spirityel
not letid dan nwtsty-E dan Li 17:10
bon nanryen: Literalman “initil; pa vo nanryen.” Dan son legzanp, Zezi pa ti pe montre ki sa bann lesklav setadir son bann disip i devret konsider zot lekor initil oubyen pa vo nanryen. Dapre sa konteks, “bon nanryen” i donn sa nide ki sa bann lesklav ti pou konn zot limit, pa ekspekte ganny latansyon spesyal oubyen ganny felisite. Serten spesyalis Labib i krwar sa term i vedir “nou zis bann lesklav ki pa merit okenn latansyon spesyal.”
not letid dan nwtsty-E dan Li 18:8
sa kalite lafwa: Oubyen “sa lafwa.” Sa mo Grek ki’n ganny mete avan “lafwa,” i montre ki Zezi pa ti pe refer avek lafwa an zeneral me en kalite lafwa parey sa vev dan legzanp Zezi. (Li 18:1-8) Sa ti pou enkli annan lafwa dan pouvwar ki lapriyer i annan e osi lafwa ki Bondye pou fer sir ki lazistis i ganny fer pour bann ki in swazir. I paret ki Zezi pa ti reponn sa kestyon konsernan lafwa pour ki son bann disip i mazin kalite lafwa ki zot annan. Sa legzanp konsernan lapriyer ek lafwa ti apropriye akoz Zezi ti’n fek dekrir bann problenm ki son bann disip ti pou fer fas avek.—Li 17:22-37.
13-19 OUT
BANN TREZOR DAN PAROL BONDYE | LIK 19-20
Rod bann perl spirityel
not letid dan nwtsty-E dan Li 19:43
gran baraz avek bann poto pwent: Sa mo Grek khaʹrax i aparet zis dan sa verse dan Lekritir Grek Kretyen. I ganny dekrir konman “bann bout dibwa pwent oubyen poto ki ganny servi pour bar en landrwa; poto” i osi en “baraz fer avek bann poto dibwa ki bann solda i konstri pandan lager.” Parol Zezi ti vin vre lannen 70 ler bann Romen anba komann Titus ti konstri en baraz avek bann poto pwent toultour lavil Zerizalenm. Titus ti annan trwa lobzektif, pour anpes bann Zwif sove, pour fer zot rann zarm e pour fer bann dimoun dan lavil mor lafen e soumet avek zot. Pour ganny dibwa pour konstri sa baraz otour sa lavil, larme Romen ti koup bann pye dibwa pa tro lwen lanmenm dan lakanpanny.
not letid dan nwtsty-E dan Li 20:38
parski pour li zot tou zot vivan: Oubyen “dapre li zot tou zot vivan.” Labib i montre ki bann ki vivan me ki pa konn Bondye i konmsi zot in mor pour li. (Efe 2:1; 1Ti 5:6) Pareyman, bann serviter Bondye ki mor i konmsi zot ankor vivan pour Bondye parski son plan pour resisit zot i definitivman pou vin vre.—Ro 4:16, 17.
20-26 OUT
BANN TREZOR DAN PAROL BONDYE | LIK 21-22
Rod bann perl spirityel
not letid dan nwtsty-E dan Li 21:33
Lesyel ek later pou disparet: Lezot verse Labib i montre ki lesyel ek later pou touzour egziste. (Ze 9:16; Ps 104:5; Ek 1:4) Dan sa legzanp, Zezi ti pe esey dir ki menm si i arive ki lesyel ek later i disparet, son bann parol pou vin vre. (Konpar Mt 5:18.) Par kont, i kapab ki sa lesyel ek later ki Zezi ti pe koz lo la ti senbolik e i sa menm “lesyel avan ek sa later avan” ki Re 21:1 i koz lo la.
mon parol pa pou zanmen disparet: Lefet ki sa verb Grek i ganny mete ansanm avek “pa” ek “zanmen,” sa i montre ki sa i en nide ki pa pou zanmen arive e ki parol Zezi pou reste pour touzour.
27 OUT–2 SEPTANM
BANN TREZOR DAN PAROL BONDYE | LIK 23-24
“Toultan pare pour pardonn lezot”
g-E 2/08 11 ¶5-6
Eski Bondye i pardonn bann pese grav?
Bondye pa get zis sa pese me i osi get latitid sa dimoun ki’n fer pese. (Izai 1:16-19) Annou pran legzanp sa de kriminel ki ti ganny met lo poto ansanm avek Zezi. Tou le de ti’n fer bann krim vreman grav akoz enn parmi zot ti dir: “Nou’n ganny sa ki nou merite pour bann keksoz ki nou’n fer, me sa zonm [Zezi] pa’n fer nanryen mal.” Sa ki sa zonm ti dir i montre ki i ti konn serten keksoz lo Zezi e sa ti annan en bon lefe lo son latitid. Nou vwar sa atraver sa ki i ti dir ler i ti sipliy avek Zezi: “Mazin mwan ler ou vin Lerwa.” Ki mannyer Zezi ti reazir? Zezi ti reponn: “Laverite mon dir ou ozordi, ou pou avek mwan dan Paradi.”—Lik 23:41-43.
Zis mazin sa, parmi bann dernyen parol ki Zezi ti dir avan i mor, ti bann parol ranpli avek konpasyon, avek en zonm ki ti’n admet ki i ti merit santans lanmor. Pa sa i vreman ankourazan! Alor, nou kapab asire ki Zeova ek Zezi pou demontre konpasyon anver tou dimoun ki vreman repantir pour zot bann pese, nenport kwa ki zot in fer.—Romen 4:7.
Rod bann perl spirityel
not letid dan nwtsty-E dan Li 23:31
ler sa pye dibwa i ver, . . . ler i sek: Zezi ti pe refer avek nasyon Zwif ki ti parey en pye dibwa ki ti pe sek me ki ti ankor ver akoz Zezi ti ankor lo later e i ti ankor annan en pe Zwif ki ti krwar dan li. Par kont, Zezi ti pe al ganny met amor e bann Zwif ki ti fidel avek li ti pou ganny swazir avek lespri sen pour zot form parti Izrael spirityel. (Ro 2:28, 29; Ga 6:16) Sa letan, nasyon Izrael ti pou vin en nasyon ki’n mor spirityelman parey en pye dibwa ki’n sek.—Mt 21:43.
Portre dan nwtsty-E
En lezo talon ki’n ganny pike avek en klou
Sa portre i montre en lezo talon ki’n ganny pike avek en klou ki ti 11.5 santimet longer. Sa lezo ti ganny dekouver anba later an 1968 dan Nor Zerizalenm e i date depi letan bann Romen. I en levidans arkeolozik ki prouve ki klou ti ganny servi pour klout bann dimoun lo en poto pour ekzekit zot. Sa klou i en pe parey bann klou ki larme Romen ti servi pour klout Zezi lo poto. Sa lezo ti ganny trouve dan en kof an ros kot lezo en dimoun mor ti ganny mete apre ki i ti’n fini dekonpoze. Sa i montre ki en dimoun ki ti ganny kloute lo en poto ti kapab ganny antere.