Ki mannyer ou kapab viv dan en nouvo lemonn?

Bann lartik avan i montre ki Bondye pou byento met en lafen avek sa move lemonn ek tou son bann problenm. Nou kapab asire ki sa pou arive. Akoz? Parski Parol Bondye, Labib i promet:

“Sa lemonn . . . pou disparet.”—1 ZAN 2:17.

Nou kapab asire ki i pou annan bann ki pou sirviv akoz sa verse Labib i osi promet:

“Sa enn ki fer lavolonte Bondye pou reste pour touzour.”

Alor, si nou anvi sirviv, nou bezwen fer lavolonte Zeova. Pour konnen kisisa lavolonte Bondye, nou bezwen premyerman aprann konn Bondye.

SIRVIV LAFEN SA LEMONN PAR “APRANN KONN” BONDYE

Portre: 1. En ners pe asiz ater dan lopital, i fatige e i’n ganny ase. 2. I pran en poz dan kafeterya e la i remark son koleg travay pe lir en magazin avek lazwa. 3. Son koleg travay i lir en verse Labib avek li e i donn li en kart kontak jw.org.

Zezi ti dir: “Pour ganny lavi eternel zot bezwen aprann konn ou konman sa sel vre Bondye.” (Zan 17:3) Pour sirviv lafen sa lemonn e viv pour touzour, nou bezwen ”aprann konn” Bondye. Sa i vedir plis ki krwar dan Bondye oubyen konn serten keksoz lo li. Nou bezwen vin zanmi avek li. Si nou anvi en lanmitye i vin for, nou bezwen pas letan avek nou zanmi. I parey avek Bondye. Annou vwar serten laverite ki nou aprann dan Labib ki pou ed nou devlop e mentenir en lanmitye avek Bondye.

Laverite ki nou aprann dan Labib

Nou aprann ki Bondye ti anvi nou viv dan Paradi.

Bondye ti kree premye imen, Adan ek Ev e i ti met zot dan en zoli zarden ki ti apel Zarden Edenn. Zot ti parfe e Bondye ti donn zot tou sa ki zot ti bezwen pour annan en lavi ere. Zot ti pou kapab viv pour touzour. Osi lontan ki zot ti reste zanmi avek Zeova, zot pa ti pou zanmen mor. Me zot ti swazir pour dezobei en senp komann ki Bondye ti donn zot.

Nou aprann akoz nou pe soufer.

Par dezobei, Adan, sa premye zonm ti perdi sa posibilite pour li ek larestan imen viv pour touzour. Labib i dir: “Atraver en sel zonm pese in antre dan lemonn e pese in anmenn lanmor, alor tou dimoun i mor.” (Romen 5:12) Zis parey en dimoun i kapab erit en maladi avek son paran, tou bann zanfan Adan in erit pese avek li. Pour sa rezon nou vin vye e mor.

Nou aprann sa ki Bondye in deza fer pour ed nou.

Labib i dir: “Bondye in telman kontan lemonn ki i’n donn son sel Garson pour ki nenport ki ki demontre lafwa dan li pa ganny detrir me i ganny lavi eternel.” (Zan 3:16) Bondye ti anvoy Zezi lo later pour donn son lavi pour nou. Konsernan sa pli gran lanmour ki Zeova in demontre, en zonm Endyen aze 86 an ki apel Prabhakar i dir: “Sa i montre sa gran lanmour ki Zeovaa i annan pour mwan. Son lanmour in donn mwan sa lespwar pour viv pour touzour.”

Nou aprann ki mannyer pour demontre lapresyasyon pour sa ki Bondye in fer pour nou.

Labib i dir ki nou kapab demontre lapresyasyon pour sa ki Bondye in fer pour nou par “obei son bann komannman.” (1Zan 2:3). Avek lanmour, Zeova i montre nou ki nou kapab fer pour rezoui lavi la konmela. (Izai 48:17, 18) Bondye pa anvi nou soufer. I’n promet ki si nou swiv son bann lenstriksyon, nou pa pou zis annan en lavi ere la konmela me nou pou osi annan sa loportinite pour viv pour touzour.

LIR PAROL BONDYE, LABIB, TOULEZOUR

Sa ners i deor dan son ler dezennen e apre ki i’n lir Labib, i get ver lesyel. — Ou kapab sirviv lafen sa lemonn par priy Bondye pour ed ou e par fer son lavolonte

Nou manze pour nou reste vivan. Me Zezi ti dir: “Zonm pa devret viv zis lo dipen tousel me lo tou parol ki sorti dan labous Zeova.”—Matye 4:4.

Ozordi, nou vwar parol Zeova dan Labib. Anmezir ou etidye sa liv sakre, ou pou aprann laverite lo bann keksoz ki Bondye in fer dan lepase, ki I pe fer la konmela e ki I pou fer dan lavenir.

PRIY BONDYE POUR GANNY LED

Ki ou kapab fer si ou anvi obei Bondye me ou vwar li difisil pour aret fer bann keksoz ki Bondye i dir i mal? Dan sa ka, ler ou aprann konn Bondye, sa i kapab vreman ed ou.

Annou vwar legzanp en madanm ki nou pou apel Sakura e ki ti pe viv en lavi imoral. Ler i ti konmans etidye Labib i ti aprann konsernan sa komannman Bondye pour “sov lwen avek imoralite seksyel.” (1 Korentyen 6:18) Sakura ti priy Bondye pour ganny lafors e i ti kapab aret sa move pratik. Me i ankor bezwen lalit avek tantasyon. Sakura i dir: “Si bann panse imoral i vin dan mon lespri, mon koz onnetman avek Zeova dan lapriyer parski mon konnen ki mon pa kapab lalit avek sa mon tousel. Lapriyer in ed mwan vin pli pros avek Zeova.” Parey Sakura, plizyer milyon dimoun pe aprann konn Bondye. I pe donn zot sa lafors ki zot bezwen pour fer sanzman dan zot lavi e pour viv dan en fason ki fer li plezir.—Filipyen 4:13.

Pli ou aprann konn Bondye, pli Bondye pou konn ou e i pou pran ou konman son zanmi presye. (Galat 4:9; Psonm 25:14) Alor nou pou kapab viv dan sa nouvo lemonn. Me ki mannyer sa nouvo lemonn pou ete? Sa lot lartik pou koz lo la.

a Dapre Labib, Zeova i non Bondye.