Kwa ki pou ed ou pour adapte dan en nouvo kongregasyon?

Nicolas ek Céline ti fer fas avek en lot difikilte. Biro brans Lafrans ti demann zot pour al servi dan en nouvo kongregasyon e zot ti aksepte. Zot dir: “O konmansman nou ti vreman eksite me apre nou ti konmans mank nou bann zanmi. Nou pa ti ankor vin pros avek bann frer ek ser dan nou nouvo kongregasyon.”a Alor ki mannyer ou kapab trouv lazwa e fer en bon travay dan ou nouvo kongregasyon menm si i annan bann difikilte? Ki lezot i kapab fer pour ede? Ki mannyer ou kapab ankouraz lezot e ganny ankouraze avek lezot dan ou nouvo kongregasyon?

KAT PRENSIP KI POU ED OU POUR ADAPTE DAN OU NOUVO KONGREGASYON

1. Depan lo Zeova. (Ps. 37:5) Kazumi, ki reste Zapon, ti kit sa kongregasyon ki i ti ladan pour 20 an, ler son msye ti ganny transfer dan en lot landrwa pour son travay. Ki mannyer i ti “kit tou keksoz dan lanmen Zeova”? I dir: “Mon ti devid mon leker avek Zeova dan lapriyer. Mon ti koz avek li konsernan tou sa ki ti fer mwan per e enkyet. Mon ti osi dir Zeova ki souvan mon ti santi mwan tousel. Sak fwa mon ti fer sa, Zeova ti donn mwan sa lafors ki mon ti bezwen.”

Ki mannyer ou kapab depan plis lo Zeova? Zis parey en plant i bezwen delo ek mineral ki dan later pour li grandi, nou lafwa osi i bezwen ganny nouri pour li vin pli for. Nicolas, ki’n ganny mansyonnen pli boner, ti medit lo legzanp Abraam, Zezi ek Pol, ki ti fer en kantite sakrifis pour fer lavolonte Bondye e sa ti fer Nicolas pli konfidan ki Zeova pou ed li. Si ou etidye Labib regilyerman, sa pou ed ou fer fas avek nenport sanzman dan ou lavi e ou pou kapab aprann bann keksoz ki ou kapab servi pour ankouraz lezot dan ou nouvo kongregasyon.

2. Pa konpar sa kongregasyon ki ou ti ladan avan, avek sa enn nouvo. (Ekle. 7:10) Jules ti bezwen aziste avek en nouvo kiltir ler i ti kit Benen pour al reste Leta-z-ini. I dir: “Mon ti annan lenpresyon ki mon ti bezwen koz lo mon lavi avek sak nouvo dimoun ki mon ti zwenn.” Vi ki sa ti en keksoz ki Jules pa ti abitye fer, i ti konmans evit bann frer ek ser. Me apre ki i ti’n aprann konn bann frer ek ser, i ti sanz son fason panse. I dir: “Aprezan mon realize ki nenport landrwa kot mon ete lo later, dimoun i parey. Zis zot fason koze e zot fason fer keksoz ki diferan. I enportan pour aksepte dimoun parey zot ete.” Alor, evite konpar ou nouvo kongregasyon avek sa enn kot ou ti ete avan. En ser ki apel Anne-Lise, ki en pionye i dir: “Mon pa’n vin dan sa nouvo kongregasyon avek bi pour rod sa ki mon’n kit deryer. Mon’n vin la pour dekouver nouvo keksoz.”

Bann ansyen osi i bezwen evite konpar sa kongregasyon kot zot ti ete avan avek sa enn nouvo. I pa akoz serten fason fer keksoz dan sa nouvo kongregasyon i diferan, ki sa i vedir ki bann frer dan sa kongregasyon pa pe fer keksoz byen. I ti pou saz pour ou konn bann sirkonstans dan sa nouvo kongregasyon avan ou fer ou bann sizesyon. (Ekle. 3:1, 7b) I pli bon ou ansenny bann frer ek ser atraver ou bon legzanp olye esey fors zot pour annan menm fason panse avek ou.—2 Kor. 1:24.

3. Reste okipe dan ou nouvo kongregasyon. (Fili. 1:27) Menm si i pran en kantite letan ek lenerzi pour deplase, i tre enportan ki ou konmans asiste renyon dan ou nouvo kongregasyon o pli vit posib e pour ou fer li an personn si ou kapab. Apre tou, ki mannyer bann frer ek ser dan ou nouvo kongregasyon pou kapab ed ou si zot pa zanmen vwar ou oubyen zot vwar ou dan rar? En ser ki apel Lucinda, ki ti’n al reste dan en gran lavil Sidafrik avek son de fiy, i dir: “Mon ti’n ganny sa konsey pour vin pros avek bann frer ek ser dan mon nouvo kongregasyon, pour travay avek zot dan predikasyon e pour partisipe dan renyon. Nou ti osi les bann frer ek ser servi nou lakaz pour fer renyon predikasyon.”

Ler ou “lalit kot a kot” dan bann aktivite spirityel avek ou bann frer ek ser dan ou nouvo kongregasyon, sa pou ede ranforsi ou lafwa ek lafwa ou bann frer ek ser. Anne-Lise, ki’n ganny mansyonnen pli boner ti ganny ankouraze avek bann ansyen pour li travay avek tou bann frer ek ser dan predikasyon. Ki rezilta sa ti anmennen? I dir: “Sa ti en bon fason pour fer mwan santi ki mon form parti kongregasyon.” Osi ler ou volonter pour netway e mentenir Lasal Rwayonm, sa pou montre ou bann frer ek ser ki ou pe konsider sa nouvo kongregasyon konman ou kongregasyon. Pli ou pas letan avek zot, zot pou vin pli pros avek ou e ou pou santi ki ou form parti sa nouvo fanmir spirityel.

4. Fer bann nouvo zanmi. (2 Kor. 6:11-13) Ler ou demontre lentere personnel dan en dimoun, i pou pli fasil pour zot vin zanmi. Alor esey vin kot lasal en pe letan avan renyon i konmanse e osi reste en pe letan apre lasal, pour pas letan avek bann frer ek ser pour aprann konn zot pli byen. Fer zefor pour konn zot non. Ler ou mazin non dimoun e ou fer li fasil pour lezot koz avek ou, zot pou anvi konn ou pli byen e i tre probab zot pou vin bann bon zanmi.

Olye enkyet konsernan ki mannyer ou pou fer lezot aksepte ou, les bann frer ek ser aprann konn sa dimoun ki ou vreman ete. Ou kapab swiv legzanp Lucinda. Lucinda i dir: “Aprezan nou annan bann bon zanmi e sa i akoz nou’n pran sa linisyativ pour envit lezot kot nou lakour.”

“BYEN RESEVWAR KANMARAD”

Serten dimoun i kapab santi zot strese ler zot antre dan en Lasal Rwayonm ki ranpli avek dimoun ki zot pa konnen. Alor, ki mannyer ou kapab fer bann ki nouvo dan ou kongregasyon santi zot alez? Zapot Pol i dir nou: “Byen resevwar kanmarad parey Kris in byen resevwar zot.” (Rom. 15:7) Ler bann ansyen i swiv legzanp Kris, zot kapab ed bann ki nouvo dan zot kongregasyon pour santi zot alez. (Vwar bwat “Kwa ki pou ed ou adapte dan en nouvo kongregasyon?”) Me tou dimoun dan kongregasyon enkli bann zanfan, i kapab ed bann ki nouvo pour santi zot alez.

Ler nou akeyir lezot, sa i enkli demontre lospitalite e osi ofer zot bann led pratik. Par egzanp, en ser ti ed en ser ki ti’n fek vin dan son kongregasyon. Vi ki sa nouvo ser pa ti konn sa landrwa, sa ser ti anmenn li fer en letour dan lavil e i ti montre li ki mannyer pour servi bis ek tren. Sa ki sa ser ti fer ti tous sa nouvo ser en kantite e sa ti fer li fasil pour li adapte avek son nouvo landrwa.

EN LOPORTINITE POUR APRANN PLIS

Anmezir ki en sotrel i vin pli matir, i sanz son lapo plizyer fwa avan ler i kapab anvole. Pareyman, ler en dimoun i al dan en nouvo kongregasyon, i bezwen retir okenn lenkyetid ki i annan ki kapab anpes li fer plis dan servis Zeova. Nicolas ek Céline i dir: “Ler ou sanz landrwa, sa i en bon formasyon. Pour nou kapab adapte avek bann nouvo dimoun ek en landrwa ki diferan, nou’n bezwen devlop bann nouvo kalite.” Jean-Charles, ki’n ganny mansyonnen lo konmansman sa lartik, i koz lo bann byenfe ki son fanmir in gannyen. I dir: “Ler nou’n sanz kongregasyon, sa in ed nou zanfan pour vin pli matir e pli pros avek Zeova. Apre zis detrwa mwan, nou fiy ti konmans ganny bann prezantasyon pour fer dan renyon lasemenn e nou garson ti vin en proklanmater non batize.”

Ki ou kapab fer si ou sirkonstans pa permet ou sanz kongregasyon, par egzanp, pour al dan en kongregasyon kot i annan bezwen pour plis proklanmater? Akoz ou pa konsider sa kongregasyon ki ou deza ladan konman enn ki nouvo e esey aplik serten sa bann sizesyon ki ou’n vwar dan sa lartik? Anmezir ki ou depan lo Zeova, reste okipe dan ou kongregasyon par fer bann laranzman pour travay avek lezot dan predikasyon e par fer bann nouvo zanmi oubyen ranforsi bann lanmitye ki ou deza annan. Petet ou kapab pran linisyativ pour ed bann nouvo oubyen bann ki dan bezwen, dan en fason pratik. Vi ki lanmour i idantifye bann vre Kretyen, ler ou ed lezot sa i kapab fer ou vin pli pros avek Zeova. (Zan 13:35) Ou kapab asire ki “Bondye i kontan bann sakrifis koumsa.”—Ebr. 13:16.

Malgre bann difikilte, en kantite Kretyen in trouv lazwa e zot in reisi dan en nouvo kongregasyon. Alor ou osi ou kapab fer parey! Anne-Lise i dir: “Ler mon’n sanz kongregasyon sa in ed mwan pour ouver gran mon leker.” Kazumi aprezan i asire ki ler ou sanz kongregasyon, “Zeova i kapab ed ou dan bann fason ki ou pa’n zanmen eksperyanse oparavan.” Ki mannyer Jules i santi? I dir: “Vi ki mon’n fer zanmi, sa in ed mwan pour santi mwan konfortab dan mon nouvo kongregasyon. Aprezan mon santi mwan pli pros avek bann fer ek ser e i pou difisil pour mwan kit sa kongregasyon.”