KI MANNYER NOU PROBLENM POU GANNY REZOURD?

Anba Rwayonm Bondye “lape ava dire”

Byento, Rwayonm Bondye ki nou pe espere depi lontan, setadir en gouvernman ki Bondye in etabli pour diriz later antye, pou anmenn lape ek larmoni lo later. Parey in ganny promet dan Psonm 72:7: “Lape ava dire.” Me kan ki sa Rwayonm pou konmans dirize? Ki mannyer i pou fer sa? Ki mannyer ou kapab benefisye anba son dominasyon?

KAN KI RWAYONM BONDYE POU VINI?

Labib ti predir serten levennman ki pou fer nou konnen ki Rwayonm Bondye i pros pour arive. Tou sa bann levennman i form en “siny” ki enkli lager ant bann nasyon, lafanmin, lepidemi, en kantite tranblemandter e en kantite pese.—Matye 24:3, 7, 12; Lik 21:11; Revelasyon 6:2-8.

En lot profesi i dir: “Bann dernyen zour pou en letan vreman difisil. Parski dimoun pou egois, kontan larzan, . . . dezobeisan anver zot paran, zot pa pou rekonesan e zot pa pou fidel. Zot pou napa lanmour pour kanmarad, zot pa pou tonm dakor avek kanmarad, zot pou malparl lezot, zot pou napa en kontrol lo zot lekor, zot pou kriyel, zot pa pou kontan sa ki byen, . . . orgeye, kontan plezir plito ki kontan Bondye.” (2 Timote 3:1-4) In toultan annan dimoun avek sa bann tandans. Me ozordi, laplipar dimoun i koumsa.

Sa bann profesi ti konmans ganny akonplir lannen 1914. Menm bann istoryen, politisyen ek ekriven i rekonnet ki sa i vre e zot in koz lo lafason ki lemonn in sanze apre 1914. Par egzanp, Peter Munch ki en istoryen sorti Denmark ti ekri: “Ler lager ti deklare an 1914, listwar limanite ti konmans al dan en lot direksyon. Avan 1914, dimoun ti krwar ki bann kondisyon lo later ti pe vin pli meyer, . . . me apre 1914, tou ti sanze e i ti konmans annan bann katastrof, lafreyer ek laenn e partou dimoun ti nepli santi zot an sekirite.”

Me annou pa bliye ki apre movetan i annan botan. Sa bann keksoz ki pe arive i montre ki Rwayonm Bondye i pros pour diriz later. Anfet, Zezi ti dir ki i annan en keksoz pozitif ki form parti sa siny ki montre ki lafen i pros: “Sa bon nouvel Rwayonm pou ganny anonse partou lo later pour donn en temwannyaz avek tou nasyon e apre sa, lafen pou arive.”—Matye 24:14.

Sa bon nouvel i sa mesaz prensipal ki Temwen Zeova i anonse. Anfet, zot magazin prensipal i apel Latour Veyer pe anons Rwayonm Zeova. Sa magazin i regilyerman diskit lo bann keksoz merveye ki Rwayonm Bondye pou fer pour limanite e pour later.

KI MANNYER RWAYONM BONDYE POU PRAN KONTROL?

Larepons i enkli sa kat pwen enportan:

Sa Rwayonm pa pou ganny dirize par okenn dirizan politik sa lemonn.
Bann dirizan politik sa lemonn pa pou anvi abandonn zot pouvwar, alor zot pou esey lager kont Rwayonm Bondye ki en keksoz bet pour zot fer.—Psonm 2:2-9.
Rwayonm Bondye pou bezwen detri bann rwayonm imen ki anvi kontinyen diriz limanite. (Danyel 2:44; Revelasyon 19:17-21) Sa lager final i apel Armagedon.—Revelasyon 16:14, 16.
Tou bann ki pare pour soumet anba Rwayonm Bondye, pa pou ganny detrir pandan lager Armagedon e zot pou antre dan sa nouvo lemonn kot pou annan lape. Zot menm zot ki pou vin sa “gran lafoul” ki Labib i koz lo la. I tre probab ki i pou annan plizyer milyon zot.—Revelasyon 7:9, 10, 13, 14.

KI RWAYONM BONDYE POU FER?

Ler Zezi ti lo later i ti donn nou en avangou lo sa ki i pou fer konman Lerwa dan Rwayonm Bondye. I ti geri bann malad ek bann ki annan dezabilite. (Matye 4:23) I ti nouri plizyer milye dimoun. (Mark 6:35-44) I ti menm annan pouvwar lo lanatir.—Mark 4:37-41.

Par lao tou, Zezi ti montre dimoun konman pour viv ansanm dan lape ek larmoni. Tou bann ki annan limilite e ki aplik son bann lansennyman, i devlop bann kalite ki pou ed zot viv ere anba Rwayonm Bondye pour touzour. Napa en lot ansenyan ki kapab fer sa. Legzanp bann bon lansennyman Zezi i kapab ganny trouve dan sa ki ganny apele Sermon lo Montanny ki dan Matye sapit 5-7. Nou ankouraz ou pour lir sa bann sapit. Zezi i servi bann mo senp me sa mesaz i ranpli avek lasazes. Sa bann lansennyman i vreman tousan.

KI MANNYER OU KAPAB BENEFISYE ANBA DOMINASYON RWAYONM BONDYE?

Sa premye keksoz ki nou bezwen fer pour vin en sitwayen Rwayonm Bondye i etidye Labib. Dan en lapriyer ki Zezi ti fer avek Bondye, i ti fer resorti sa pwen ler i ti dir: “Pour ganny lavi eternel, zot bezwen aprann konn ou, sa sel vre Bondye e sa enn ki ou’n anvoye Zezi Kri.”—Zan 17:3.

Ler dimoun i aprann pour konn Zeova konman en Personnaz, zot benefisye dan plizyer fason. Annou vwar zis de: Premyerman, zot devlop en lafwa for dan li. Sa lafwa ki baze lo levidans, i konvenk zot ki Rwayonm Bondye i en realite e ki i pros pour dirize. (Ebre 11:1) Dezyenmman, zot lanmour pour Bondye ek zot prosen i vin pli for. Lanmour pour Bondye i motiv zot pour obei li avek tou zot leker. Lanmour pour zot prosen i pous zot pour aplik sa parol Zezi ki souvandfwa ganny apele Lareg-d-or. I dir: “Zis parey zot anvi dimoun i fer pour zot, zot osi fer parey pour zot.”—Lik 6:31.

Parey en papa ki kontan son zanfan, nou Kreater i anvi sa ki pli meyer pour nou. I anvi ki nou annan sa ki Labib i apel “sa vre lavi.” (1 Timote 6:19) Nou pa pe viv “sa vre lavi” konmela. Pour plizyer milyon dimoun, lavi i vreman difisil e zot pe lite pour sirviv. Pour donn ou en avangou “sa vre lavi,” annou vwar serten keksoz merveye ki Rwayonm Bondye pou fer pour son bann sitwayen.

EN AVANGOU SA VRE LAVI

“Anba son rwayonm, bann dimoun drwat pou fleri e lape pou partou kote . . . I pou annan bann sitwayen . . . partou lo later.”—Psonm 72:7, 8, 13, 14, NWT.
“[Bondye] i fer lager arete partou lo later; i kas bann fles, i detri bann lans.”—Psonm 46:9.
“Legren pou annabondans lo later. Anler lo latet bann montanny i pou annabondans.”—Psonm 72:16, NWT.
“Zot pou konstri bann lakaz e zot pou reste ladan. Zot pou plant bann pye rezen e manz son bann fri. Zot pa pour konstri lakaz pour ki en lot i reste ladan. Zot pa pou plante pour ki en lot i manz son fri. . . . Sa bann ki mon’n swazir, pou profit travay ki zot in fer par zot lanmen.”—Izai 65:21, 22.
“Latant Bondye i avek bann imen. . . . I pou eswiy tou larm dan zot lizye, i pou nepli annan ni lanmor, ni dey, ni leokri, ni douler ankor.”—Revelasyon 21:3, 4.

Dimoun pe rezoui lavi dan Paradi — Anba Rwayonm Bondye, dimoun pou an sekirite e zot pou annan en kantite manze