En pti fiy ti ed en zonm for

ESKI ou konnen ki sa pti fiy pe dir? I pe rakont sa madanm konsernan profet Zeova, Elisa ek sa bann keksoz merveye ki Zeova in ed li pour fer. Sa madanm pa konn nanryen lo Zeova akoz i pa en Izraelit. Aprezan, annou vwar akoz ki sa pti fiy ti dan lakaz sa madanm.

Sa madanm ti en Siryen. Son msye ti apel Naamann, e i ti sef larme Siryen. Bann Siryen ti’n kaptir sa pti fiy, e zot ti’n anmenn li kot madanm Naamann pour vin son serviter.

Naamann ti annan en move maladi ki ti apel lalep. Sa kalite maladi ti kapab fer laser en dimoun sorti. Sa pti fiy ti pe dir avek madanm Naamann: ‘Mon swete ki mon met ti kapab al kot profet Zeova an Izrael. I ti pou geri son lalep.’ Plitar, sa ti ganny raporte avek msye sa madanm.

Naamann ti vreman anvi ganny geri; alor i ti deside pour al Izrael. Kan i ti ariv Izrael, i ti al kot lakaz Elisa. Elisa ti fer enn son serviter al kot Naamann e demann li pour lav li dan Larivyer Zourden set fwa. Sa ti fer Naamann vreman ankoler, e i ti dir: ‘Bann larivyer kot mon reste i pli meyer ki okenn larivyer an Izrael!’ Apre ki i ti’n fini dir sa, Naamann ti pe al retourn kot li.

Me enn son serviter ti dir avek li: ‘Msye, si Elisa ti dir ou fer en keksoz difisil, ou ti pou fer li. Aprezan akoz ou pa zis lav ou, parey i’n dir?’ Naamann ti ekout son serviter e i ti al tranp li set fwa dan Larivyer Zourden. Kan i ti fer sa, son laser ti vin ferm e i ti vin an bonn sante!

Naamann ti vreman kontan. I ti retourn kot Elisa e dir li: ‘Aprezan mon asire ki sa Bondye an Izrael i sa sel vre Bondye lo tou later. Alor silvouple pran sa kado avek mwan.’ Me Elisa ti reponn: ‘Non, mon pa pou pran li.’ Elisa ti konnen ki i ti pou mal pour li pran sa kado, akoz se Zeova ki ti’n geri Naamann. Me serviter Elisa, Geazi, ti oule sa kado.

Apre ki Naamann ti’n ale, Geazi ti taye pour zwenn li. ‘Elisa in anvoy mwan vin dir ou ki i oule serten sa bann kado pour donn bann zanmi ki’n fek vin vizite,’ Geazi ti dir. Byensir, sa ti lalang. Me Naamann pa ti konnen ki sa ti lalang; alor i ti donn Geazi serten sa bann keksoz.

Kan Geazi ti retourn kot li, Elisa ti konnen ki i ti’n fer. Zeova ti’n dir li. Alor i ti dir: ‘Akoz ou’n fer sa move keksoz, lalep Naamann pou vin lo ou.’ E se sa ki ti arive toudswit!

Ki nou kapab aprann atraver tousala? Premyerman, nou devret vin parey sa pti fiy e koz lo Zeova. I pou kapab fer en kantite dibyen. Dezyenmman, nou pa devret vin vantar parey Naamann ti ete okonmansman, me nou devret obei bann serviter Zeova. E trwazyenmman, nou pa devret koz lalang parey Geazi ti fer. Eski pa nou aprann en kantite keksoz ler nou lir Labib?