En gerye ek en pti fiy

I ti annan en pti fiy Izraelit ki ti lwen avek son fanmir ki ti reste Siri. Bann larme Siryen ti’n pran li kot son fanmir e la i ti en servant kot madanm Naamann. Naamann ti sef larme Siryen. Sa pti fiy ti ador Zeova menm si lezot dimoun otour li pa ti ador Zeova.

Naamann ti annan en move maladi ki ti afekte son lapo e i ti toultan dan douler. Sa pti fiy ti vreman anvi ed li. I ti dir madanm Naamann: ‘Mon konn en dimoun ki kapab geri ou msye. I annan en profet Zeova ki apel Elisa, Izrael. I kapab geri ou msye.’

Madanm Naamann ti dir son msye sa ki sa pti fiy ti’n dir li. I ti pare pour fer nenport kwa, alor i ti al kot lakaz Elisa, Izrael. Naamann ti pe ekspekte Elisa resevwar li konman en dimoun enportan. Me olye koz avek li personnelman, Elisa ti anvoy son serviter pour zwenn Naamann e dir li: ‘Ale e lav ou dan Larivyer Zourden set fwa. Apre ou pou ganny geri.’

Naamann ti byen dezapwente. I ti dir: ‘Mon ti krwar sa profet ti pou geri mwan par kriy son Bondye e pas pas son lanmen devan mwan. Me la i dir mwan al lav mwan dan sa larivyer Izrael. Nou annan bann pli bon larivyer Siri. Akoz mon pa kapab plito al laba?’ Naamann ti ankoler e i ti kit lakaz Elisa.

Bann serviter Naamann ti fer li reflesir. Zot ti dir li: ‘Pa ou ti pare pour fer nenport kwa pour ou ganny geri? Sa ki sa profet in dir ou i sitan senp. Akoz ou pa zis eseye?’ Naamann ti ekout zot. I ti al Larivyer Zourden e plonz dan delo set fwa. Apre sa setyenm fwa, Naamann ti sorti dan delo konpletman byen. I ti vreman kontan e i ti retourn kot Elisa pour dir li mersi. Naamann ti dir: ‘Aprezan mon konnen ki Zeova i sa vre Bondye.’ Ki mannyer ou krwar sa pti fiy ti santi ler Naamann ti retourn byen?