Leson 14

Konman bann Temwen Zeova i organiz zot?

Kan aktivite modern bann Temwen Zeova ti konmanse? (1)

Konman bann renyon Temwen Zeova i deroule? (2)

Konman zot pey zot bann depans? (3)

Lekel ki diriz sak kongregasyon? (4)

Lekel bann pli gran renyon ki ganny fer sak lannen? (5)

Ki kalite travay ki ganny fer dan biro prensipal e dan bann biro brans Temwen Zeova? (6)

1. Aktivite modern Temwen Zeova ti konmans dan bann lannen 1870. Okonmansman, zot ti apel bann Etidyan Labib. Me an 1931, zot ti adopte sa non Temwen Zeova, tire dan Labib. (Izai 43:10) Okonmansman, sa lorganizasyon ti byen pti, me konmela i’n grandi e i annan plizyer milyon Temwen ki pe pres dan plis ki 230 pei.

2. Laplipar kongregasyon Temwen Zeova i reini ansanm trwa fwa par semenn. Ou ganny envite pour asiste nenport sa bann renyon. (Ebre 10:24, 25) Labib i baz tou lansennyman dan sa bann renyon. Bann renyon i konmans e termin avek en lapriyer. Dan preske tou bann renyon, dimoun i sant “bann kantik” spirityel avek tou zot leker. (Efezyen 5:18, 19) Larantre i gratwit, e napa laket.—Matye 10:8.

3. Laplipar kongregasyon i fer zot renyon dan en Lasal Rwayonm. Lasal Rwayonm i souvan en batiman tou senp ki ganny konstri par bann Temwen zot menm. Dan bann Lasal Rwayonm, ou pa pou vwar okenn stati, okenn krisifi, ni okenn lezot keksoz parey. Bann depans i ganny peye par bann kontribisyon volonter. Pour bann ki oule fer en lofrann, i annan bann bwat kontribisyon.—2 Korentyen 9:7.

4. Dan sak kongregasyon, i annan bann ansyen, oubyen bann sirveyan. Se zot ki diriz lansennyman dan kongregasyon. (1 Timote 3:1-7; 5:17) Zot ganny led avek bann asistan ministeryel. (1 Timote 3:8-10, 12, 13) Sa bann zonm pa pli siperyer ki lezot manm kongregasyon. (2 Korentyen 1:24) Zot napa okenn tit an partikilye. (Matye 23:8-10) Zot pa sanz dan en fason spesyal. Zot pa ni ganny peye pour sa ki zot fer. Bann ansyen i okip volonterman bann bezwen spirityel dan kongregasyon. Zot kapab donn rekonfor ek konsey kan bann manm i dan problenm.—Zak 5:14-16; 1 Pyer 5:2, 3.

5. Bann Temwen Zeova i osi organiz bann gran lasanble sak lannen. Pandan sa bann moman, bokou kongregasyon i zwenn ansanm pour ekout en progranm lansennyman spesyal lo Labib. Batenm bann nouvo disip i ganny organize dan sak sa bann lasanble.—Matye 3:13-17; 28:19, 20.

6. Biro prensipal Temwen Zeova i New York. Laba, en group ansyen ki annan bokou leksperyans e ki ganny apele Konsey Direkter i siperviz tou bann kongregasyon dan lemonn antye. I annan osi plis ki 100 biro brans atraver lemonn kot bann volonter i ede pour enprim e anvoy bann piblikasyon baze lo Labib. Sa bann biro brans i osi organiz aktivite predikasyon. Akoz ou pa organiz en vizit dan enn sa bann biro brans Temwen Zeova ki pros avek ou?