Zot Lorganizasyon ek zot Travay mondyal

I ANNAN plizyer keksoz ki travay ansanm pour diriz sa travay predikasyon ki pe ganny fer dan plis ki 230 pei. Konsey Direkter ki baze dan biro prensipal Brooklyn, New York pe diriz travay predikasyon dan lemonn antye. Tou le zan Konsey Direkter i anvoy bann reprezantan dan diferan rezyon lemonn pour diskit avek bann reprezantan biro brans dan sa bann rezyon. Dan sak biro brans i annan en Komite Brans. Lo en komite i kapab annan trwa a set manm e zot sirvey travay dan bann pei ki anba zot responsabilite. Dan serten brans i annan lenprimri, e serten i annan bann masin lenprimri tre vit. Sa pei oubyen landrwa ki sak biro brans i okipe i ganny divize dan bann distrik, e sak distrik i ganny divize dan bann rezyon. Dan sak rezyon i annan apepre 20 kongregasyon. En sirveyan distrik i vizit en rezyon apre lot ki dan son distrik. Tou le zan i annan de lasanble pour sak rezyon. I osi annan en sirveyan rezyonal. E li i vizit sak kongregasyon dan son rezyon normalman de fwa dan en lannen. I ed bann Temwen pour organiz e anons sa bon nouvel dan teritwar zot kongregasyon.

Sa kongregasyon ek son Lasal Rwayonm i sa sant ki promot sa bon nouvel dan ou kominote. Teritwar pour sak kongregasyon i ganny dekoupe dan bann pli pti teritwar. Zot ganny donnen avek bann Temwen e zot fer zefor pour vizit e koz avek dimoun kot sak lakaz dan sa bann teritwar. Dan sak kongregasyon, i kapab annan detrwa ziska apepre 200 Temwen, i osi annan bann ansyen ki desarz diferan responsabilite. Sak proklanmater sa bon nouvel i zwe en rol enportan dan lorganizasyon Temwen Zeova. Nenport landrwa i pe servi Zeova, ki swa kot biro prensipal, dan bann biro brans, oubyen dan bann kongregasyon, tou Temwen i al anons Rwayonm Bondye avek lezot.

Finalman rapor lo sa aktivite i ariv kot biro prensipal e zot pibliy en liv tou le zan ki apel Annuaire. Tou le lannen osi en latab i ganny pibliye dan nimero Latour Veyer le 1 Fevriye. Sa de piblikasyon i donn en rapor detaye lo sa ki’n ganny akonpli sak lannen dan sa travay pour koz lo Zeova ek son Rwayonm dirize par Zezi Kri. Pandan sa bann dernyen lannen, apepre 16,000,000 Temwen ek lezot dimoun in asiste Memoryal lanmor Zezi tou le zan. Bann Temwen Zeova i depans plis ki 1,000,000,000 er-d-tan par an pour anons sa bon nouvel, e plis ki 300,000 nouvo i batize. Zot distribye plizyer milyon piblikasyon.