Leson 15

Ed lezot Dimoun pour fer Lavolonte Bondye

Akfer dir lezot dimoun konsernan sa ki ou pe aprann? (1)

Avek ki ou kapab partaz sa bon nouvel? (2)

Ki lefe ou kondwit i kapab annan lo lezot? (2)

Kan eski ou pou kapab al prese ansanm avek kongregasyon? (3)

1. Ziska prezan, ou’n aprann bokou bon keksoz dan Labib. Sa konnesans i devret ed ou pour devlop en personnalite Kretyen. (Efezyen 4:22-24) Sa konnesans i esansyel pour ki ou kapab ganny lavi eternel. (Zan 17:3) Sepandan, lezot dimoun osi i bezwen tann sa bon nouvel pour ki zot osi zot ganny sove. Tou bann vre Kretyen i devret donn temwannyaz avek zot prosen. Se en komannman Bondye.—Romen 10:10; 1 Korentyen 9:16; 1 Timote 4:16.

2. Ou kapab konmans partaz sa bann bon keksoz ki ou pe aprann avek dimoun dan ou lantouraz. Koz avek ou fanmiy, ou bann zanmi, ou kanmarad lekol ek bann koleg travay. Ou bezwen reste kalm e annan pasyans kan ou donn temwannyaz. (2 Timote 2:24, 25) Pa bliye ki bann dimoun i pli souvan get ou kondwit plito ki ekout ou parol. Ou bon kondwit i kapab anmenn lezot pour ekout sa ki ou annan pour dir.—Matye 5:16; 1 Pyer 3:1, 2, 16.

3. Avek letan, ou pou kalifye pour konmans pres avek kongregasyon lokal Temwen Zeova. Sa i en pa enportan dan ou progre. (Matye 24:14) Pa i pou en lazwa si ou kapab ed en dimoun pour vin en serviter Zeova e apre ganny lavi eternel!—1 Tesalonisyen 2:19, 20.