LESON 22
Ki mannyer ou kapab anons sa bon nouvel?
Anmezir ki ou aprann laverite dan Labib, ou kapab dir dan ou menm, ‘Tou dimoun i devret konn sa!’ I vre, tou dimoun i bezwen konn sa! Par kont, petet ou santi ou en pti pe per pour koz avek lezot lo sa ki ou’n aprann. Annou vwar ki mannyer ou kapab sirmont sa lafreyer e konmans anons sa bon nouvel ki dan Labib avek lazwa.
1. Ki mannyer ou kapab koz lo sa ki ou’n aprann avek dimoun ki ou konnen?
Bann disip Zezi ti dir: “Nou pa kapab aret koz lo keksoz ki nou’n vwar e tande.” (Akt 4:20) Zot ti vwar sa laverite sitan presye ki zot ti anvi koz lo la avek otan dimoun ki zot kapab. Eski ou santi parey zot? Si wi, rod loportinite pour koz avek respe lo sa ki ou’n aprann avek ou fanmir ek zanmi.—Lir Kolosyen 4:6.
Serten fason ki ou ti kapab konmanse
Ler ou pe koz avek enn ou fanmir, ou kapab entrodwi en topik lo Labib par dir: “Mon’n aprann en keksoz enteresan sa semenn.”
Partaz en verse Labib ankourazan avek en zanmi ki malad oubyen enn ki pe trakase.
Ler ou bann koleg travay i demann ou ki mannyer ou’n pas ou lasemenn, dir zot konsernan sa ki ou’n aprann dan ou letid Labib oubyen dan en renyon kongregasyon.
Montre ou bann zanmi nou sit jw.org.
Envit lezot pour asiste ou letid Labib oubyen montre zot ki mannyer zot kapab demande pour ganny en letid lo jw.org.
2. Akoz i vo lapenn fer zefor pour pres avek kongregasyon?
Bann disip Zezi pa ti zis anons sa bon nouvel avek dimoun ki zot ti konnen. Zezi ti “anvoy zot de par de, par devan li dan sak lavil” pour prese. (Lik 10:1) Sa fason organize pour prese ti donn bokou plis dimoun sa loportinite pour tann sa bon nouvel. Deplis ler bann disip ti pres ansanm, sa ti donn zot bokou lazwa. (Lik 10:17) Eski ou osi ou kapab fer li ou lobzektif pour pres avek kongregasyon?
AL PLI O PROFON
Vwar ki mannyer ou kapab sirmont ou lafreyer e eksperyans sa lazwa ki ou gannyen ler ou anons sa bon nouvel avek lezot.
3. Zeova pou avek ou
Serten ki anvi prese i kapab per ki lezot i dir oubyen per reaksyon dimoun ki zot koz avek.
Eski ou per pour koz lo sa ki ou’n aprann? Akoz?
Zwe sa VIDEO e apre reponn sa kestyon.
Ki mannyer sa bann zenn Temwen ti sirmont zot lafreyer?
Lir Izai 41:10 e apre reponn sa kestyon:
Si ou per pour prese ki mannyer lapriyer i kapab ed ou?
Eski ou ti konnen?
Bokou Temwen Zeova ti mazinen ki zot pa ti pou kapab zanmen anons sa bon nouvel avek lezot. Par egzanp, Sergey ti napa konfyans dan son lekor e i ti vwar li difisil pour koz avek lezot dimoun. Me apre i ti etidye Labib. I dir: “Kantmenm mon ti per, mon ti konmans koz avek lezot lo sa ki mon ti pe aprann. Mon ti sirprann pour vwar ki ler mon ti koz avek lezot lo Labib sa ti fer mwan ganny plis konfyans dan mon lekor. I ti osi fer mon lafwa vin pli for dan sa ki mon ti pe aprann.”
4. Demontre respe
Ler ou pe koz lo sa bon nouvel, pa get zis sa ki ou pe al dir me ki mannyer ou pou dir li. Lir 2 Timote 2:24 ek 1 Pyer 3:15 e apre reponn sa bann kestyon:
Ki mannyer ou kapab aplik sa bann verse ler ou pe koz avek lezot lo Labib?
Petet serten fanmir oubyen zanmi pa pou dakor avek ou. Ki ou kapab fer? Ki ou pa devret fer?
Akoz i pli bon demann kestyon avek bon zizman olye dir dimoun ki zot devret krwar?
5. Anons sa bon nouvel i donn lazwa
Zeova ti donn Zezi sa travay pour anons sa bon nouvel. Ki mannyer Zezi ti vwar sa travay? Lir Zan 4:34 e apre reponn sa bann kestyon:
Ler nou manz bann bon manze i gard nou vivan e fer nou kontan. Akoz Zezi ti konpar fer lavolonte Bondye, ki enkli anons sa bon nouvel, avek manze?
Ki lazwa ou krwar ou kapab gannyen ler ou anons sa bon nouvel?
Bann pti sizesyon
Pandan renyon lasemenn, rod bann fason ki ou kapab konmans konversasyon avek lezot.
Koz avek ou ansenyan lo konman ou kapab vin en zelev dan renyon lasemenn. Sa bann ekspoze ki ou gannyen i kapab fer ou santi ou pli byen prepare pour koz avek lezot lo sa ki ou pe aprann.
Servi sa seksyon “Serten dimoun i dir” oubyen “Si en dimoun i demande” dan sa liv pour praktis konman pour reponn serten kestyon oubyen lobzeksyon ki souvan nou tande.
SI EN DIMOUN I DEMANDE: “Ki nouvel?”
Ki mannyer ou kapab servi sa loportinite pour dir sa dimoun ki ou’n aprann dan ou letid Labib?
REZIMEN
Anons sa bon nouvel i donn lazwa e konmans li i kapab pli fasil ki ou ti’n mazinen.
Revizyon
Akoz i enportan anons sa bon nouvel avek lezot?
Ki mannyer ou kapab fer li avek respe?
Ki mannyer ou kapab sirmont okenn lafreyer ki ou annan pour prese?
FER PLIS RESERS
Vwar kat fason senp ki ou kapab anons sa bon nouvel an servan sa kart kontak jw.org.
Aprann konsernan kat kalite ki kapab ed ou anons sa bon nouvel.
“Eski ou’n pare pour lapes dimoun?” (Latour Veyer Septanm 2020)
Gete ki mannyer en legzanp dan Labib i kapab donn nou kouraz pour anons sa bon nouvel menm si nou ankor zenn.
Dekouver ki mannyer ou kapab koz avek ou fanmir ki pa’n aprann lo Zeova.
“Tous leker bann manm fanmir ki pa Temwen” (Latour Veyer 15 Mars 2014)