Ou kapab amelyor ou Abilite pour rapel

ZEOVA BONDYE ti kree laservel imen avek abilite merveye pour rapel. I’n ganny fer parey en stor kot ou kapab retir serten keksoz san perdi sa bann keksoz ki deza ladan. Lafason ki laservel in ganny fer i al tre byen avek plan Bondye ki oule ki imen i viv pour touzour.—Pson. 139:14; Zan 17:3.

Me petet ou santi ki tro bokou keksoz ki ou met dan ou lespri i perdi. I sanble ki i pa la ler ou bezwen li. Ki ou kapab fer pour amelyor ou abilite pour rapel?

Devlop en Lentere

Annan lentere i en fakter enportan ki kapab amelyor nou abilite pour rapel. Si nou fer li en labitid pour vin en dimoun ki obzerve, ki enterese avek dimoun e sa ki pe pase otour nou, nou lespri i ganny stimile. I pou alor pli fasil pour nou reazir avek en menm lentere ler nou lir oubyen antann serten keksoz ki annan valer dirab.

Souvan-d-fwa i arive ki en dimoun i ganny difikilte pour rapel non bann dimoun. Pourtan, konman Kretyen, nou konnen ki dimoun i enportan—bann konpanyon Kretyen, sa bann ki nou pres avek, e lezot ki nou rankontre ler nou okip bann nesesite lavi. Kwa ki kapab ed nou pour rapel bann non ki nou devret vreman rapele? Zapot Pol ti mansyonn 26 dimoun par zot non dan en kongregasyon ki i ti ekrir. Son lentere dan zot ti ganny endike par lefe ki i pa ti selman konn zot non me i ti osi mansyonn bann detay spesifik lo bokou parmi zot. (Rom. 16:3-16) Ozordi serten sirveyan rezyonal Temwen Zeova i rapel bann non tre byen, kantmenm zot deplas dan en kongregasyon pour en lot sak semenn. Kwa ki ed zot? Ler zot koz avek sa dimoun pour premye fwa zot kapab fer li en labitid pour servi non sa dimoun plizyer fwa. Zot fer zefor pour relye non sa dimoun avek son figir. Deplis, zot pas letan avek plizyer endividi dan predikasyon e ler zot pe pran repa ansanm. Ler ou rankontre en dimoun, eski ou pou rapel non sa dimoun? Konmans par annan en bon rezon pour rapel sa non; apre esey serten sizesyon ki’n ganny mansyonnen pli boner.

Rapel sa ki ou lir i osi enportan. Kwa ki kapab ed ou pour amelyore dan sa domenn? Lentere ek konpreansyon i zwe en rol. Ou bezwen annan sifizaman lentere lo sa ki ou pe lir pour fikse tou ou latansyon lo la. Ou pa pou gard otan lenformasyon si ou lespri i en lot landrwa pandan ki ou pe esey lir. Ou pli byen konpran ler ou relye lenformasyon avek bann keksoz ki familye avek ou oubyen avek konnesans ki ou deza annan. Demann ou lekor: ‘Konman e kan ki mon kapab aplik sa lenformasyon dan mon lavi? Ki mannyer mon kapab servi sa lenformasyon pour ed en lot dimoun?’ Konpreansyon i osi ganny amelyore kan ou lir bann group mo ansanm olye bann mo tousel. Ou pou konpran pli vit bann lide e idantifye bann panse prensipal, alor zot vin pli fasil pour rapel.

Pran Letan pour fer Revizyon

Bann eksper dan domenn ledikasyon i met lanfaz lo valer revizyon. Dan en letid ki en profeser liniversite ti fer, i ti demontre ki fer en revizyon toudswit pour en minit pou double lakantite lenformasyon ki ou rapel. Alor toudswit apre ki ou’n fini ou lektir—oubyen apre ki ou’n lir en bon pe sa lenformasyon—reviz bann lide prensipal pour gard zot dan ou lespri. Reflesir lo ki mannyer ou pou kapab eksplik okenn nouvo pwen ki ou’n aprann dan ou prop mo. Par renouvle ou lespri toudswit apre ki ou’n lir en lide, sa pou ogmant lakantite letan ki ou kapab rapel sa pwen.

Dan bann zour swivan, rod en loportinite pour repas lo sa ki ou’n lir par partaz sa lenformasyon avek en lot dimoun. Ou kapab partaz li avek en manm fanmiy, en dimoun dan kongregasyon, en koleg travay, en kanmarad lekol, en vwazen, oubyen en dimoun ki ou rankontre dan predikasyon. Pa zis esey repet bann fe fondamantal me osi rezonnman Biblik ki’n ganny servi an konneksyon avek sa bann fe. An fezan sa i pou benefisye ou, i pou ed pour gard bann keksoz enportan dan ou memwar; i pou benefisye lezot osi.

Medit lo bann Keksoz enportan

Anplis ki reviz sa ki ou’n lir e koz avek lezot konsernan sa, ou pou dekouver ki medit lo bann keksoz enportan ki ou’n aprann i anmenn benefis. De ekriven Labib Azaf ek David ti fer sa. Azaf ti dir: “Mon pou rapel bann fason azir Ya; akoz mon pou rapel ou bann akt merveye dan lepase. E mon pou sertennman medit lo tou ou aktivite, e mon pou enterese avek ou mannyer azir.” (Pson. 77:11, 12) David osi ti ekrir: “Ler mon eveye lannwit mon medit lo ou” e “Mon rapel bann zour letan lontan; mon’n medit lo tou ou aktivite.” (Pson. 63:6; 143:5) Eski ou fer sa?

Konsider avek profon refleksyon ek konsantrasyon, sa ki Zeova in fer, son bann kalite, e sa ki i’n revele lo son lavolonte pou fer plis ki zis ed nou gard bann fe. Si bann refleksyon i vin en labitid, bann keksoz esansyel pou vreman grave dan ou leker. I pou form sa kalite dimoun ki ou ete anndan. Bann souvenir ki ou pou fer pou reprezant ou bann panse pli profon.—Pson. 119:16.

Rol Lespri Bondye

Nou pa tousel ler nou pe fer zefor pour rapel bann laverite lo bann aktivite Zeova ek bann keksoz ki Zezi in dir. Sa swar avan son lanmor, Zezi ti dir avek son bann disip: “Mon’n dir zot tousala letan mon ankor avek zot. Me Konseyer, Lespri-sen ki mon Papa pou anvoye an mon non, pou ansenny zot tou keksoz, e fer zot rapel tou sa ki mon’n dir zot.” (Zan 14:25, 26). Matye ek Zan ti parmi sa bann ki ti prezan sa zour. Eski lespri sen ti prouv konman en tel asistan pour zot? Wi! Apepre wit an plitar, Matye ti fini ekrir premye resi detaye lo lavi Kris, enkli bann souvenir ki annan gran valer parey Sermon lo Montanny ek en siny detaye lo prezans Kris ek konklizyon sa sistenm. Swasannsenk an apre lanmor Zezi, zapot Zan ti ekrir son Levanzil, ki enkli detay lo sa ki Zezi ti dir lo sa dernyen lannwit ki bann zapot ti pase avek Senyer avan ki i ti donn son lavi. San dout Matye ek Zan ti annan bann souvenir byen vivan lo bann keksoz ki Zezi ti dir e fer pandan ki zot ti avek li, me lespri sen ti zwe en rol mazer pour fer sir ki zot pa oubliy bann detay enportan ki Zeova ti anvi dan son Parol.

Eski lespri sen i azir konman en asistan pour bann serviter Bondye ozordi? Definitivman! Byensir, lespri sen pa met dan nou lespri keksoz ki nou pa’n zanmen aprann, me i azir konman en asistan pour ed nou rapel bann keksoz enportan ki nou’n etidye dan lepase. (Lik 11:13; 1 Zan 5:14) Apre, kot i annan nesesite, nou bann fakilte mantal i ganny stimile pour “mazin bann parol ki bann sen profet in anonse depi lontan ek bann komannman ki nou Senyer e Sover in donnen.”—2 Pyer 3:1, 2.

‘Ou pa devret oubliye’

Zeova ti kontinyelman averti Izrael: ‘Ou pa devret oubliye.’ Zeova pa ti pe ekspekte ki zot rapel tou keksoz parfetman. Me zot pa ti merit vin sitan okipe dan bann zafer personnel ki zot met bann souvenir lo tou sa ki Zeova ti fer dekote. Zot ti bezwen gard zot souvenir vivan konsernan zot delivrans par Zeova ler son lanz ti touy tou premye ne Lezip osi byen ler Zeova ti ouver Lanmer Rouz e apre ferm li, ki ti noy Faraon ek son larme. Bann Izraelit ti bezwen rapel ki Bondye ti donn zot son Lalwa kot Montanny Sinai e ki i ti diriz zot atraver dezer ziska Later Promiz. Zot pa ti devret oubliye dan en sans ki souvenir sa bann keksoz ti bezwen kontinyen annan en lefe profon lo zot lavi toulezour.—Det. 4:9, 10; 8:10-18; Egz. 12:24-27; Pson. 136:15.

Nou osi nou devret fer atansyon pour pa oubliye. Anmezir ki nou fer fas avek bann presyon lavi, nou bezwen mazin Zeova, gard antet sa kalite Bondye ki i ete ek lanmour ki i’n manifeste par donn son Garson, ki ti fourni en ranson pour nou pese afen ki nou kapab ganny lavi parfe pour touzour. (Pson. 103:2, 8; 106:7, 13; Zan 3:16; Rom. 6:23) Par lir Labib regilyerman e partisip aktivman dan bann renyon kongregasyon e dan predikasyon pou gard sa bann laverite presye vivan dan nou.

Ler nou fer fas avek bann desizyon, gro oubyen pti, rapel sa bann laverite esansyel, e les zot enfliyans ou panse. Pa oubliye. Rod gidans Zeova. Olye get keksoz senpleman lo en pwenn-vi imen oubyen met konfyans dan en lide ki’n pas dan en leker enparfe, demann ou lekor, ‘Ki konsey oubyen prensip dan Parol Bondye ki devret annan en lefe lo mon desizyon?’ (Prov. 3:5-7; 28:26) Ou pa kapab rapel keksoz ki ou pa’n zanmen lir oubyen antann. Me anmezir ki ou agrandi dan konnesans egzakt e ou lanmour pour Zeova, sa kantite konnesans ki lespri Bondye i kapab ed ou pour rapel pou ogmante, e ou lanmour pour Zeova ki pe kontinyelman grandi pou motiv ou pour azir an armoni avek sa ki ou’n aprann.