Fer Zefor pour lir byen

BANN zannimo pa kapab lir parey ou pe fer la konmela. En dimoun dan tou le 6 dimoun pa’n aprann lir—souvan i akoz zot pa’n ganny loportinite pour al lekol—parmi sa bann ki’n al lekol, bokou pa lir regilyerman. Pourtan, ou abilite pour lir bann liv i permet ou par sa mwayen pour vwayaze dan lezot pei, rankontre dimoun ki zot lavi i kapab anrisir sa ki pour ou, e ganny konnesans pratik ki pou ed ou fer fas avek bann lenkyetid lavi.

Abilite pour lir i annan en lefe lo lakantite ki en zenn i benefisye pandan son letan lekol. Ler i rod en travay, son abilite pour lir i kapab enfliyans kalite travay ki i kapab gannyen ek lakantite letan ki i bezwen travay pour ganny lavi. Bann madanm ki pa travay e ki lir byen i pli byen kapab pran swen avek zot fanmiy an sa ki konsern nouritir apropriye, lizyenn, ek prevansyon maladi. Bann manman ki lir byen i osi kapab egzers en tre bon lenfliyans lo devlopman entelektyel zot zanfan.

Sirman, pli gran benefis ki lektir i anmennen, se ki i kapab ed ou pour “trouv konnesans Bondye.” (Prov. 2:5) Dan diferan laspe nou servis pour Zeova, nou bezwen lir. Labib ek bann piblikasyon baze lo Labib i ganny lir dan bann renyon kongregasyon. Ou lefikasite dan predikasyon i depan bokou lo lafason ki ou lir. E nou bezwen lir pour prepar pour sa bann aktivite. Se pour sa rezon ki ou progre spirityel i depan bokou lo ou labitid lir.

Itiliz byen sa Loportinite

Serten ki pe aprann semen Zeova in annan en pti gin ledikasyon. Kekfwa zot bezwen aprann konn lir pour zot kapab progrese spirityelman. Oubyen petet zot bezwen lasistans personnel pour amelyor zot abilite pour lir. Kot i annan en bezwen lokal, bann kongregasyon i esey organiz bann laklas pour konn lir e ekrir ki baze lo piblikasyon Appliquez-vous à la lecture et à l’écriture. Plizyer milye in benefisye bokou atraver sa dispozisyon. Vi ki byen konn lir i enportan, serten kongregasyon i organiz bann laklas anmenmtan avek Lekol Minister Teokratik pour amelyor lektir. Menm si sa bann laklas pa disponib, en dimoun i kapab fer bokou progre par pran enpe letan sak zour pour lir aotvwa e par regilyerman asiste e partisip dan lekol.

I malere, ki bann liv kartoun, televizyon ek lezot keksoz, in fer bokou dimoun negliz lektir. Get televizyon e en pti gin letan lektir i kapab retard progre en dimoun dan son abilite pour lir e reflesir e rezonn klerman e pour eksprim son lekor byen.

Bann piblikasyon ki ed nou pour konpran Labib i ganny fourni par “lesklav fidel e pridan.” Sa bann piblikasyon i fer disponib en abondans lenformasyon konsernan bann keksoz spirityel ki esansyel. (Mat. 24:45, NW; 1 Kor. 2:12, 13) Zot osi gard nou azour avek bann deroulman enportan dan lemonn ek zot sinifikasyon, zot ed nou pour konn pli byen lanatir, e montre nou konman pour fer fas avek bann problenm lavi toulezour. Pli enportan, zot konsantre lo konman pour servi Bondye dan en fason akseptab e ganny son laprouvasyon. Sa bann bon lenformasyon pou ed ou devlope konman en dimoun spirityel.

Byensir, benefis pa zis vin akoz nou konn lir byen. Sa abilite pour lir i bezwen ganny servi dan fason apropriye. Parey manze, ou bezwen swazir sa ki ou lir. Eski i fer sans pour manz bann manze ki pa ofer okenn vre valer nourisan oubyen ki menm kapab anpwazonn ou? Pareyman, eski i bon pour ou lir, kantmenm an bref, bann lenformasyon ki kapab annan en move lenfliyans lo ou lespri ek leker? Se bann prensip Labib ki devret ed nou pour determinen ki kalite lenformasyon ki nou swazir pour lir. Avan deside ki ou pou lir, mazin bann tel verse parey Eklezyast 12:12, 13; Efezyen 4:22-24; 5:3, 4; Filipyen 4:8; Kolosyen 2:8; 1 Zan 2:15-17; ek 2 Zan 10.

Lir avek bon Motif

Lenportans pour lir avek bon motif i evidan ler nou egzamin bann resi dan Levanzil. Par egzanp, dan Levanzil Matye, nou trouv Zezi pe demann bann sef relizye ki ti byen konn Lekritir bann kestyon parey “Zanmen zot in deza lir” e “Zot pa’n lir” avan ki i ti donn zot larepons Biblik anver zot bann kestyon rize. (Mat. 12:3, 5; 19:4; 21:16, 42; 22:31) En leson ki nou aprann atraver sa, se ki si ler nou pe lir nou napa en bon motif, nou kapab fer bann konklizyon ki pa korek oubyen mank konpletman sa pwen dan sa lektir. Bann Farizyen ti pe lir Lekritir parski zot ti panse ki par sa mwayen, zot ti pou ganny lavi eternel. Sa rekonpans, parey Zezi ti fer resorti, pa ti pou ganny akorde avek sa bann ki pa kontan Bondye e ki pa aksepte Son mwayen delivrans. (Zan 5:39-43) Lentansyon bann Farizyen ti egois; an rezilta, bokou zot konklizyon ti mal.

Lanmour pour Zeova i motif pli pir ki nou kapab annan pour lir son Parol. En tel lanmour i ankouraz nou pour aprann lavolonte Bondye, akoz lanmour i “rezoui dan laverite.” (1 Kor. 13:6) Menm si dan lepase nou pa ti kontan lir, kontan Zeova ‘avek tou nou lespri’ pou motiv nou pour konsantre bokou pour pran konnesans Bondye. (Mat. 22:37) Lanmour i evey lentere, e lentere i stimil lanvi pour aprann.

Tenir Kont Vites ki ou lir

Lir i al ansanm avek abilite pour rekonnet. Menm la konmela ki ou pe lir, ou pe rekonnet bann mo e rapel zot sinifikasyon. Ou kapab lir pli vit si ou kapab ogmant lakantite lenformasyon ki ou rekonnet. Olye arete pour get sak mo, esey vwar detrwa mo alafwa. Anmezir ki ou devlop sa abilite, ou pou remarke ki ou konpran pli byen sa ki ou pe lir.

Sepandan, ler ou pe lir lenformasyon ki pli oprofon, servi en lot metod i kapab pli prodiktif. Zeova ti konsey Zozye konsernan son lektir lo Lekritir, an dizan: “Sa liv lalwa pa devret elwanny avek ou labous, e ou devret lir li lavwa ba.” (Zoz. 1:8) Koz lavwa ba i souvan ganny fer ler en dimoun pe medite. Alor, sa term Ebre ki ganny tradwir “lir lavwa ba” i osi ganny tradwir “medite.” (Pson. 63:6; 77:12; 143:5) Ler en dimoun pe medite, i reflesir oprofon; i pran son letan. Lir e anmenmtan reflesir oprofon i permet Parol Bondye annan en pli gran lefe lo lespri ek leker. Labib i kontyen profesi, konsey, bann proverb, poenm, bann deklarasyon zizman divin, bann detay konsernan plan Zeova, ek bokou resi lo lavi dimoun pour nou prop legzanp—tousala i annan valer pour sa bann ki anvi mars dan bann fason Zeova. Pa i anmenn benefis pour lir Parol Bondye dan en fason ki permet li fer en lenpresyon profon lo ou lespri ek leker!

Aprann konsantre

Anmezir ki ou lir, met ou lekor dan sak senn ki pe ganny dekrir. Esey vwar sa bann diferan personnaz dan ou lespri, e imazin santiman ki enplike dan sa bann leksperyans ki pe arive dan zot lavi. Sa i ase fasil ler ou pe lir en resi parey sa enn lo David ek Golyat, ki ganny rikorde dan 1 Samyel sapit 17. Me menm bann detay dan Egzod ek Levitik konsernan konstriksyon tabernak oubyen lenstalasyon laranzman bann pret pou vin enteresan e pli reel ler ou imazin bann dimansyon ek bann materyo oubyen imazin loder lansan, lagrenn ki’n ganny roti, ek bann zannimo ki ti pe ganny prezante konman bann lofrann brile. Mazinen konman ki i ti devret enpresyonan pour akonpli bann servis pret! (Lik 1:8-10) Enplik ou bann sans ek ou bann santiman dan sa fason pou ed ou konpran sinifikasyon sa ki ou pe lir e pou ed ou rapel.

Si ou pa lir avek latansyon, ou kapab perdi konsantrasyon. Ou lizye i kapab pe get paz, me ou bann panse i kapab en lot landrwa. Eski lanmizik pe zwe? Eski televizyon i onn? Eski lezot manm fanmiy pe koze? I pli meyer pour lir dan en landrwa trankil, si i posib. Sepandan, distraksyon i kapab sorti dan nou menm. Petet ou’n pas en lazournen ki ti byen sarze. Pa i fasil pour reviv bann aktivite lazournen dan ou lespri! Byensir, i bon pour repas lo bann levennman lazournen—me pa ler ki ou pe lir. Petet ou’n konmans avek en lespri konsantre, oubyen ou kapab konmans ou lektir avek en lapriyer. Me anmezir ki ou lir ou lespri i konmans perdi konsantrasyon. Esey ankor. Disiplin ou lekor pour gard ou lespri fikse lo lenformasyon ki ou pe lir. Gradyelman, ou pou vwar amelyorasyon.

Ki ou pou fer ler ou ariv lo en mo ki ou pa konpran? Serten mo ki pa familye i kapab ganny eksplike oubyen diskite dan sa lartik. Oubyen ou kapab detekte son sinifikasyon dapre son konteks. Si i pa leka, pran letan pour get sa mo dan en diksyonner si i disponib, oubyen not sa mo afen ki ou kapab demann en dimoun son sinifikasyon plitar. Sa pou agrandi ou vokabiler e kontribye anver ou konpreansyon lekritir.

Lektir an Piblik

Ler zapot Pol ti dir Timote pour pas son letan dan lektir, Pol ti pe spesifikman refer avek lektir ki lezot ti pou benefisye avek. (1 Tim. 4:13) Pour en lektir piblik atenn son bi i demann plis ki senpleman lir bann mo aotvwa lo en papye. Sa lekter i bezwen konpran sinifikasyon bann mo e ganny sa bann panse ki zot fer resorti. Se selman ler i fer sa ki i kapab transmet bann lide korekteman e reprodwir bann santiman egzakteman. Sa, byensir, i demann preparasyon profon e repetisyon. Se pour sa rezon ki, Pol ti enplore: “Pas ou letan dan lektir an piblik.” Ou pou resevwar formasyon presye dan sa abilite dan Lekol Minister Teokratik.

Fer Letan pour lir

“Bann plan sa enn ki devoue i sertennman diriz ver lavantaz, me tou dimoun ki presipite i sertennman tonm dan bezwen.” (Prov. 21:5) Pa sa i vre an relasyon avek nou dezir pour lir! Pour ganny sa “lavantaz,” nou bezwen fer bokou zefor pour organiz nou letan afen ki lezot aktivite pa etouf nou letan pour lir.

Kan ki ou lir? Eski ou benefisye par lir granmaten? Oubyen eski ou pli atantif plitar dan lazournen? Si ou kapab met dekote menm 15 ou 20 minit pour enpe lektir sak zour, ou pou etonnen lakantite ki ou kapab akonpli. Lakle se regilarite.

Akoz ki Zeova in swazir pour fer son gran plan ganny ekrir dan en liv? Afen ki dimoun i kapab konsilte son Parol. Sa i permet zot pour egzamin bann travay merveye Zeova, pour rakont sa avek zot zanfan, e pour met an memwar bann aktivite Bondye. (Pson. 78:5-7) Nou lapresyasyon pour zenerozite Zeova dan sa domenn i pli byen ganny demontre par lafason ki nou travay dir pour lir son Parol ki donn lavi.