Ansenny bann ki ganny difikilte pour lir
1. Ki defi nou kapab rankontre dan predikasyon?
1 Kan nou partisip dan predikasyon, parfwa nou rankontre bann dimoun ki ganny difikilte pour lir. I en defi pour nou ansenny sa bann dimoun laverite. Ki nou kapab fer?
2. Ki mannyer e akoz nou devret akord dinyite bann dimoun ki ganny difikilte pour lir?
2 Respekte zot dinyite: Pour Zeova, pa ledikasyon en dimoun ki konte me son kondisyon leker. (1 Sam. 16:7; Prov. 21:2) Alor, nou pa devret mepriz sa bann dimoun ki ganny difikilte pour lir. Sa bann dimoun pour pli pare pour aksepte nou led si nou demontre pasyans ek respe pour zot. (1 Pyer 3:15) Sa i enkli ki nou pa ensiste pour fer sa dimoun lir en teks oubyen en paragraf. Anmezir ki en dimoun i aprann plis lo sa laverite presye ki dan Labib, sa i kapab ogmant son dezir pour li amelyor son abilite pour lir e eksperyans sa lazwa ki nou gannyen kan nou lir Parol Bondye “avwabas lizour e aswar.”—Ps. 1:2, 3.
3.Ki bann metod lansennyman ki kapab ganny servi pour ansenny bann ki ganny difikilte pour lir?
3 Diferan metod pour ansenny bann etidyan Labib: Servi portre i en metod remarkab pour ansennyen e i ed dimoun pour rapel sa ki zot aprann. Ou kapab demann sa etidyan ki i vwar lo sa portre dan sa liv ki ou pe servi. Apre servi bann kestyon spesifik pour ed li konpran kwa ki sa portre i ansennyen. Servi bann verse ki ansenny bann pwen ki ou anvi fer resorti dan sa portre. Sa portre i osi kapab ganny servi pour reviz sa leson. Pa kouver tro bokou lenformasyon a la fwa. Met lanfaz lo tenm ek bann pwen prensipal dan sa leson e evite entrodwir lenformasyon ki pa enkli dan sa piblikasyon. Lir bann verse direkteman dan Labib e servi kestyon pour fer sir ki sa etidyan in konpran sa ki’n ganny lir. Sa i kapab ogmant son dezir pour amelyor son abilite pour lir pour ki i kapab rod plis laverite dan Labib lo li menm.
4. Ki mannyer nou kapab ed nou etidyan pour amelyor son abilite pour lir?
4 Led pour aprann lir: Dimoun ki ganny difikilte pour lir oubyen ki pa’n ganny sa loportinite pour aprann lir byen, i kapab annan sa abilite pour konpran e anmas lenformasyon tre byen. Ou kapab ankouraz sa bann dimoun pour servi lanrezistreman nou bann piblikasyon ki disponib. Kan i ekout atantivman sa dimoun ki pe lir anmezir ki i swiv lo son kopi personnel e repet sa bann mo avwabas, sa pou ed sa dimoun amelyor son abilite pour lir. I kapab osi vwar sa brosir Apply Yourself to Reading and Writing itil. Dan serten pei, bann ansyen i kapab osi organiz en laklas pour aprann lir dan kongregasyon. Sa bann sizesyon pratik i kapab ed nou pour asiste bann ki ganny difikilte pour lir pour konpran “Lekritir sakre,” ki pou permet zot vin saz pour ganny delivrans.—2 Tim. 3:15.