Konman pour ed bann ki pa kapab lir byen?
1. Ki defi nou gannyen pour etidye Labib avek bann ki pa konn lir byen?
1 Bann met lakour ki pa kapab lir byen i kapab enterese avek bann keksoz spirityel, me petet zot per pour ouver Labib ek lezot liv. I kapab napa gran rezilta si nou donn zot sa liv Ki Labib i dir? sirtou ler nou fek zwenn zot. Ki mannyer nou kapab ed spirityelman bann dimoun ki pa konn lir oubyen ki pa konn lir byen? Nou’n demann bann proklanmater dan plis ki 20 diferan pei sa ki zot fer. La zot bann sizesyon.
2. Ki piblikasyon ki disponib pour ed en dimoun ki pa kapab lir byen?
2 Si sa etidyan i kapab lir en pe oubyen i pa kapab lir ditou, ou kapab konmans avek sa brosir Listen to God oubyen Ekout Bondye e viv pour touzour. En pionye sorti Leta-z-ini i montre en dimoun tou le de brosir e demann li lekel ki i pli konfortab avek. Biro brans Kenya i dir ki sa bann brosir in vin en gran led pour zot akoz dapre kiltir Afriken, dimoun i ganny ansennyen par rakont bann zistwar olye bann diskisyon kestyon ek larepons. Pour bann dimoun ki byen edike i kapab fasil pour zot aksepte pour lir e reponn kestyon, me pour en dimoun ki napa bokou ledikasyon i kapab anbarasan pour servi sa metod. Si sa etidyan i annan en serten abilite pour lir, bokou proklanmater i kontan pour konmans avek sa brosir Bon nouvel sorti kot Bondye!, Ou Kapab Vin Zanmi Bondye! oubyen petet sa liv Mon Liv Zistwar Labib.
3. Ki nou devret konnen konsernan bann ki pa kapab lir ki pou ed nou pour ansenny zot dan en fason efikas?
3 Felisite: Sa bann ki pa’n aprann lir i kapab santi zot anbarase e zot mank konfyans dan zot lekor. Ler nou ed zot pour santi zot alez, sa i premye pa pour ansenny zot laverite. Bokou dimoun ki pa kapab lir i entelizan e i kapab aprann. Demontre respe anver zot e tret zot avek dinyite. (1 Pyer 3:15, 16) Zot pou ganny pouse pour kontinyen zot letid si zot santi ki zot zefor i vo lapenn e ki zot pe progrese spirityelman. Alor felisit zot en kantite.
4. Ki mannyer nou kapab ed bann ki napa bokou abilite pour lir pour prepar zot letid?
4 Menm si sa etidyan napa bokou abilite pour lir, ankouraz li pour prepar son letid. Serten proklanmater Sidafrik i ankouraz zot etidyan pour demann en manm fanmir oubyen zanmi ki konn lir pour ed zot. En proklanmater Langleter i ed son bann etidyan prepare par les zot swiv detrwa paragraf dan son liv pandan letid pour ki zot kapab vwar ki i pli fasil pour rod larepons ler i’n fini ganny soulinyen. En frer Lenn i ankouraz son bann etidyan pour gete e medit davans lo bann portre dan sa leson pour lot semenn.
5. Ki mannyer nou kapab annan pasyans ler nou pe kondwir sa letid?
5 Annan pasyans: Nenport piblikasyon ou pe servi, konsantre lo sa pwen prensipal e ed ou etidyan pour konpran zot pli byen. O konmansman, i pli bon fer bann diskisyon 10 a 15 minit. Pa bezwen kouver tro bokou lenformasyon, petet fer zis detrwa paragraf. Annan pasyans si sa etidyan i lir lantman. I pou ganny pouse pour amelyor son abilite pour lir anmezir ki i devlop lapresyasyon pour Zeova. Pour ed ou etidyan fer sa, i pou pli byen envit li pour asiste bann renyon depi o konmansman.
6. Ki mannyer nou kapab ed nou etidyan pour aprann lir?
6 Si en etidyan Labib i aprann lir, i pou progrese spirityelman pli vitman. (Ps. 1:1-3) Bokou in ed zot etidyan par servi sa piblikasyon Apply Yourself to Reading and Writing a lafen sak letid. Si sa etidyan i konmans dekouraze, petet ou kapab ed li pour annan plis konfidans par rapel li bann keksoz ki i’n aprann pour fer ziska aprezan. Asir li ki Zeova pou beni son zefor e ankouraz li pour priye pour ganny led. (Prov. 16:3; 1 Zan 5:14, 15) Serten proklanmater Langleter i ankouraz zot bann etidyan pour annan bann lobzektif rezonnab ki pou ed zot progrese, petet par premyerman mazin bann let alfabet, apre rod e lir serten verse Labib e finalman lir bann piblikasyon senp ki eksplik Labib. Ed dimoun pour aprann lir i souvan enkli pous zot pour anvi fer li, me pa zis ansenny zot konman pour fer li.
7. Akoz nou pa devret ezite pour partaz laverite avek bann ki annan difikilte pour lir?
7 Zeova pa tret bann ki napa bokou ledikasyon konman enferyer. (Zob 34:19) Se leker sa dimoun ki Zeova i egzaminen. (1 Kron. 28:9) Alor pa ezite partaz laverite avek bann ki pa kapab lir byen. I annan diferan zouti ou kapab servi pour konmanse. Apre sa, ou kapab al dan liv Ki Labib i dir? e donn zot en pli meyer konprenezon lo Labib.
[Ekstre lo paz 6]
Sa bann ki pa’n aprann pour lir i kapab santi zot anbarase e mank konfyans dan zot lekor. Ler nou ed zot pour santi zot alez sa i premye pa pour ansenny zot laverite
[Bwat lo paz 6]
Si sa met lakour pa konn lir, esey sa:
• O konmansman servi sa brosir Listen to God, Ekout Bondye e viv pour touzour oubyen en lot piblikasyon ki apropriye.
• Tret li avek dinyite e felisit li en kantite.
• Fer bann pti diskisyon e pa kouver tro bokou lenformasyon.
• Ed li devlop son abilite pour lir.
Anmezir ki i demontre lapresyasyon pour laverite ek sa lanvi pour aprann, ou kapab al dan liv Ki Labib i dir?