Progranm pour devlop Abilite konman en Orater ek en Ansennyan

KI SWA ou zenn oubyen aze, zonm ou fanm, sa kour i kapab ed ou pour pli byen eksprim ou lekor e vin en ansennyan Parol Bondye pli kalifye.

Se sirveyan lekol ki pou donn bann ekspoze avek bann zelev dan Lekol Minister Teokratik. Lo sa trwa paz ki swiv, ou pou vwar ou form konsey personnel. Bann nimero avan sak diferan pwen i koresponn avek letid lo bann paz ki swiv. Dan sa bann letid i annan leksplikasyon, ki pou ed ou konnen kwa ki enplike pour byen servi sa bann diferan laspe koze e ansennyen e akoz sak pwen i enportan. Ou pou osi trouv lenstriksyon itil lo konman pour akonpli sa ki pe ganny sizere.

Bann diferan kouler lo form konsey i endik bann pwen ki aplik avek kalite ekspoze ki ou’n gannyen (1) en lektir avek lodyans, (2) en demonstrasyon avek de oubyen plizyer dimoun, ouswa (3) en diskour avek kongregasyon. Sirveyan lekol pou endik pwen ki ou pou travay lo la. I pli meyer pour travay lo zis en pwen alafwa. Si ou fer bann legzersis ki’n ganny sizere alafen sak letid ki ou’n gannyen pour travay lo la, ou pou retir bokou benefis. Si ou montre levidans ki ou’n byen aplik sa konsey dan sa letid ki ou’n gannyen pour travay, sa frer ki pe donn konsey pou donn ou en lot pwen.

Si ou partisipasyon i enplik fer en demonstrasyon, ou pou bezwen en senn. Lo paz 82 i annan en lalis diferan senn, me ou pa ganny restrikte avek sa lalis. Sa frer ki pe donn konsey i kapab sizere ki ou esey en serten senn pour kapab ganny leksperyans, oubyen i kapab les ou swazir.

Si ou lir sa liv e fer bann legzersis menm si ou pa pe prepar pour bann ekspoze lekol sa i kapab kontribye bokou pour ou progrese. Petet ou kapab kouver apepre en letid diferan sak semenn.

San pran an konsiderasyon lakantite letan ki ou pe partisip dan lekol oubyen dan predikasyon, ou kapab kontinyen amelyore. Fotespere ki ou benefisye plennman avek ledikasyon ki ganny fourni atraver Lekol Minister Teokratik.