Lir korekteman

LABIB i dir ki i lavolonte Bondye ki tou kalite dimoun i “ganny konnesans [egzakt, NW] laverite.” (1 Tim. 2:4) An akor avek sa, ler nou lir Labib aotvwa, lafason ki nou lir i devret ganny enfliyanse par nou dezir pour transmet konnesans egzakt.

Abilite pour lir Labib aotvwa ek bann piblikasyon ki eksplik Labib i enportan pour bann zenn osi byen ki pour bann aze. Konman bann Temwen Zeova, nou annan en responsabilite pour partaz avek lezot konnesans lo Zeova e lo sa ki i kontan. Sa i souvan enplik lir avek en dimoun oubyen avek en pti group. Nou osi fer bann lektir an fanmiy. Dan Lekol Minister Teokratik, i annan loportinite apropriye pour frer ek ser, zenn ek aze, pour resevwar konsey avek bi pour amelyor zot lektir aotvwa.

Lir Labib an piblik, ki swa avek en dimoun oubyen avek en kongregasyon, i en keksoz ki devret ganny pran oserye. Labib i enspire par Bondye. Deplis, “parol Bondye i vivan e i annan pisans. . . . I arive desifre tou dezir ek sekre leker imen.” (Ebr. 4:12) Parol Bondye i kontyen konnesans ki ekstrememan itil e ki pa disponib dan okenn lezot sours. I kapab ed en dimoun konn sa sel vre Bondye e devlop en bon relasyon avek li, osi byen pour reisi fer fas avek bann problenm lavi. I eksplik semen ver lavi eternel dan nouvo monn Bondye. Alor nou lobzektif i devret pour lir Labib pli byen ki nou kapab.—Pson. 119:140; Zer. 26:2.

Konman pour lir korekteman. I annan plizyer laspe ki enplike dan en bon lektir, e premye pa se pour kapab lir san fer okenn fot. Sa i vedir esey lir bann mo egzakteman parey zot in ganny ekrir lo papye. Fer atansyon pour pa sot bann mo, pa manke pour pronons bann let alafen en mo, oubyen mal lir bann mo akoz zot preski parey avek en lot mo.

Pour kapab lir korekteman, ou bezwen konpran sa ki vin avan oubyen apre. Sa pou demann bokou latansyon dan preparasyon. Avek letan, anmezir ki ou devlop abilite pour get devan e konsider direksyon lansanm bann panse, ou pou kapab fer bann lektir san ki ou fer okenn fot.

Ponktyasyon ek bann pti siny parlao bann let parey bann aksan i bann eleman enportan dan langaz ekrir. Ponktyasyon i kapab endik ou kote pour fer poz, ki kantite letan pour poz, e posibleman nesesite pour sanz ton lavwa. Dan serten langaz, si ou pa sanz ton lavwa kot i ganny demande par ponktyasyon sa i kapab fer en kestyon vin konman en deklarasyon, oubyen i kapab sanz konpletman son sans. Parler, rol ponktyasyon i plizoumwen pour respekte lareg granmer. Dan bokou langaz i enposib pour lir korekteman san fer atansyon bann pti siny parlao bann let—ki swa sa bann ki’n ganny ekrir oubyen sa bann ki ganny konpran dapre konteks. Sa bann pti siny parey bann aksan i kapab sanz son sa let oubyen sa group let. Fer sir pour vin familye avek lafason ki ponktyasyon ek bann aksan ek lezot siny i ganny servi dan ou langaz. Sa i obligatwar pour kapab lir dan en fason ki fer sans. Mazinen ki ou lobzektif i devret pour transmet bann lide, pa senpleman pour dir bann mo.

I demann repetisyon pour ou kapab devlop abilite pour lir korekteman. Lir zis en paragraf, e apre lir li ankor e ankor ziska ki ou lir li san fer okenn fot. Apre al lo lot paragraf. Finalman, esey lir detrwa paz san sote, repete, ouswa mal lir okenn mo. Apre ki ou’n pran sa bann pa, demann en dimoun pour ekoute pandan ki ou lir e pour fer resorti okenn fot ki ou fer.

Dan serten landrwa dan lemonn, pa vwar byen kler ek napa ase lalimyer i kontribye pour fer lektir difisil. Si i posib pour amelyor sa bann sitiasyon, amelyorasyon dan lektir pou sirman arive.

Avek letan, bann frer ki lir byen i kapab ganny envite pour partisip dan lektir piblik dan Letid Liv Kongregasyon ek Letid Latour Veyer. Me pour desarz byen en tel privilez, i demann plis ki zis kapab dir bann mo korekteman. Pour vin en lekter piblik efikas dan kongregasyon, ou pou bezwen devlop bann bon labitid dan ou lektir personnel. Sa i enplik byen konpran ki sak mo dan en fraz i zwe en rol. Ou pa kapab inyor serten parmi e anmenmtan konpran klerman sa ki pe ganny dir. Si ou mal lir bann mo, menm ler ou pe lir pour ou menm, sinifikasyon sa fraz i ganny deformen. Ler ou pa pran kont bann siny parlao bann let oubyen konteks dan ki sa bann mo in ganny servi, ou pa pou fer en bon lektir. Fer zefor pour konpran sinifikasyon sak mo dan sa fraz kot zot aparet. Konsider, osi, konman ki ponktyasyon i afekte sinifikasyon sa fraz. Mazinen ki bann panse i ordinerman ganny transmet par bann group mo. Mark zot afen ki ler ou pe lir aotvwa ou lir bann group mo—bann fraz ek morso fraz—olye ki zis bann mo tousel. Byen konpran sa ki ou pe lir i en pa enportan pour kapab transmet konnesans egzakt avek lezot par lektir an piblik.

Se avek en ansyen eksperyanse ki zapot Pol ti ekrir: “fer zefor dan lektir an piblik.” (1 Tim. 4:13, NW) Sa i evidaman en domenn kot nou tou nou pou kapab fer amelyorasyon.