Koz klerman

POUR kapab kominik efektivman, ou devret koz klerman. Sa ki ou anvi dir i kapab enteresan, menm enportan, me si ou bann parol i pa fasil pour konpran i pou perdi bokou lefe.

Dimoun pa ganny motive par parol ki zot pa vreman konpran. Kantmenm en dimoun i annan en lavwa for e kapab ganny antann fasilman, me si bann parol pa tro kler oubyen zot pa ganny pronons byen, zot pa pou motiv lezot pour azir. I parey konmsi ki i ti pe koz dan en langaz etranze, ki lodyans pa konpran. (Zer. 5:15) Labib i rapel nou: “Si sa ki soufle tronpet pa donn en sinyal kler, lekel ki pou prepar li pour al lager? De menm si zot, par sa lalang etranz ki zot koze, zot pa donn en mesaz kler, lekel ki pou konpran? Zot a zis koz dan divan!”—1 Kor. 14:8, 9.

Kwa ki fer Parol pa kler? Petet i akoz ou pa ouver labous ase gran. Bann misk lanmaswar ki pa fleksib ek lalev ki preski pa bouze i kapab kontribye pour touf volim ou lavwa.

Koz tro vit i kapab osi fer li difisil pour byen konpran sa ki ou pe dir. Sa i parey avek zwe en lanrezistreman lavwa pli vit ki normal. Bann parol i la, me laplipar benefis i perdi.

Dan serten ka, koz dan en fason ki pa kler i rezon en defo avek bann lorgann koze. Me menm bann dimoun ki bezwen fer fas avek en tel problenm zot kapab amelyor bokou par aplik sa bann sizesyon dan sa letid.

Sepandan, laplipar-di-tan, lezot pa kapab konpran nou bann parol akoz nou pa pe byen pronons bann mo—kol bann mo ansanm san fer bann pti poz ant bann mo ki fer li difisil pour konpran. Problenm i kapab enplik sot bann silab oubyen bann let enportan oubyen pa pronons lafen bann mo. Ler en dimoun i kol bann mo ansanm san okenn pti poz apre sak mo, bann dimoun ki pe ekoute i kapab konpran serten lide ek fraz me kekfwa lezot fraz zot pou bezwen devinen. Si en dimoun pa pronons klerman bann mo sa i kapab afekte lefikasite son lansennyman.

Ki mannyer pour koz klerman. En keksoz ki byen enportan pour kapab dir bann mo klerman se pour konpran ki mannyer bann mo i ganny aranze dan ou langaz. Dan laplipar langaz, bann mo i ganny konpoze avek silab. Silab i enn oubyen plizyer let ki ganny prononse konman en sel son. Dan bann tel langaz, normalman sak silab i ganny prononse ler ou koze, menm si pa tou ki resevwar menm degre lanfaz. Si ou anvi amelyor ou fason koze pour fer li vin pli kler, ralanti e fer ou mye pour pronons byen sak silab. Okonmansman sa i kapab donn lenpresyon ki ou fason koze i tro presi, me avek legzersis, ou pou gradyelman repran en vites koze ki normal. Pour rezon fasilite koze, i probab ki parfwa ou pou kol bann mo ansanm san fer bann pti poz, me sa i devret ganny evite si i annan okenn danze ki sa bann mo i vin difisil pour konpran.

En not prekosyon: Pour ou kapab koz byen kler e presi, ou kapab egzers koze e lir lo en nivo tre tre presi. Me pa les sa vin ou mannyer koze toulezour. I pou paret artifisyel e pa natirel.

Si ou parol i rezonn konmsi i toufe, aprann tenir ou latet anler, e pous ou manton lwen avek ou pwatrin. Ler ou pe lir dan Labib, tenir li en oter ase o afen ki i demann zis en pti mouvman pour tir ou regar lo lodyans e pour ou get dan Labib. Sa pou permet ou parol sorti san difikilte.

Aprann liber presyon i kapab osi amelyor ou fason koze. I byen koni ki presyon dan bann misk figir oubyen dan bann misk ki kontrol ou respirasyon i kapab annan en move lefe lo nou mannyer koze. En tel presyon i enterfer avek sa laranzman armonye ki devret egziste ant ou lespri, lorgann koze, ek kontrol respirasyon—en fonksyon ki devret ganny fer san okenn lenteripsyon e dan en fason natirel.

Bann misk lanmaswar i bezwen relaks pour reazir fasilman avek lenstriksyon sorti kot laservel. Lalev osi i devret relaks. Zot bezwen pare pour elarzi e kontrakte vitman afen pour met detay final avek sa kantite son ki sorti dan labous ek lagorz. Si lanmaswar ek lalev i pa relaks, labous pa pou ouver byen, e son pou ganny forse atraver ledan. Rezilta se en lavwa ki dir e toufe. Sepandan, relaks lanmaswar ek lalev, i pa vedir koz dan en fason pares. Sa i bezwen ganny balanse avek labitid pour form bann son afen ki ou koz dan en fason ki kler.

Pour ou kapab analiz ou sitiasyon, ou kapab trouv li itil pour lir aotvwa. Obzerv konman ou pe servi lorgann koze ki merveye. Eski ou ouver ou labous ase gran afen ki son i kapab sorti fasilman? Ou bezwen mazinen, ki lalang i pa sel lorgann ki ganny servi pour koze, menm si i sa enn pli okipe. Likou, lanmaswar anba, lalev, bann misk dan figir, ek bann misk dan lagorz zot tou zot zwe en rol. Ler ou koze, eski i paret ki ou pe fer li san okenn mouvman dan ou figir? Si i leka, i annan en bon probabilite ki ou parol i pa kler.

Si en teprikorder i disponib, rikord ou prop lavwa pandan ki ou pe koze dan en fason natirel, parey ler ou pou fer avek en dimoun dan predikasyon. Rikord ou konversasyon pour detrwa minit. Par ekout sa lanrezistreman i kapab ed ou pour dekouver okenn problenm ki ou kapab annan pour fer sorti serten mo kler. Vey bann moman kot ou parol pa kler, toufe, kot ou koup bann mo, e esey determin lakoz. Souvan-d-fwa bann febles i kapab ganny remedye par travay lo bann pwen ki’n ganny diskite pli boner.

Eski ou annan en dezabilite fizik pour koze? Egzers ouver ou labous en pti pe pli gran ki avan e avek plis latansyon esey pronons klerman bann mo. Ranpli ou poumon ler ou pran en lalenn, e koz dousman. An fezan sa in permet bokou ki annan difikilte koze pour koz pli klerman. Si ou annan difikilte pour pronons bann silab, elwanny ou lalang lwen avek ou bann ledan devan ler ou pe pronons son s ek z dan bann mo. Kantmenm ou problenm i kapab pa konpletman ganny rezoud, pa dezespere. Mazinen ki Zeova ti swazir Moiz, en zonm ki ti kapab annan en difikilte pour koze, pour delivre bann mesaz esansyel pour lepep Izrael ek Faraon Lezip. (Egz. 4:10-12) Si ou volonter, i pou servi ou osi, e pou beni ou minister avek sikse.