Lantouzyasm

LANTOUZYASM i ede fer en ekspoze vivan. Menm si i enportan pour devlop en prezantasyon ki transmet bann bon lenformasyon, se en prezantasyon vivan e avek lantouzyasm ki pou ede kaptir latansyon en lodyans. San pran kont ou lorizin kiltirel oubyen personnalite, ou kapab kiltiv lantouzyasm.

Koz avek Santiman. Ler i ti pe koz avek en madanm an Samari, Zezi ti dir ki sa bann ki ador Zeova i devret fer li “an-espri e an verite.” (Zan 4:24) Zot ladorasyon i devret ganny motive par lapresyasyon dan leker, e ki an armoni avek laverite ki trouve dan Parol Bondye. Ler en dimoun i annan en tel profon lapresyasyon, sa pou ganny reflekte dan lafason ki i koze. I pou annan sa lanvi profon pour koz avek lezot konsernan tou sa ki Zeova in prepare avek lanmour pour nou. Son bann lekspresyon lo son figir, son bann zes, ek son lavwa pou reflekte lafason ki i vreman santi.

Alor akoz, ki en orater ki kontan Zeova e ki krwar dan sa ki i pe dir, i kapab pa montre lantouzyasm ler i pe koze? I pa sifi pour li zis prepar sa ki i pe al dir. I bezwen totalman absorbe dan son size, emosyonnelman enplike ladan. Sipoze ki i’n ganny demande pour koz lo sakrifis ranson Zezi Kri. Ler sa orater i prezant son ekspoze, son lespri i devret ranpli, pa senpleman avek bann detay, me avek lapresyasyon pour sa ki sakrifis Zezi i vedir pour li menm sa orater e pour son lodyans. I bezwen rapel bann santiman rekonesan ki li menm i annan pour Zeova Bondye ek Kris Zezi pour sa dispozisyon merveye. I bezwen rapel sa gran loportinite lavi ki ouver pour limanite—boner eternel dan lasante parfe lo en later restore konman en paradi! Alor, i bezwen fer son leker ganny enplike.

Konsernan Ezra, en ansennyan an Izrael, Labib i dir ki i “ti’n prepar son leker pour konsilte lalwa Zeova e pour fer li e pour ansenny [li] . . . an Izrael.” (Ezra 7:10) Si nou fer parey—pa zis prepar lenformasyon me osi nou leker—nou pou koz sa ki sorti dan nou leker. Tel lekspresyon senser lo laverite i kapab kontribye bokou pour ed sa bann ki nou koz avek devlop en vre lanmour pour laverite.

Mazin ou Lodyans. En lot fakter enportan pour demontre lantouzyasm se annan sa konviksyon ki ou lodyans i bezwen antann sa ki ou annan pour dir. Sa i vedir ki ler ou pe prepar ou prezantasyon, ou pa devret selman rasanble bann lenformasyon ki bon me osi priy Zeova pour son gidans pour servi sa lenformasyon pour benefisye sa bann ki ou pe al koz avek. (Pson. 32:8; Mat. 7:7, 8) Analiz akoz ou lodyans i bezwen antann sa lenformasyon, konman i pou benefisye zot, e konman ki ou kapab prezant li dan en serten fason ki zot pou apresye son valer.

Travay lo ou lenformasyon ziska ki ou vreman vwar sa topik byen enteresan. Pa fodre ki sa lenformasyon i nouvo, me ou lapros anver sa topik i kapab nouvo. Si ou prepar en keksoz ki pou vreman ed ou lodyans pour ranforsi zot relasyon avek Zeova, pour apresye son bann laranzman, pour reisi fer fas avek presyon lavi dan sa vye sistenm, oubyen pour vin efikas dan zot minister, alor ou annan tou rezon pour vin antouzyasme konsernan ou ekspoze.

Me si ou ganny demande pour lir an piblik? Afen pour fer sa avek lantouzyasm, i demann plis ki zis kapab dir bann mo korekteman e byen asosye bann mo ansanm. Etidye sa lenformasyon. Si ou pe al lir en porsyon Labib, fer enpe resers lo la. Fer sir ki ou konpran son sinifikasyon debaz. Egzamin konman ki sa lenformasyon i itil pour ou e pour ou lodyans, e lir avek en dezir pour transmet sa avek sa bann ki pe ekout ou.

Eski ou pe prepar pour predikasyon? Reviz topik ki ou pou diskite ek bann verse ki ou deside servi. Konsider, osi, sa ki dan lespri bann dimoun. Ki i annan dan nouvel? Ki bann problenm ki zot pe rankontre? Ler ou pare pour montre dimoun ki Parol Bondye i kontyen bann solisyon pour sa bann problenm ki konsern zot, ou santi ou enpasyan pour fer li, e lantouzyasm i vin natirel.

Montre Lantouzyasm par en Prezantasyon vivan. Lantouzyasm i pli klerman ganny manifeste kan ou prezantasyon i byen vivan. Lekspresyon lo ou figir i devret demontre sa. Ou devret koz dan en fason konvenkan pa dan en ton vantar.

I enportan pour byen zize. Serten i kapab annan tandans pour vin eksite lo tou keksoz. Zot bezwen ganny ede pour realize ki ler en dimoun i vin vantar dan son fason koze oubyen tro emosyonnel, lespri son lodyans pou konsantre lo li olye ki lo sa mesaz. Parkont, sa bann ki timid i bezwen ganny ankouraze pour eksprim zot lekor plis.

Lantouzyasm i kontazye. Si ou annan en bon kontak avek lodyans e ki ou antouzyasme konsernan ou ekspoze, ou lodyans pou santi dan zot sa menm lantouzyasm. Apolos ti vivan dan son koze, e i ti ganny dekrir konman en orater ki ti eksprim li byen. Si ou pouse par lespri Bondye, ou prezantasyon vivan pou pous sa bann ki ekout ou pour azir.—Akt 18:24, 25; Rom. 12:11.

Lantouzyasm apropriye avek Lenformasyon. Fer atansyon pour pa montre lantouzyasm an ekse toudilon ou ekspoze ki kapab fatig ou lodyans. Nenport lankourazman ki ou donnen pour azir lo sa ki pe ganny diskite pou ganny inyore. Sa i fer resorti sa nesesite pour prepar lenformasyon ki permet varyete dan ou prezantasyon. Esey evit fason koze ki donn lenpresyon ki ou pa enterese avek sa topik. Si ou swazir ou lenformasyon avek bokou latansyon, ou pou annan gran lentere ladan. Sirman, serten pwen i demann prezant avek plis lantouzyasm ki lezot, e zot devret byen ganny plase toudilon ou ekspoze.

Sirtou bann pwen prensipal i devret ganny prezante avek lantouzyasm. Dan ou ekspoze i devret annan bann moman for. Vi ki zot bann pwen kle dan ou ekspoze, ordinerman se sa bann pwen ki ganny prepare pour motiv ou lodyans. Apre ki ou’n konvenk ou lodyans, ou bezwen motiv zot, bezwen montre zot bann benefis pour aplik sa ki’n ganny diskite. Ou lantouzyasm pou ed ou pour tous leker ou lodyans. En prezantasyon vivan i devret ganny fer dan en fason natirel. I bezwen annan en rezon pour sa lantouzyasm, e se ou lenformasyon ki pou fourni ou sa rezon.