Lir Verse avek Lanfaz apropriye

LER ou koz avek lezot lo bann plan Bondye, ki swa an prive oubyen lo lestrad, ou diskisyon i devret santre lo sa ki dan Parol Bondye. Sa i souvan enkli lir bann verse dan Labib, ki devret ganny fer dan en bon fason.

Lanfaz apropriye i enplik Santiman. Bann verse i devret ganny lir avek santiman. Konsider serten legzanp. Ler ou lir aotvwa Psonm 37:11, ou lavwa i devret reflekte lazwa konsernan sa lape ki ganny promet dan sa verse. Ler ou lir Revelasyon 21:4 konsernan lafen avek soufrans ek lanmor, ou lavwa i devret reflekte profon lapresyasyon pour soulazman merveye ki pe ganny predir. Revelasyon 18:2, 4, 5, avek son lapel pour sorti dan “Gran Babilonn” ki’n ranpli avek pese i devret ganny lir avek en ton irzan. Byensir, santiman ki ganny eksprimen i devret senser me pa egzazere. Lakantite lemosyon ki apropriye i ganny determinen par konteni sa verse li menm e par lafason ki i pe ganny servi.

Byen swazir Mo ki ganny aksantye. Si ou bann komanter lo en serten verse i baze lo zis en porsyon sa verse, ou devret fer resorti sa porsyon ler ou pe lir sa verse. Par egzanp, ler pe lir Matye 6:33, ou pa devret met premye lanfaz lo “son lazistis” oubyen lo “tou lezot keksoz” si ou anvizaze analiz sa ki i vedir par “rod plito Rwayonm Bondye.”

Dan en diskour dan Renyon Servis, ou kapab deside pour lir Matye 28:19. Ki bann mo ou devret aksantye? Si ou anvi ankouraz pour fer bokou zefor dan konmans letid Labib kot lakour, aksantye “fer” e “disip.” Lo lot kote, si ou deside pour diskit responsabilite Kretyen pour partaz laverite Labib avek en group dimoun etranze oubyen ou anvi ankouraz serten proklanmater pour servi kot i annan en pli gran bezwen, ou kapab aksantye “tou pep.”

Souvan, en verse i ganny prezante konman larepons pour en kestyon oubyen pour siport en largiman ki lezot i vwar konman en deba. Si menm nivo lanfaz i ganny mete lo tou panse ki sa verse i eksprimen, ou lodyans i kapab pa reisi vwar sa konneksyon. Sa pwen i kapab evidan pour ou me pa pour zot.

Par egzanp, ler pe lir Psonm 83:18 dan en Labib ki kontyen non Bondye, si ou met tou lanfaz lo sa lekspresyon “Tre O,” en dimoun dan predikasyon i kapab pa reisi konpran sa fe evidan ki Bondye i annan en non personnel. Ou devret aksantye sa non “Zeova.” Sepandan, ler ou pe servi sa menm verse dan en diskisyon lo souvrennte Zeova, ou devret met lanfaz prensipal lo lekspresyon “Tre O.” Pareyman, ler pe servi Zak 2:24 pour montre lenportans pour asosye lafwa avek aksyon, si ou met lanfaz prensipal lo “zis devan Bondye” olye ki lo “laksyon” i kapab fer serten ki ekout ou mank sa pwen.

En lot legzanp itil i trouve dan Romen 15:7-13. Sa i form parti en let ki ti ganny ekrir par Pol pour en kongregasyon ki ti konpoze par bann non-Zwif ek Zwif. La Pol ti rezonnen ki minister Kris i benefisye pa selman bann Zwif sirkonsi me osi lezot nasyon afen ki “bann non-Zwif, zot osi, zot in kapab rann glwar Bondye pour son labonte.” Apre Pol ti sit kat verse ki atir latansyon lo sa loportinite pour bann non-Zwif. Konman ou devret lir sa bann sitasyon pour ou kapab aksantye pwen ki Pol ti annan antet? Si ou pe mark bann lekspresyon pour aksantye, ou kapab fer en mark lo “bann non-Zwif” dan verse 9, “zot, bann nasyon” dan verse 10, “tou pep” dan verse 11, e “bann nasyon” dan verse 12. Esey lir Romen 15:7-13 e met lanfaz lo sa bann lekspresyon. Kan ou fer sa, largiman konplet Pol pou vin pli kler e pli fasil pour konpran.

Diferan Metod met Lanfaz. Bann mo ki kontyen bann panse ki ou anvi fer resorti i kapab ganny aksantye dan plizyer fason. Sa metod ki ou servi i devret an akor avek sa verse ek senn sa ekspoze. La detrwa sizesyon.

Sanzman lavwa. Sa i enplik nenport sanzman dan lavwa ki fer resorti sa bann mo kle ki kontyen lide enportan avek larestan sa fraz. Lanfaz i kapab ganny akonpli par en sanzman dan volim—swa par ogmant oubyen diminyen volim. Dan bokou langaz, en sanzman dan ton lavwa i azout lanfaz. Sepandan, dan serten langaz, sa i kapab sanz sinifikasyon bann mo konpletman. Ler en vites pli dousman i ganny servi pour bann lekspresyon kle, sa i azout pwa avek bann lekspresyon. Dan bann langaz kot sanzman lavwa pa fer serten mo ganny aksantye, i pou neseser pour fer nenport kwa ki akseptab dan sa langaz pour kapab obtenir en bon rezilta.

Poz. Sa i kapab ganny fer avan oubyen apre ki en dimoun in lir en porsyon kle dan en verse—oubyen tou le de. Fer poz toudswit avan ki ou lir en lide prensipal i kree antisipasyon; fer poz apre i ogmant sa lenpresyon ki ganny fer. Parkont, si i annan tro bokou poz, napa nanryen ki pou evidan.

Repetisyon. Ou kapab met lanfaz lo en serten pwen par arete e relir sa mo oubyen fraz. En metod ki ganny servi pli souvan se pour lir konpletman sa verse e apre repet sa lekspresyon kle.

Zes. Mouvman lekor osi byen ki lekspresyon lo figir i kapab souvan azout lemosyon avek en mo oubyen en fraz.

Ton lavwa. Dan serten langaz, parler bann mo i kapab ganny lir dan en ton ki enfliyans zot sinifikasyon e fer zot evidan. La osi, ou bezwen servi en bon zizman, sirtou ler pour servi parol ironik.

Ler lezot i lir Verse. Ler en dimoun dan predikasyon i lir en verse, i kapab aksantye sa mo ki pa apropriye oubyen pa aksantye nanryen. Ki ou kapab fer dan en tel sitiasyon? Ordinerman i bon pour fer kler ki sa verse i vedir par ou laplikasyon. Apre ki ou’n fer laplikasyon, ou kapab fikse direkteman latansyon spesyal lo mo ki kontyen sa bann panse dan Labib.