Demontre Lentere dan lezot Dimoun

LER nou pe partaz laverite Labib avek lezot, nou bezwen fer plis ki zis met lenformasyon dan zot lespri. Nou devret atir zot leker ver sa lenformasyon. En fason pour fer sa se par montre en lentere senser e personnel dan sa bann ki ekout nou. En tel lentere i kapab ganny demontre dan bokou diferan fason.

Pran an konsiderasyon Pwenn-vi bann ki pe ekoute. Zapot Pol ti pran an konsiderasyon lorizin ek mantalite sa bann ki ti ekout li. I ti eksplike: “Parmi bann Zwif mon fer mwan en Zwif, pour mwan ganny bann Zwif; parmi bann ki anba lalwa, mon soumet mwan anba sa lalwa, menm ki mon pa ti anba lalwa, pour mwan ganny sa bann ki anba lalwa. Demenm parmi bann ki pa konn lalwa, mon ti viv parey bann ki pa konn lalwa, pour mwan ganny sa ki pa konn lalwa. Pourtan mwanmenm, mon obei lalwa Bondye, parski mon soumet mwan anba lalwa Kris. Parmi bann ki feb, mon ti viv konmsi mwan osi mon feb pour mwan ganny zot. Alor mon fer mwan vin tou avek tou dimoun pour mwan sov de-trwa parmi zot par tou mannyer posib. Mon fer tousala pour Levanzil, pour mwan ganny en par dan son bann benediksyon.” (1 Kor. 9:20-23) Ozordi ki mannyer ‘nou fer nou vin tou avek tou dimoun’?

Si avan ler ou konmans koze ou ganny loportinite pour obzerv lezot, menm pour en pti gin letan, ou kapab remark bann keksoz ki endik zot lentere ek sirkonstans. Eski ou kapab dir ki travay zot pe fer? Eski ou vwar levidans zot bann krwayans relizye? Eski i annan en lendikasyon zot sitiasyon fanmiy? Baze lo sa ki ou obzerve, eski ou kapab aziste ou prezantasyon pour fer li pli atiran pour sa bann ki pe ekoute?

Pour fer ou prezantasyon pli atiran ou bezwen byen reflesir davans lo konman ou pou apros dimoun dan ou teritwar. Dan serten landrwa, sa i enkli bann dimoun ki’n sorti dan bann pei etranze. Si bann tel dimoun i reste dan ou teritwar, eski ou’n trouv en fason efikas pour temwanny avek zot? Vi ki i lavolonte Bondye ki “tou [sort kalite, NW] dimoun i ganny sove e ganny konnesans laverite” alor fer li ou lobzektif pour prezant mesaz Rwayonm dan en fason atiran avek tou dimoun ki ou rankontre.—1 Tim. 2:4.

Ekout atantivman. Kantmenm Zeova i kapab konn tou sa ki i anvi konnen, i ekout lezot. Profet Mikaya ti resevwar en vizyon dan ki i ti vwar Zeova pe ankouraz bann lanz pour eksprim zot lide lo konman pour tret en serten zafer. Apre Bondye ti permet en lanz pour met an pratik sa sizesyon ki i ti fer. (1 Rwa. 22:19-22) Avek konpasyon Zeova ti les Abraam eksprim son santiman konsernan zizman ki i ti pou egzekite lo Sodonm. (Zen. 18:23-33) Dan nou minister, konman nou kapab imit legzanp Zeova pour ekout lezot?

Ankouraz lezot pour eksprim zot lekor. Demann en kestyon apropriye, e apre aret koze e donn zot sifizaman letan pour zot reponn. Vreman ekoute. Ou latansyon senser pou ankouraz zot pour koz libreman. Si lafason ki zot reazir i revel serten keksoz konsernan zot lentere, avek swen rod plis lenformasyon. San fer sa konversasyon vin konman en enterogatwar, esey konn zot pli byen. Felisit zot pour partaz zot panse avek ou, si ou kapab fer li senserman. Menm si ou pa dakor avek zot pwenn-vi, avek polites rekonnet sa ki zot in eksprimen.—Kol. 4:6.

Sepandan, nou bezwen fer atansyon ki nou lentere dan lezot dimoun i pa al pli lwen ki konvenab. Ler nou enterese avek lezot sa i pa donn nou drwa pour nou mel dan zot zafer prive. (1 Pyer 4:15) Nou bezwen fer atansyon ki en dimoun sèks opoze pa mal enterpret sa lentere zantiy ki nou demontre. Vi ki nivo lentere ki apropriye e akseptab i varye dan en pei pour en lot, menm avek en dimoun pour en lot, alor en bon zizman i esansyel.—Lik 6:31.

Preparasyon i en bon led pour vin en dimoun ki ekout byen. Ler nou mesaz i kler dan nou lespri, i ed nou pour santi alez e pour port latansyon lo lezot dan en fason natirel. Sa i met zot alez e kapab fer zot pli anvi koz avek nou.

Nou montre loner anver lezot par ekout zot. (Rom. 12:10) Sa i montre ki zot panse ek santiman i annan valer pour nou. I menm kapab fer zot port en pli gran latansyon lo sa ki nou annan pour dir. Avek bon rezon, alor, Parol Bondye i konsey nou pour “pran letan avan koze, avan pran lakoler.”—Zak 1:19.

Ed lezot pour progrese. Lentere pour lezot pou fer nou kontinyen reflesir lo sa bann ki montre lentere e pour revizit zot pour partaz bann laverite Labib ki pou pli direkteman satisfer zot bezwen. Ler ou pe reflesir lo ou retourn vizit, pran an konsiderasyon sa ki ou’n aprann lo zot pandan bann vizit presedan. Prepar lenformasyon lo en topik ki enteres zot. Fer resorti valer pratik sa lenformasyon, ed zot pour vwar konman zot kapab benefisye atraver sa ki zot pe aprann.—Iza. 48:17.

Si sa bann dimoun ki ou pe koz avek i revel en sitiasyon oubyen problenm ki pe trakas zot, vwar sa konman en loportinite spesyal pour partaz sa bon nouvel avek zot. Swiv legzanp Zezi, ki ti toultan pare pour konsol sa bann dan ladetres. (Mark 6:31-34) Reziste sa tantasyon pour ofer en solisyon vitman oubyen pour donn konsey siperfisyel. Sa i kapab fer sa dimoun santi ki ou mank en lentere senser. Plito, montre konpasyon. (1 Pyer 3:8) Alor fer resers dan bann piblikasyon baze lo Labib, e partaz bann lenformasyon itil pour ed sa dimoun fer fas avek son sitiasyon. Byensir, sa lentere marke par lanmour ki ou annan pour sa bann ki ekout ou pou anpes ou revel bann keksoz konfidansyel ki sa dimoun i partaz avek ou, amwen i annan en bon rezon pour fer li.—Prov. 25:9.

Nou devret sirtou montre en lentere personnel avek sa bann ki nou fer letid Labib. Dan lapriyer reflesir lo bezwen sak etidyan, e prepar sa letid avek sa bann bezwen antet. Demann ou lekor, ‘Ki sa dimoun i bezwen fer apre pour kontinyen fer progre spirityel?’ Avek lanmour ed sa etidyan pour apresye sa ki Labib ek bann piblikasyon baze lo Labib ki “lesklav fidel e pridan” i fourni i dir lo sa topik. (Mat. 24:45, NW) Dan serten sirkonstans, petet i pa pou sifi pour zis fourni en leksplikasyon. Petet ou bezwen montre sa etidyan konman pour aplik en serten prensip Labib, annefe fer serten keksoz ansanm ki demontre laplikasyon sa prensip.—Zan 13:1-15.

I neseser mentenir lekilib ek bon zizman ler pe asiste lezot pour anmenn zot lavi an armoni avek bann standar Zeova. Dimoun i sorti dan diferan sirkonstans lavi e annan diferan abilite, e sakenn i fer progre dan zot prop vites. Vin rezonnab dan sa ki ou ekspekte avek lezot. (Fili. 4:5) Pa met presyon lo zot pour fer bann sanzman dan zot lavi. Les Parol Bondye ek son lespri motiv zot. Se avek en leker volonter ki Zeova i anvi dimoun servi li, pa anba presyon. (Pson. 110:3) Evite eksprim ou prop lopinyon lo bann desizyon personnel ki zot fer fas avek, e menm si lezot i demann ou pour fer li, fer atansyon pour pa fer bann desizyon pour zot.—Gal. 6:5.

Donn Lasistans pratik. Menm si Zezi ti prensipalman konsernen avek byennet spirityel sa bann ki ti ekout li, i ti sansib anver zot bann lezot bezwen osi. (Mat. 15:32) Menm si nou napa bokou lo kote materyel, i annan bokou fason pratik kot nou kapab ede.

Lentere dan lezot pou ensit nou pour pran an konsiderasyon zot sitiasyon. Par egzanp, si move tan pe fer sa ki ekout nou santi enkonfortab, al dan en landrwa ki pli konvenab oubyen aranze pour kontiny sa diskisyon en lot ler. Si ou’n vizit zot en moman ki pa konvenab, ofer pour retourn plitar. Si en vwazen oubyen en dimoun ki’n montre lentere i malad oubyen i lopital, montre ou konsern par anvoy li en kart oubyen ekrir detrwa not oubyen par rann li en vizit. Si i apropriye, ou kapab osi fourni en manze senp oubyen serten lezot akt labonte.

Anmezir ki bann etidyan Labib i progrese, zot kapab santi en vid dan zot lavi e sa i kapab afekte zot emosyonnelman akoz aprezan zot pa pe pas otan letan avek bann zanmi ki zot ti annan avan. Fer zanmi avek zot. Pas letan koz avek zot apre zot letid Labib e lo bann lezot moman. Ankouraz zot pour kiltiv bann bon lasosyasyon. (Prov. 13:20) Ed zot pour asiste bann renyon Kretyen. Asiz avek zot dan bann tel rasanbleman, e ed zot avek zot zanfan pour ki zot tou zot kapab benefisye pli plennman avek progranm.

Montre Lentere ki sorti dan Leker. Montre lentere dan dimoun, i pa en teknik pour aprann, me en kalite ki sorti dan leker. Nivo nou lentere dan lezot i evidan dan plizyer fason. I evidan par lafason ki nou ekoute e par sa ki nou dir. I ganny manifeste par labonte ek konsiderasyon ki nou ofer lezot. Menm ler nou pa dir nanryen oubyen fer okenn keksoz, i ganny revele par nou latitid ek lekspresyon lo nou figir. Si nou vreman annan lentere pour lezot, zot pou definitivman kapab dir.

Rezon pli enportan pour montre lentere senser dan lezot se ki ler nou fer sa, nou imit lanmour ek mizerikord nou Papa seles. Sa i ede pou atir sa bann ki ekout nou ver Zeova e anver sa mesaz ki i’n donn nou pour propaze. Alor, ler ou partaz sa bon nouvel, esey kit en lizye pa lo ou “prop lentere, me osi avek lentere lezot.”—Fili. 2:4.