Demontre Respe pour lezot

LEKRITIR i dir nou pour “respekte tou dimoun,” e fodre pa ki nou “malparl personn.” (1 Pyer 2:17; Tit 3:2) An realite, tou imen ki nou’n rankontre in “ganny kree dan resanblans Bondye.” (Zak 3:9) Zezi in mor pour sak dimoun. (Zan 3:16) E zot tou zot merit antann sa bon nouvel pour zot kapab azir e ganny sove. (2 Pyer 3:9) Serten dimoun i merit resevwar respe ek loner spesyal pour rezon bann kalite oubyen lotorite ki zot annan.

Akoz ki serten dimoun i esey rod lekskiz pour zot pa demontre sa kalite respe ki Labib i ankouraze? Kiltir lokal i kapab determinen lekel ki merit loner dapre klas sosyal, kouler, sèks, lasante, laz, larises oubyen pozisyon sosyal. Koripsyon ki komen parmi bann zofisye lotorite in diminyen respe pour lotorite. Dan serten pei dimoun pa satisfe ditou avek zot sitiasyon dan lavi, petet zot bezwen travay pour bokou letan zis pour ganny nesesite debaz, e zot ganny antoure par dimoun ki pa demontre respe. Bann zenn i eksperyans lenfliyans bann kanmarad pour zwenn avek zot pour rebel kont bann ansennyan ki zot pa dakor avek e lezot dimoun dan lotorite. Bokou i ganny enfliyanse par televizyon ki demontre zanfan konman pli malen ki son paran oubyen ki pe domin zot. I demann zefor pour anpes bann tel konsep lemonn sanz nou pwenn-vi pour lezot. Toudmenm, ler nou montre dimoun dinite, sa i kree en latmosfer ki fer pli fasil pour esanz bann lide.

Lapros respektab. Pour en endividi ki pe angaz dan travay relizye, dimoun i ekspekte ki i demontre respe par abiy e azir dan en fason apropriye. Sa ki ganny konsidere konman en konportman apropriye i varye dan en landrwa pour en lot. Pour serten zot vwar li en mank respe pour apros en lot dimoun dan en sapo oubyen en lanmen dan pos. Tandis ki dan en lot landrwa, dimoun i kapab aksepte tel konportman. Pran an konsiderasyon santiman bann dimoun lokal pour pa ofans lezot. An fezan sa i kapab ed ou pour evit bann difikilte pour ou fer konnen sa bon nouvel dan en fason efikas.

Menm keksoz i aplik avek mannyer nou adres lezot, sirtou bann ki aze. Normalman i pa apropriye pour bann zenn apel bann adilt par zot non, amwen ki sa bann zenn i resevwar permisyon pour sa. Dan serten landrwa bann adilt osi i ganny ekspekte pour evite adres bann etranze par zot non. Osi, dan bokou langaz i annan diferan lezot fason pour demontre respe pour en dimoun ki pli vye oubyen ki annan lotorite.

Rekonnet Prezans lezot avek Respe. Dan bann pti kominote i normal ki ou pou rekonnet prezans en dimoun ki ou rankontre swa pandan ki ou pe marse lo semen oubyen ler pe antre dan en landrwa. Sa i ganny akonpli par mwayen en senp lakey, en sourir, en bes latet, oubyen menm lev soursi. Inyor en dimoun i ganny konsidere konman en mank respe.

Kantmenm sa, serten i kapab santi ki zot ganny inyore menm si ou rekonnet zot prezans. Konman i kapab leka? Akoz zot kapab krwar ki ou pa vreman vwar zot konman bann endividi. I komen pour dimoun ganny klasifye dapre serten tre fizik. Dimoun avek bann dezabilite e problenm lasante i souvan ganny evite. Pourtan, Parol Bondye i montre nou konman pour tret bann tel dimoun avek lanmour ek respe. (Mat. 8:2, 3) Nou tou nou ganny afekte dan en serten fason atraver pese ki nou’n erite avek Adan. Eski ou ti a santi ou ganny respekte si lezot i toultan idantifye ou par ou bann defo? Eski ou pa ti a kontan ganny rekonnet par ou bann kalite pozitif?

Respe i osi enplik rekonnet sa enn ki dirize. Dan serten landrwa i neseser pour koz avek sef lakour avan pres avek lezot dan sa lakour. Kantmenm nou demann pour prese e ansennyen i sorti kot Zeova, nou rekonnet ki paran i sa bann ki’n ganny otorize par Bondye pour formen, disiplin, e diriz zot zanfan. (Efe. 6:1-4) An konsekans, ler nou pe vizit en lakour, i normalman apropriye pour koz premyerman avek paran avan angaz zanfan dan okenn gran diskisyon.

Leksperyans lavi ki en dimoun i gannyen anmezir ki i vin vye, i devret ganny respekte. (Zob 32:6, 7) Rekonnet sa ti ed en zenn ser pionye an Sri Lanka ki ti vizit en vye zonm. Okonmansman sa zonm ti obzekte son vizit, an dizan: “Konman ki en zenn parey ou i kapab ansenny mwan Labib?” Me sa ser ti reponn: “An realite, mon pa’n vin pour ansennyen me pour partaz avek ou serten keksoz ki mon’n aprann ki’n fer mwan telman zwaye ki mon bezwen partaz avek lezot.” Larepons respektab sa pionye ti stimil lentere sa zonm. Sa zonm ti azoute “dir mwan alor, ki sa ki ou’n aprann?” Sa ser ti dir li: “Mon’n aprann konman pour viv pour touzour.” Sa zonm aze ti konmans etidye Labib avek bann Temwen Zeova. Pa tou dimoun aze ki pou dir ki zot anvi ganny trete avek en tel respe, me laplipar pou apresye li.

Sepandan, i posib osi ki nou demontre respe pour lezot an ekse. Dan bann zil Pasifik ek lezot landrwa, servi form lakey lokal avek respe ler pe apros vilaz oubyen bann sef tribi i kapab ed bann Temwen pour ganny dimoun pour ekout zot ek en loportinite pour koz swa avek bann sef tribi ek bann dimoun anba zot direksyon. Toudmenm, i pa ni neseser oubyen apropriye pour flate. (Prov. 29:5) Pareyman, granmer serten langaz i permet pour demontre plis respe pour serten, me respe ki Kretyen i demontre i pa enkli servi bann tel mark respe dan en fason egzazere.

Prezant avek Respe. Labib i ankouraz nou pour eksplik rezon pour nou lesperans “avek labonte ek respe.” (1 Pyer 3:16) Alor, kantmenm nou kapab vitman montre bann defo dan pwenn-vi ki en lot dimoun i annan, eski i saz pour fer sa dan en fason ki kapab retir dinite sa dimoun? Eski i pa pour pli bon pour ekout avek pasyans, petet demann li akoz ki i santi sa fason, e apre pran an konsiderasyon son bann santiman ler nou rezonn avek li lo Lekritir?

Sa respe ki ganny demontre avek selman en dimoun i devret osi evidan ler pe adres en lodyans lo lestrad. En orater ki respe son lodyans pa pou kritik zot dan en fason dir oubyen demontre en latitid ki sizere: “Ou ti kapab fer sa si ou ti vreman anvi fer sa.” Koz dan en tel mannyer i zis dekouraz lezot. Pa i pli meyer pour vwar lodyans konman en group dimoun ki kontan Zeova e anvi servi li! An imitan Zezi, nou devret montre konpreansyon ler nou pe azir avek sa bann ki kapab feb spirityelman, mank leksperyans, oubyen pli dousman pour aplik konsey Labib.

Sa lodyans pou santi respe ki sa orater i annan pour zot si i enkli li menm konman enn ki bezwen aplik Parol Bondye pli plennman. Alor, i saz pour evite servi konstaman sa mo “zot” ler pe aplik bann verse. Par egzanp, remark sa diferans ant sa kestyon “Eski zot pe fer tou sa ki zot kapab? ek sa fraz “Sakenn antre nou i devret demann son lekor: ‘Eski mon pe fer tou keksoz ki mon kapab? ’” Sa pwen dan sak kestyon i parey, me sa premye kestyon i montre ki sa orater pa pe met li lo menm nivo avek son lodyans. Sa enn dezyenm i ankouraz sak dimoun, enkli sa orater, pour analiz son prop sitiasyon e son prop motiv.

Reziste sa tantasyon pour fer bann remark anmizan zis pour fer lodyans riye. Sa i retir dinite mesaz Labib. I vre, nou devret pran plezir dan nou servis pour Bondye. I kapab menm annan serten laspe dan nou lenformasyon ki kapab anmizan. Toudmenm, diminyen lenportans bann keksoz serye par fer zot vin bann keksoz ki fer riye i montre en mank respe pour sa lodyans e pour Bondye.

Fotespere ki nou lapros, nou latitid, ek nou parol i toultan demontre ki nou’n arive vwar lezot dimoun lafason ki Zeova in ansennyen pour vwar zot.