Servi byen Led vizyel

AKOZ servi led vizyel dan ou lansennyman? Akoz an fezan sa ou kapab fer ou lansennyman pli efikas. Zeova Bondye ek Zezi Kri ti servi bann led vizyel, e nou kapab imit zot legzanp. Ler bann led vizyel i ganny asosye avek parol, lodyans pou resevwar lenformasyon atraver de sans, vwar e tande. Sa i kapab ede pour mentenir latansyon ou lodyans e pour fer en pli bon lenpresyon. Ki mannyer ou kapab enkli led vizyel ler ou pe prezant sa bon nouvel? Konman ou kapab fer sir ki ou pe servi zot dan en fason efikas?

Konman Zeova ek Zezi ti servi Led vizyel. Zeova ti servi led vizyel ki ti fasil pour rapel e ansenny bann leson enportan avek. En zour swar i ti anmenn Abraam deor e dir: “Get anler, silvouple, ver lesyel e kont bann zetwal, si ou posibleman kapab kont zot. . . . Koumsa ou semans pou vini.” (Zen. 15:5) Menm si sa promes ti paret enposib pour en imen krwar, Abraam ti vreman enpresyonnen e i ti met lafwa dan Zeova. Dan en lot lokazyon, Zeova ti anvoy Zeremi kot lakaz en potye e fer li antre dan latelye sa potye pour get sa zonm kot pe fasonn later. Sa ti vreman en leson inoubliyab konsernan lotorite Kreater lo bann imen! (Zer. 18:1-6) E ki mannyer Yona ti pou kapab oubliy sa leson mizerikord ki Zeova ti ansenny li par mwayen sa plant? (Yona 4:6-11) Zeova ti menm demann son bann profet pour demontre an aksyon son bann mesaz profetik par servi serten lobze apropriye. (1 Rwa. 11:29-32; Zer. 27:1-8; Ezek. 4:1-17) Tabernak ek bann diferan laspe tanp, i bann reprezantasyon ki ed nou konpran bann realite lesyel. (Ebr. 9:9, 23, 24) Bondye ti osi servi bokou vizyon pour transmet lenformasyon enportan.—Ezek. 1:4-28; 8:2-18; Akt 10:9-16; 16:9, 10; Rev. 1:1.

Ki mannyer Zezi ti servi led vizyel? Ler bann Farizyen ek manm parti Erod ti esey pyez li par sa ki i dir, Zezi ti demann en pyes larzan e ti atir latansyon lo figir Sezar lo sa pyes larzan. Apre i ti eksplike ki bann keksoz Sezar i devret ganny peye avek Sezar me ki bann keksoz Bondye i devret ganny peye avek Bondye. (Mat. 22:19-21) Pour ansenny en leson pour onor Bondye avek tou sa ki nou annan, Zezi ti fer resorti sa kontribisyon de pti pyes larzan ki en vev pov ti fer kot tanp, ki ti tou sa ki i ti annan pour viv. (Lik 21:1-4) Dan en lokazyon i ti servi en zanfan ki napa okenn lanbisyon, konman en legzanp pour annan limilite. (Mat. 18:2-6) Li menm ti demontre ki savedir limilite par lav lipye son bann disip.—Zan 13:14.

Diferan Fason pour servi Led vizyel. Kontrerman avek Zeova, nou pa kapab kominik par mwayen bann vizyon. Kantmenm sa, dan bann piblikasyon Temwen Zeova, i annan bokou desen ki stimil mazinasyon. Servi zot pour ed dimoun enterese pour imazin sa Paradi teres, ki ganny promet dan Parol Bondye. Dan en letid Labib kot lakour, ou kapab atir latansyon en etidyan lo en desen ki asosye avek sa ki ou pe etidye e demann li pour rakont sa ki i vwar. I vo lapenn note ki ler profet Amos ti ganny serten vizyon, Zeova ti demande: “Ki ou pe vwar, Amos?” (Amos 7:7, 8; 8:1, 2) Ou kapab demann bann kestyon parey anmezir ki ou diriz latansyon sa dimoun lo bann desen ki’n ganny prepare konman bann led vizyel.

Si ou ekrir bann kalkilasyon matematik oubyen servi en laliny kronolozik ki montre en siksesyon bann levennman enportan, sa i kapab ed dimoun pour konpran pli fasilman bann profesi parey sa “set letan” dan Danyel 4:16 ek sa “swasanndis semenn” dan Danyel 9:24. Bann tel led vizyel i aparet dan plizyer nou bann piblikasyon letid.

Dan ou letid Labib an fanmiy, diskisyon lo bann tel keksoz parey tabernak, tanp an Zerizalenm, ek tanp ki Ezekyel ti vwar dan vizyon i kapab vin pli fasil pour konpran si ou servi en portre oubyen en desen. Zot kapab ganny trouve dan Étude perspicace des Écritures, lenformasyon siplemanter dan Traduction du monde nouveau—avec notes et références ek plizyer nimero Latour Veyer.

Ler ou pe lir Labib avek ou fanmiy, servi byen bann map. Swiv vwayaz Abraam depi Our ziska Arann e apre Betel. Egzamin larout ki Izrael ti pran depi ler ki sa nasyon ti kit Lezip e ti vwayaz ziska Later Promiz. Rod landrwa ki sak tribi Izrael ti gannyen konman en leritaz. Obzerv grander teritwar ki Salomon ti dominen. Tras larout Eliya kan i ti sov Yizreel toudilon ziska dan dezer pli lwen ki Beer-Seba apre ki i ti ganny menase par Zezabel. (1 Rwa. 18:46–19:4) Rod bann lavil ek vilaz kot Zezi ti prese. Swiv vwayaz Pol parey i ganny dekrir dan liv Akt.

Bann led vizyel i itil ler pe ed bann etidyan Labib pour pli byen konpran bann fonksyon kongregasyon. Ou kapab montre ou etidyan en progranm lasanble e eksplik li sa kalite lenformasyon ki nou diskite dan bann diferan lasanble. Bokou in enpresyonnen par vizit en Lasal Rwayonm oubyen en biro brans Temwen Zeova. Sa i kapab en fason efikas pour retir bann move konsepsyon konsernan nou travay ek son lobzektif. Ler ou pe fer vizit Lasal Rwayonm, fer resorti konman ki i diferan avek lezot landrwa ladorasyon. Aksantye ki Lasal Rwayonm i en landrwa modes ki ede promot en latmosfer ki kontribye pour aprann. Fer resorti bann laspe ki’n ganny prepare spesyalman pour nou predikasyon—kontwar piblikasyon, map teritwar, ek bann bwat kontribisyon (kontrerman avek laket).

Ler bann video ki ganny prepare anba direksyon Konsey Direkter i disponib, servi zot pour batir konfyans dan Labib, pour familyariz bann etidyan avek aktivite Temwen Zeova, e pour ankouraz zot pour viv an armoni avek bann prensip Labib.

Servi Led vizyel pour gran Group. Ler i’n ganny byen prepare e byen prezante, led vizyel i kapab vin bann led lansennyman efikas pour bann pli gran group. Bann tel led vizyel i ganny fourni dan diferan laform par lesklav fidel e pridan.

Dan Latour Veyer lenformasyon letid i souvan enkli bann led vizyel dan laform desen ki kapab ganny servi par sa kondikter pour aksantye bann pwen enportan. Sa i osi leka avek bann piblikasyon ki ganny servi dan Letid Liv Kongregasyon.

Serten plan pour bann diskour piblik i kapab permet pour servi bann led vizyel apropriye pour ilistre bann pwen. Sepandan, pli gran dibyen i ganny fer ler latansyon i ganny mete lo sa ki dan Labib, ki laplipar dan lodyans pou annan avek zot. Si, parler en desen oubyen en plan bref lo bann pwen prensipal i neseser pour transmet enn oubyen plizyer pwen prensipal en diskour, verifye davans pour fer sir ki bann ki asiz deryer dan lasal i kapab klerman vwar (oubyen lir) sa led vizyel. Bann tel led vizyel i devret ganny servi avek moderasyon.

Nou lobzektif pour servi led vizyel ler pe koze e ansennyen se pa pour anmiz lodyans. Ler en led vizyel ki apropriye i ganny servi, i devret ranforsi bann lide ki merit lanfaz spesyal. Ler led vizyel i ganny servi pour klarifye parol ki ganny dir, fer li pli fasil pour konpran, oubyen ler zot fourni bann levidans konkret ki sa ki’n ganny dir i vre, zot akonpli en bon lobzektif. Ler zot byen ganny itilize, en led vizyel apropriye i kapab kree en profon lenpresyon, ki fer ki sa led vizyel ek sa lenstriksyon i ganny rapel pour bokou lannen.

Abilite pour antann e pour vwar, zot tou le de zot zwe en rol enportan pour aprann. Rapel konman sa de pli gran Ansennyan in servi sa bann sans, e esey imit zot dan ou zefor ki ou fer pour tous lezot.