Ankourazan e pozitif

SA MESAZ ki nou’n ganny ordonnen pour prese i en bon nouvel. Zezi ti dir: “Me avan, Bonn Nouvel i bezwen ganny anonse avek tou bann nasyon.” (Mark 13:10) Zezi li menm ti etablir legzanp par prezant “Bonn Nouvel konsernan Rwayonm Bondye.” (Lik 4:43) Sa ki bann zapot ti prese ti osi ganny dekrir konman “bon nouvel Bondye” ek “bon nouvel Kris.” (1 Tesa. 2:2, NW; 2 Kor. 2:12, NW) En tel mesaz i ankourazan e pozitif.

An armoni avek deklarasyon sa ‘lanz ki anvole atraver lesyel, avek en bon nouvel eternel’ nou ankouraz dimoun pour: “Donn Bondye loner e rann li glwar.” (Rev. 14:6, 7) Nou dir dimoun partou konsernan sa vre Bondye, son non, son bann kalite merveye, son plan ranpli avek lanmour, nou responsabilite devan li, e sa ki i ekspekte avek nou. Sa bon nouvel i enkli sa fe ki Zeova Bondye pou detri mesan, ki dezonnor li e gat lavi lezot imen. Me i pa nou responsabilite pour ziz bann dimoun ki nou pres avek. Nou dezir senser se ki otan dimoun posib pou reazir favorableman avek mesaz Labib afen ki i pou vin vreman en bon nouvel pour zot.—Prov. 2:20-22; Zan 5:22.

Limit bann Topik negatif. Byensir, i annan bann laspe negatif dan lavi. Nou pa fer konmsi nou pa vwar sa bann keksoz. Pour konmans en konversasyon, ou kapab soulev en problenm ki dan lespri sa bann ki dan ou teritwar e diskit li an bref. Me souvan napa gran valer pour koz bokou lo la. Konstaman dimoun i antann bann nouvel enkyetan, alor koz lo bann keksoz ki pa plezant i kapab fer zot swa ferm zot laport oubyen zot zorey. Byen boner dan ou konversasyon, esey diriz latansyon ver bann laverite rafresisan ki dan Parol Bondye. (Rev. 22:17) Apre, menm si sa dimoun pa anvi kontinyen sa konversasyon, ou pou’n donn li serten keksoz ankourazan pour reflesir lo la. Sa i kapab fer li pli pare pour ekoute dan en lot lokazyon.

Dan menm fason, si ou ganny envite pour donn en diskour, pa noy sa lodyans avek bann lenformasyon negatif zis parski i annan en kantite sa kalite lenformasyon ki disponib. Si en orater i koz pour bokou letan lo fot bann dirizan imen, bann nouvel krim ek vyolans, ek imoralite sokan ki komen, sa i kapab anmenn en lefe dekourazan. Entrodwir bann laspe negatif en topik si zis zot akonpli en bon lobzektif. En pti gin lenformasyon koumsa i kapab met lanfaz ki ou diskour in ariv pandan en moman vreman apropriye. I kapab osi idantifye bann fakter mazer ki kontribye ver en sitiasyon e alor sa i kapab ganny servi pour montre akoz ki solisyon ki Labib i ofer i pratik. Kot i posib, mansyonn bann keksoz presi lo sa pwen, san elabor bokou lo sa problenm.

Ordinerman, i pa ni posib oubyen swetab pour elimin tou lenformasyon negatif dan en diskour. Defi se pour prezant en melanz lenformasyon pozitif ek negatif dan en tel fason ki lefe an zeneral i pozitif. Pour akonpli sa, ou devret determinen kwa ki ou devret enkli oubyen non, e kote ou pou met lanfaz. Dan Sermon lo Montanny, Zezi ti konsey sa bann ki ti pe ekout li pour evite pratik zot devwar parey bann skrib ek Farizyen i fer, e i ti sit detrwa legzanp pour ilistre sa pwen. (Mat. 6:1, 2, 5, 16) Sepandan, olye ki pas letan lo bann legzanp negatif sa bann sef relizye, Zezi ti aksantye lenportans pour konpran bann vre fason Bondye e pour viv an armoni avek zot. (Mat. 6:3, 4, 6-15, 17-34) Sa ti annan en tre gran benefis.

Gard en Fason koze pozitif. Si ou ganny demande pour donn en diskour dan ou kongregasyon konsernan serten laspe aktivite Kretyen, esey konstri olye ki kritike. Fer sir ki ou menm ou pe fer sa keksoz ki ou pe ankouraz lezot pour fer. (Rom. 2:21, 22; Ebr. 13:7) Les lanmour, pa iritasyon, motiv sa ki ou dir. (2 Kor. 2:4) Si ou annan konfyans ki ou bann konpanyon Kretyen i anvi fer plezir Zeova, sa ki ou dir pou reflekte sa konfyans, e sa pou annan en lefe benefik. Remarke konman zapot Pol ti eksprim tel konfyans, parey i rikorde dan 1 Tesalonisyen 4:1-12; 2 Tesalonisyen 3:4, 5; ek Filemon 4, 8-14, 21.

Parler i neseser pour bann ansyen averti kont bann kondwit ki pa saz. Me limilite pou ed zot azir avek zot frer avek en lespri douser. (Gal. 6:1) Lafason ki bann keksoz i ganny dir i devret montre ki bann ansyen i annan respe pour bann manm kongregasyon. (1 Pyer 5:2, 3) Labib i konsey sirtou bann zonm ki pli zenn pour gard antet sa konsey. (1 Tim. 4:12; 5:1, 2; 1 Pyer 5:5) Ler i neseser pour koriz lerer, pour disiplinen, pour remet drwat, sa i devret ganny fer dapre sa ki Labib li menm i dir. (2 Tim. 3:16) Laplikasyon Lekritir pa devret zanmen ganny forse oubyen deformen pour siport serten lide ki dapre sa orater i enportan. Menm ler konsey pour korize i neseser, fason ki sa diskour i ganny prezante i kapab fer sa diskour reste pozitif si lanfaz i ganny plase prensipalman lo konman pour evite tonm dan bann keksoz mal, konman pour rezoud bann problenm, konman pour sirmont bann difikilte, konman pour koriz en move fason, e konman legzizans Zeova i sovgard nou.—Pson. 119:1, 9-16.

Ler ou pe prepar ou diskour, donn latansyon spesyal lo konman ou pou konklir sak pwen ek sa diskour li menm. Sa ki ou dir dernyen i souvan ganny rapele pli lontan. Eski ou bann dernyen parol pou pozitif?

Ler pe koz avek Konpanyon Kretyen. Bann serviter Zeova i seri loportinite pour frekant lezot pandan bann renyon kongregasyon. Sa i bann letan rafresisman spirityel. Labib i ankouraz nou pour pa oubliye pour “ankouraz kanmarad” ler nou rankontre dan nou bann landrwa ladorasyon. (Ebr. 10:25) Sa pa ganny akonpli zis par bann diskour ek bann komanter pandan renyon me osi par konversasyon avan e apre bann renyon.

I normal ki dan nou konversasyon nou koz lo bann keksoz dan nou lavi toulezour, me pli gran lankourazman i vin par diskit bann keksoz spirityel. Sa i enkli bann leksperyans ki nou rezwir dan servis sakre. Montre lentere senser avek kanmarad i osi ankourazan.

Akoz lenfliyans lemonn otour nou, nou bezwen fer atansyon. Ler i ti pe ekrir bann Kretyen an Efez, Pol ti dir: “Alor pour sa rezon rezet mansonz! Sakenn devre koz laverite avek son prosen akoz nou tou ansanm nou manm en sel lekor.” (Efe. 4:25) Koz laverite olye ki mansonz i enkli pa glorifye bann keksoz ek dimoun ki sa lemonn i adore. Pareyman, Zezi ti averti kont “pouvwar tronper larises.” (Mat. 13:22, NW) Alor ler pe koz avek kanmarad, nou bezwen fer atansyon pour pa promot sa lespri tronper par koz tro bokou lo bann keksoz materyel e fer li vin pli atiran ki i vreman ete.—1 Tim. 6:9, 10.

Ler zapot Pol ti pe konsey lo sa nesesite pour vin en dimoun ankourazan, i ti ankouraz nou pour pa ziz oubyen abes en frer akoz i evit serten keksoz parski i “feb dan lafwa” sa i vedir ki i pa konpran plennman liberte Kretyen. Vreman, pour nou konversasyon ankouraz lezot, nou devret konsider zot lorizin ek lakantite progre spirityel ki zot in fer. I pou tris pour ‘met devan en frer ou en ser en keksoz ki pou skandaliz li oubyen fer li tonbe.’—Rom. 14:1-4, 13, 19.

Sa bann ki fer fas avek bann problenm personnel grav—par egzanp, bann maladi kronik—zot apresye konversasyon ankourazan. En tel dimoun i kapab pe fer bokou zefor pour kapab asiste bann renyon. Sa bann ki konn son sitiasyon i kapab demande: “Konman ou santi?” Sa dimoun pou san dout apresye zot konsern. Toutfwa, leta son lasante i kapab pa topik ki li i trouv pli ankourazan pour koz lo la. Bann mo lapresyasyon ek felisitasyon i kapab fer li plis dibyen, ler i vwar nou lafeksyon pour li. Eski ou trouv levidans son lanmour kontinyel pour Zeova ek son landirans anba en sitiasyon difisil? Eski ou santi ou ganny ankouraze ler i ofer bann komanter? Eski i ti a kapab ganny ankouraze plis par atir latansyon lo son bann lafors e sa ki i kontribye dan kongregasyon olye ki lo son bann limitasyon?—1 Tesa. 5:11.

Pour nou konversasyon ankourazan, i sirtou enportan pour pran an konsiderasyon pwenn-vi Zeova lo sa ki pe ganny diskite. Dan ansyen Izrael, sa bann ki ti koz kont bann reprezantan Zeova e konplent kont lamann ti eksperyans mekontantman sever Zeova. (Nom. 12:1-16; 21:5, 6) Nou demontre ki nou’n benefisye atraver sa bann legzanp ler nou montre respe pour bann ansyen e lapresyasyon pour nouritir spirityel ki ganny fourni atraver lesklav fidel e pridan.—1 Tim. 5:17.

Trouv bann keksoz itil pour koz lo la ler nou avek nou bann frer ek ser Kretyen i rarman en problenm. Sepandan, si remark en dimoun i tro lo kote kritike, pran linisyativ pour anmenn sa konversasyon dan en direksyon ankourazan.

Ki swa nou pe rann temwannyaz avek lezot, koz lo lestrad, oubyen pe koz avek bann konpanyon Kretyen, annou demontre disernman afen pour fer resorti trezor nou leker, ki nou “koz zis bann parol itil ki kapab ed lezot progrese dan zot lafwa e kan i neseser pou fer dibyen sa ki ekoute.”—Efe. 4:29.