Sapit Kenz
Ekout Konsey, aksepte Disiplin
1. (a) Akoz nou tou nou bezwen konsey ek disiplin? (b) Ki kestyon nou merit reflesir lo la?
LABIB i dir dan Zak 3:2: “Nou komet lerer dan plizyer mannyer.” Nou kapab mazin plizyer moman kot nou pa’n kapab vin sa kalite dimoun ki Parol Bondye i ankouraz nou pour vini. Alors nou rekonnet ki Labib i byen kan i dir: “Ekout konsey e aksepte disiplin, afen ki ou ava kapab vin saz dan ou lavenir.” (Proverb 19:20) San dout nou’n deza fini fer bann sanzman dan nou lavi pour armoniz li avek bann lansennyman Labib. Me konman nou pou reazir si en konpanyon Kretyen i konsey nou lo en size spesifik?
2. Ki nou devret fer kan nou ganny en konsey personnel?
2 Serten i reazir par esey ekskiz zot lekor, minimiz gravite sa sitiasyon, oubyen blanm lezot. Me i pli bon pour ekout konsey e aplik li. (Ebre 12:11) Byensir, personn pa devret ekspekte perfeksyon avek lezot, e pa ni devret pe konstaman donn konsey konsernan bann keksoz ki pa enportan oubyen lo bann size ki Labib i les dimoun swazir pour zot menm. Osi, petet sa dimoun ki pe donn konsey pa’n konsider tou bann fe, e alors avek respe nou kapab fer li konn serten sa bann fe. Me dan sa diskisyon swivan, annou prezimen ki sa konsey oubyen disiplin ki ganny donnen i apropriye, e baze lo Labib. Ki mannyer en dimoun pou reazir?
Legzanp pour reflesir lo la ler nou ganny Konsey
3, 4. (a) Ki Labib i kontyen ki kapab ed nou pour devlop en bon pwenn-vi anver konsey ek disiplin? (b) Ki mannyer Lerwa Sail ti reazir avek konsey, e avek ki rezilta?
3 Parol Bondye i kontyen leksperyans bann endividi ki ti resevwar konsey apropriye. Parfwa, sa konsey ti ganny akonpannyen par disiplin. Enn sa bann endividi ti Lerwa Sail an Izrael. I pa ti arive obeir Zeova konsernan nasyon Amalek. Bann Amalekit ti’n opoz bann serviter Zeova, e zizman Zeova se ki ni bann Amalekit ni zot zannimo pa ti devret ganny eparnyen. Me Lerwa Sail ti eparny zot lerwa ek zot bann pli bon zannimo.—1 Samyel 15:1-11.
4 Zeova ti anvoy son profet, Samyel, pour reprimann Sail. Ki ti reaksyon Sail? I ti argimante ki i ti’n konkerir bann Amalekit me selman i ti deside pour eparny zot lerwa. Me sa ti kontrer avek sa ki Zeova ti’n demann li. (1 Samyel 15:20) Sail ti esey met blanm lo lezot dimoun pour eparny bann zannimo, an dizan: “Mon ti per lepep e alor mon ti obei zot lavwa.” (1 Samyel 15:24) I paret ki i ti pli konsernen avek son lafyerte, ki i ti menm demann Samyel pour onor li devan lepep. (1 Samyel 15:30) Finalman, Zeova ti rezet Sail konman lerwa.—1 Samyel 16:1.
5. Ki ti arive avek Lerwa Ouziya kan i ti rezet konsey?
5 Lerwa Ouziya an Zida “ti azir enfidel anver Zeova son Bondye e ti antre dan tanp Zeova pour bril lansan.” (2 Kronik 26:16) Me dapre lalwa, zis bann pret ki ti kapab ofer lansan. Kan sef pret ti esey aret Ouziya, sa lerwa ti reazir avek lakoler. Ki ti arive? Labib i dir: “Lalep ti aparet lo son fron . . . akoz Zeova ti’n frap li. E lerwa Ouziya, ti reste en lepre ziska zour son lanmor.”—2 Kronik 26:19-21.
6. (a) Akoz Sail ek Ouziya ti reziste konsey? (b) Akoz reziste konsey i en problenm grav ozordi?
6 Akoz ki Sail ek Ouziya ti vwar li difisil pour aksepte konsey? Problenm debaz ti lorgey, zot tou le de ti pe pans tro bokou lo zot lekor. Bokou i anmenn maler lo zot menm akoz sa move tre. I paret ki pour zot, konsey i endike ki zot annan serten mankman dan zot oubyen i afekte zot repitasyon. Me lorgey i en febles. Lorgey i anpes en dimoun reflesir byen ki fer ki i tant pour reziste led ki Zeova i donnen atraver son Parol ek son lorganizasyon. Se pour sa ki Zeova i averti: “Avan maler i annan lorgey, e avan fo pa en lespri arogan.”—Proverb 16:18; Romen 12:3.
Aksepte Konsey
7. Ki sa bon leson nou kapab aprann avek lafason ki Moiz ti reazir anver konsey?
7 Labib i osi kontyen bann bon legzanp bann dimoun ki ti aksepte konsey, e nou kapab aprann atraver zot. Mazin Moiz, ki son boper ti donn li konsey lo konman pour okip sa kantite travay ki i ti annan pour fer. Moiz ti ekout li e aplik son konsey imedyatman. (Egzod 18:13-24) Kantmenm Moiz ti annan gran lotorite, akoz i ti pare pour aksepte konsey? Parski i ti annan limilite. “Moiz, ti en zonm ki ti annan plis limilite ki tou zonm ki ti lo sirfas later.” (Nonm 12:3) Ki kantite enportan limilite i ete? Tsefanya 2:3 i montre ki i vedir nou lavi.
8. (a) Ki pese ki David ti komet? (b) Ki ti reaksyon David anver reprimann Natann? (c) Ki ti bann konsekans pese David?
8 Lerwa David ti komet adilter avek Batseba e esey kasyet sa par fer son mari, Ouriya, ganny touye. Zeova ti anvoy profet Natann pour reprimann David. I ti repantir e vitman admet: “Mon’n fer pese kont Zeova.” (2 Samyel 12:13) Kantmenm Bondye ti aksepte repantans David, i ti pou sibir bann konsekans son move aksyon. Zeova ti dir li ki en lepe “pa pou elwannyen avek [son] lakaz,” ki son bann madanm pou ganny donnen “avek [son] kanmarad,” e ki sa garson ki pou ne par son adilter “pou sirman mor.”—2 Samyel 12:10, 11, 14.
9. Ki nou pa devret oubliye si nou ganny konseye e disiplinen?
9 Lerwa David ti konnen akoz i itil pour ekout bon konsey. I annan moman kot i ti remersye Bondye pour anvoy sa enn ki ti donn li konsey. (1 Samyel 25:32-35) Eski nou osi nou koumsa? Si wi, nou pou ganny proteze kont dir e fer plizyer keksoz ki kapab fer nou regrete. Me si nou ariv dan bann sitiasyon kot nou bezwen ganny konseye oubyen menm disiplinen? Fotespere ki nou pa oubliye ki sa i en levidans ki Zeova i kontan nou, ki kontribye ver nou boner eternel.—Proverb 3:11, 12; 4:13.
Bann Kalite presye pour kiltive
10. Ki kalite ki Zezi ti montre i neseser pour sa bann ki pou rantre dan Rwayonm?
10 Pour annan en bon relasyon avek Zeova e avek nou bann frer ek ser Kretyen, nou bezwen kiltiv serten kalite. Zezi ti port latansyon son bann disip lo enn sa bann kalite kan i ti met en zanfan devan zot e dir: “Si zot pa sanze e vin parey bann zanfan, zot pa pou zanmen antre dan Rwayonm lesyel. Sa ki pli gran dan Rwayonm lesyel i sa enn ki abes li e vin parey sa zanfan.” (Matye 18:3, 4) Bann disip Zezi ti bezwen kiltiv limilite, vi ki zot ti pe diskit antre zot konsernan lekel ki pli enportan.—Lik 22:24-27.
11. (a) Devan lekel nou devret annan limilite, e akoz? (b) Si nou annan limilite, ki mannyer nou pou reazir letan nou ganny konseye?
11 Zapot Pyer ti ekri: “Montre bokou limilite dan zot relasyon avek kanmarad parski Lekritir i dir: ‘Bondye i opoz sa ki annan lorgey, me i donn son lagras sa ki annan limilite.’” (1 Pyer 5:5) Nou konnen ki nou bezwen annan limilite devan Bondye, me sa verse Labib i montre ki nou osi bezwen montre limilite parmi nou bann konpanyon Kretyen. Si nou annan limilite, nou pa pou mekontan kan lezot i ofer nou bann bon sizesyon me nou pou aprann avek zot.—Proverb 12:15.
12. (a) Ki sa kalite enportan ki tre pros avek limilite? (b) Akoz nou devret konsernen avek lefe ki nou kondwit i kapab annan lo lezot?
12 Lot kalite ki tre pros avek limilite se konsern pour byennet lezot. Zapot Pol ti ekri: “Personn pa devret rod son prop lentere, me lentere son prosen. . . . Alor, ki ou manze, oubyen bwar, ou nenport kwa ki ou fer, fer tou pour laglwar Bondye. Viv dan en fason ki ou pa eskandaliz personn ni Zwif, ni Grek, ni personn dan legliz Bondye.” (1 Korentyen 10:24-33) Pol pa ti pe dir ki nou bezwen rezet tou nou bann preferans personnel, me i ti pe enplor nou pour pa fer okenn keksoz ki kapab ankouraz en lot dimoun pour fer sa ki son konsyans i dir li i mal.
13. Ki legzanp ki kapab endike si nou pe aplik konsey Biblik?
13 Eski ou met byennet lezot avan ou prop preferans personnel? Nou tou nou devret aprann fer sa. I annan plizyer fason ki sa i kapab ganny fer. Konsider par egzanp fason sanze ek pennyen. Sa i bann keksoz ki enplik nou swa personnel e nou swiv bann gidans Labib pour fer li dan en fason modes, prop e annord. Me si ou aprann ki akoz lorizin ek ledikasyon bann dimoun dan ou kominote, ou fason sanze ek pennyen pe anpes lezot ekout mesaz Rwayonm, eski ou pou fer bann sanzman? Sirman, ed en lot dimoun ganny lavi eternel i pli enportan ki fer plezir nou prop lekor.
14. Akoz i enportan pour kiltiv limilite ek konsern pour lezot?
14 Par son limilite ek konsern pour lezot, Zezi in kit legzanp pour nou. I ti menm lav lipye son bann disip. (Zan 13:12-15) Konsernan li, Parol Bondye i dir: “Posed sa menm santiman ki ti dan Kris-Zezi. Menm ki i ti posed natir Bondye i pa ti [anvi vin] egal avek Bondye. Me, okontrer, par son prop volonte, i ti renons tou sa ki i posede pour pran kondisyon lesklav. I ti pran natir imen, konman en zonm, i ti aksepte viv dan limilite e montre li obeisan ziska lanmor.”—Filipyen 2:5-8; Romen 15:2, 3.
Pa rezet Disiplin Zeova
15. (a) Ki bann sanzman ki nou bezwen fer pour annan en personnalite ki fer plezir Bondye? (b) Par ki mwayen ki Zeova in fourni konsey ek disiplin pour nou tou?
15 Vi ki nou tou nou bann dimoun ki fer pese, sanzman dan nou latitid ek kondwit i neseser si nou oule reflekte personnalite nou Bondye. Nou bezwen kiltiv sa “nouvo personnalite.” (Kolosyen 3:5-14, NW) Konsey ek disiplin i ed nou pour idantifye bann laspe kot i neseser fer bann sanzman e apre pour vwar konman pour fer zot. Sours debaz lenstriksyon ki nou bezwen se Labib li menm. (2 Timote 3:16, 17) Piblikasyon baze lo Labib ek bann renyon ki ganny prepare par lorganizasyon Zeova i ed nou pour aplik Parol Bondye. Menm si nou’n deza tann sa konsey oparavan, eski nou pou rekonnet ki nou bezwen li e esey amelyore?
16. Ki led personnel Zeova i donn nou?
16 Avek konsern ranpli avek lanmour, Zeova i ed nou avek nou bann problenm. Plizyer milyon dimoun in ganny ede par mwayen letid Labib kot lakour. Konsey ek disiplin donnen par bann paran i ed bann zanfan pour protez zot kont bann kondwit ki kapab anmenn latristes. (Proverb 6:20-23) Dan kongregasyon, souvan serten i demann konsey ek sizesyon avek bann proklanmater ki annan leksperyans pour kapab amelyor zot bann zefor dan predikasyon. Parfwa, bann ansyen i kapab demann konsey avek kanmarad oubyen avek lezot ki eksperyanse dan minister. Sa bann ki annan bann kalifikasyon spirityel i servi Labib pour donn lasistans sa ki bezwen, par fer li avek en lespri ladouser. Si ou donn konsey, rapel pour “vey byen [ou] prop lekor, fer atansyon ki ou pa ganny tante.” (Galat 6:1, 2) Wi, nou tou nou bezwen konsey ek disiplin pour ador sa vre Bondye dan linite.
Revizyon
• Ki mannyer Zeova i ed nou avek lanmour pour vwar dan ki domenn nou bezwen fer bann sanzman?
• Akoz bokou i ganny difikilte pour aksepte konsey ki zot bezwen, e ki kantite grav sa i ete?
• Ki bann kalite presye ki pou ed nou pour aksepte konsey, e konman Zezi ti montre legzanp?
[Portre lo paz 142]
Ouziya ti rezet konsey e i ti ganny frape avek lalep
[Portre lo paz 142]
Moiz ti benefisye par aksepte konsey avek Yitro