Sapit Diznef
Kontinyen anons Parol Bondye avek Lardyes
1. (a) Ki bon nouvel bann disip Zezi ti proklanmen, me konman serten Zwif ti reazir? (b) Ki bann kestyon nou kapab demande?
APEPRE 2,000 an pase, Garson Bondye, Zezi Kri, ti ganny apwente konman sa Lerwa ki pou diriz later antye dan lavenir. Zezi ti ganny egzekite apre ki son bann lennmi relizye ti konplot kont li, me Zeova ti resisit li. Atraver Zezi, lavi eternel i aprezan posib. Sepandan, kan bann disip Zezi ti piblikman proklanm sa bon nouvel, persekisyon ti eklate. Serten ti ganny met dan prizon, menm ganny bate e ganny lord pour aret koz lo Zezi. (Akt 4:1-3, 17; 5:17, 18, 40) Ki zot ti pou fer? Ki ou ti pou’n fer? Eski ou ti pou’n kontinyen pres avek lardyes?
2. (a) Ki nouvel merveye ki bezwen ganny proklanmen dan nou lepok? (b) Lekel ki annan sa responsabilite pour pres sa bon nouvel?
2 An 1914, Lerwa Rwayonm Bondye, Zezi Kri, ti ganny kouronnen dan lesyel pour diriz ‘omilye son bann lennmi.’ (Psonm 110:2) Apre sa, Satan ek son bann demon ti ganny zete lo later. (Revelasyon 12:1-5, 7-12) Bann dernyen zour sa prezan sistenm mesan ti konmanse. Kan sa peryod letan pou terminen, Bondye pou kraz sistenm Satan konpletman. (Danyel 2:44; Matye 24:21) Bann sirvivan pou annan lespwar lavi eternel devan zot lo en later ki pou vin en paradi. Si ou’n aksepte sa bon nouvel, ou pou anvi partaz li avek lezot. (Matye 24:14) Me ki reaksyon ou kapab gannyen?
3. (a) Ki mannyer dimoun i reazir avek mesaz Rwayonm? (b) Ki kestyon nou bezwen reponn?
3 Kan ou proklanm bon nouvel Rwayonm, serten dimoun i kapab aksepte, me laplipar pou endiferan. (Matye 24:37-39) Serten i kapab ridikiliz oubyen opoz ou. Zezi ti averti ki lopozisyon i kapab sorti kot ou prop fanmiy. (Lik 21:16-19) I kapab osi dan ou landrwa travay oubyen kot lekol. Dan serten parti lemonn, Temwen Zeova i menm ganny restrikte par gouvernman. Kan ou fer fas avek bann tel sitiasyon, eski ou pou kontinyen anons parol Bondye avek lardyes e “reste ferm dan lafwa”?—1 Korentyen 16:13.
Pa apiy lo nou prop Lafors
4. (a) Kwa ki neseser pour nou vin bann serviter fidel Bondye? (b) Akoz bann renyon Kretyen i tre enportan?
4 Pour vin en serviter fidel Zeova i esansyel ki nou depan lo son bann dispozisyon. Enn parmi se bann renyon kongregasyon. Labib i ankouraz nou pour pa negliz zot. (Ebre 10:23-25) Bann ki’n kontinyen reste konman bann Temwen Zeova fidel in fer zefor pour asiste bann renyon regilyerman avek zot konpanyon Kretyen. Dan sa bann renyon nou konnesans lo Labib i ogmante. Osi, nou pli apresye bann laverite ki nou deza byen konnen, e nou vin pli konsyan konman pour aplik zot. Nou vin pli pros avek nou bann frer ek ser Kretyen dan en ladorasyon ini e nou ganny fortifye pour fer lavolonte Bondye. Lespri Zeova i fourni gidans atraver kongregasyon, e par mwayen sa lespri, Zezi i omilye nou.—Matye 18:20; Revelasyon 3:6.
5. Kan Temwen Zeova i anba restriksyon, ki laranzman ki ganny fer konsernan bann renyon?
5 Eski ou regilyerman asiste tou bann renyon, e eski ou pe personnelman met an pratik sa ki ou antann ganny diskite? Parfwa, kan Temwen Zeova i anba restriksyon i neseser pour fer bann renyon dan bann pti group kot bann lakour prive. Landrwa ek ler i kapab varye e i kapab pa toultan konvenyan, serten renyon i ganny fer tar dan lannwit. Me malgre danze oubyen lenkonvenyans personnel, bann frer ek ser fidel i fer bokou zefor pour prezan dan sak renyon.
6. Konman ki nou demontre ki nou depan lo Zeova, e ki mannyer sa i kapab ed nou kontinyen koz avek lardyes?
6 Nou montre ki nou pe aprann depan lo Zeova kan nou regilyerman tourn ver li dan lapriyer senser, parski nou realize ki nou bezwen son led. Eski ou fer sa? Zezi ti priye plizyer fwa pandan son minister lo later. (Lik 3:21; 6:12, 13; 22:39-44) E sa zour swar avan ki i ti ganny met lo poto, i ti ankouraz son bann disip: “Veye e priye pour zot pa tonm dan tantasyon.” (Mark 14:38) Si nou rankontre lendiferans anver mesaz Rwayonm, nou kapab annan tandans pour ralanti dan nou minister. Si dimoun i ridikiliz nou oubyen persekit nou, nou kapab santi nou ganny tante pour aret prese pour nou evit problenm. Me si nou priy Bondye senserman pour akord nou son lespri pour ed nou kontinyen koz avek lardyes, sa pou protez nou pour nou pa soumet avek sa bann tantasyon.—Lik 11:13; Efezyen 6:18-20.
En Resi lo rann Temwannyaz avek Lardyes
7. (a) Akoz sa resi dan Akt i enteres nou partikilyerman? (b) Reponn sa bann kestyon ki’n ganny fourni alafen sa paragraf, met lanfaz lo konman sa lenformasyon i kapab benefisye nou.
7 Resi ki liv Akt i kontyen i annan en lentere spesyal pour nou tou. I rakonte konman bann zapot ek lezot premye disip—dimoun ki ti annan menm santiman parey nou—ti sirmont bann lobstak e demontre ki zot ti bann serviter Zeova ki annan lardyes e fidel. Annou egzamin en porsyon sa resi avek led sa bann kestyon ek verse swivan ki’n ganny site. Anmezir ki nou fer sa, reflesir lo konman ou kapab benefisye personnelman avek sa ki ou pe lir.
Eski bann zapot ti bann zonm ki ti’n resevwar en gran ledikasyon? Eski zot ti bann endividi ki par natir pa ti per, nenport kwa ki ti arive? (Zan 18:17, 25-27; 20:19; Akt 4:13)
Kwa ki ti ed Pyer pour koz avek lardyes devan lakour Zwif ki ti’n kondann Garson Bondye? (Matye 10:19, 20; Akt 4:8)
Ki bann zapot ti pe fer diran bann semenn avan ki zot ti ganny anmennen devan Sannedren? (Akt 1:14; 2:1, 42)
Kan bann sef ti donn lord bann zapot pour aret pres lo non Zezi, ki Pyer ek Zan ti reponn? (Akt 4:19, 20)
Apre ki zot ti’n ganny large, avek lekel ki bann zapot ti rod led? Eski zot ti priye pour persekisyon arete? (Akt 4:24-31)
Par ki mwayen Zeova ti fourni lasistans kan bann ki opoze ti esey aret travay predikasyon? (Akt 5:17-20)
Konman ki bann zapot ti montre ki zot ti konpran rezon akoz zot ti’n ganny large? (Akt 5:21, 41, 42)
Menm kan bokou disip ti ganny disperse akoz persekisyon, ki zot ti kontinyen fer? (Akt 8:3, 4; 11:19-21)
8. Ki bann rezilta enpresyonan ki ti vin atraver minister bann premye disip, e ki mannyer nou enplike dan sa menm minister?
8 Travay predikasyon sa bon nouvel pa ti anven. Apepre 3,000 disip ti batize zour Lapannkot lannen 33 N.L. “Pli ale en pli gran kantite dimoun, zonm ek fanm ti krwar e aksepte Senyer.” (Akt 2:41; 4:4; 5:14) Plitar, menm en gran persekiter pep Bondye, Sol, ki ti sorti Tars, ti vin en Kretyen e avek lardyes i ti konmans rann temwannyaz lo laverite. I ti arive ganny rekonnet konman zapot Pol. (Galat 1:22-24) Sa travay ki ti konmans dan premye syek pa’n arete. I’n pran lanpler dan sa bann dernyen zour e i’n ariv partou lo later. Nou annan sa privilez pour partisip ladan, e anmezir nou fer sa, nou kapab aprann atraver legzanp ki bann serviter fidel ki’n servi avan nou in lese.
9. (a) Ki bann loportinite ki Pol ti servi pour rann temwannyaz? (b) Dan ki fason ou propaz sa mesaz Rwayonm avek lezot?
9 Kan Pol ti aprann laverite lo Zezi Kri, ki i ti fer? I “ti konmans prese deswit . . . e i ti anonse ki Zezi i Garson Bondye.” (Akt 9:20) I ti apresye faver ki i pa ti merite ki Bondye ti demontre anver li, e i ti realize ki tou dimoun ti bezwen tann sa bon nouvel ki i ti’n resevwar. Pol ti en Zwif, e dapre koutim sa letan, i ti al dan bann sinagog pour donn en temwannyaz. I ti osi pres port-an-port e rezonn avek bann dimoun dan bann landrwa piblik. E i ti pare pour deplas dan bann nouvo teritwar pour pres sa bon nouvel.—Akt 17:17; 20:20; Romen 15:23, 24.
10. (a) Konman ki Pol ti montre ki kantmenm i ti ardyese, i ti osi annan disernman dan lafason ki i ti rann temwannyaz? (b) Ki mannyer nou kapab reflekte bann kalite Pol kan nou pe temwanny avek nou fanmiy, koleg travay, ouswa kanmarad lekol?
10 Pol ti ardyese me i ti osi annan disernman, ki nou osi nou devret annan. Letan i ti koz avek bann Zwif, i ti port zot latansyon lo baz bann promes ki Bondye ti’n fer avek zot bann zanset. Avek bann Grek, i ti koz lo baz bann keksoz ki zot ti familye avek. Parfwa i ti servi son prop leksperyans konsernan lafason ki i ti’n aprann laverite konman en mwayen pour donn en temwannyaz. I ti dir: “Mon fer tousala pour Levanzil, pour mwan ganny en par dan son bann benediksyon.”—1 Korentyen 9:20-23; Akt 22:3-21.
11. (a) Ki Pol ti fer pour evit konfrontasyon kontinyel avek bann dimoun ki ti opoz li? (b) Kan ki avek sazes nou kapab imit legzanp Pol, e konman? (c) Kote ki sa lafors pour kontinyen koz avek lardyes i sorti?
11 Kan zapot Pol ti vwar li pli meyer pour al pres dan en lot landrwa pour en pe letan akoz lopozisyon, i ti fer sa olye kontinyen afront sa bann ki ti opoz li. (Akt 14:5-7; 18:5-7; Romen 12:18) Me i pa ti zanmen onte akoz sa bon nouvel. (Romen 1:16) Kantmenm pa ti gou pour Pol sibir sa bann move tretman par bann ki ti opoz li, ki ti menm vyolan, i “ti annan kouraz dan nou Bondye” pour kontinyen prese. I ti dir: “Senyer in soutenir mwan e i’n fortifye mwan e in fer mwan kapab anons son mesaz.” (1 Tesalonisyen 2:2; 2 Timote 4:17) Sef kongregasyon Kretyen, Zezi, i kontinyen fourni lafors ki nou bezwen pour fer sa travay ki i ti predir pour nou letan.—Mark 13:10.
12. Kwa ki montre ki en Kretyen i devret annan lardyes e lo ki sa lardyes i baze?
12 Nou annan tou rezon pour kontinyen anons Parol Bondye avek lardyes, zis parey Zezi ek lezot serviter fidel Bondye ti fer dan premye syek. Sa pa vedir ki nou pa montre konsiderasyon oubyen esey fors sa mesaz lo sa bann ki pa anvi ekoute. Me nou pa arete akoz bann dimoun pa enterese; ni reste trankil akoz lopozisyon. Parey Zezi, nou endike ki Rwayonm Bondye i sa pli bon gouvernman pour later. Nou koz avek konfyans akoz nou reprezant Zeova, Souvren Iniversel, e parski sa mesaz ki nou proklanmen pa sorti kot nou me kot li. E nou lanmour pour Zeova i devret vin nou rezon pli for pour loue li.—Filipyen 1:27, 28; 1 Tesalonisyen 2:13.
Revizyon
• Akoz i enportan pour partaz mesaz Rwayonm avek tou dimoun posib, me ki reaksyon nou ekspekte?
• Ki mannyer nou kapab demontre ki nou pa depan lo nou prop lafors pour servi Zeova?
• Ki bann leson enportan nou aprann dan liv Akt?
[Portre lo paz 173]
Parey dan lepase, bann serviter Zeova ozordi i anons parol Bondye avek lardyes