Sapit Venteen
Plan Zeova i atenn en Lakonplisman glorye
1, 2. (a) Ki plan Zeova pour son bann kreatir entelizan? (b) Lekel ki ti form par avek sa fanmiy ini pour ador Bondye?
PLAN Zeova se ki tou kreasyon entelizan i ini dan sa sel vre ladorasyon Bondye e zot tou zot rezwir sa liberte glorye konman bann zanfan Bondye. Sa i osi sa ki tou bann ki kontan ladrwatir i senserman anvi.
2 Zeova ti konmans akonpli sa gran plan kan i ti konmans son travay kreasyon. Son premye kreasyon ti en Garson ki depi son rezireksyon “i reflekte laglwar Bondye, e reprezant egzakteman resanblans son natir.” (Ebre 1:1-3) Sa Garson ti inik, akoz i ti’n ganny kree par Bondye li tousel. Avek letan, ti pou atraver sa Garson ki tou lezot ti pou vin an legzistans: premyerman bann lanz dan lesyel, apre bann imen lo later. (Zob 38:7; Lik 3:38) Tousala i form en fanmiy iniversel. Pour zot tou, Zeova i zot Bondye, Souvren Iniversel, e zot Papa lanmour.
3. (a) Kwa ki nou tou nou’n erite avek nou premye paran? (b) Ki provizyon ki Zeova in fer avek lanmour pour bann desandans Adan?
3 Kan nou premye paran ti ganny kondannen dan lanmor konman bann ki’n fer pese volonterman, zot ti ganny pouse an Edenn e ganny rezete par Bondye. Zot ti nepli form parti sa fanmiy iniversel. (Zenez 3:22-24; Deterononm 32:4, 5) Nou tou nou zot desandans, alors nou’n ne avek bann tandans pour fer pese. Me Zeova ti konnen ki serten parmi bann desandans Adan ek Ev ti pou kontan ladrwatir. Alor I ti fer en provizyon avek lanmour kot zot ti pou kapab atenn “laliberte ek laglwar bann zanfan Bondye.”—Romen 8:20, 21.
Izrael ti perdi son Pozisyon privilezye
4. Ki privilez Zeova ti akord ansyen Izrael?
4 Anviron 2,500 an apre kreasyon Adan, Zeova ti akord serten imen sa privilez pour annan en relasyon spesyal avek Li. I ti swazir ansyen Izrael pour vin son pep e donn zot son Lalwa. (Zenez 12:1, 2) I ti form zot konman en nasyon e servi zot an konneksyon avek son plan. (Deterononm 14:1, 2; Izai 43:1) Toutfwa, zot ti ankor dan lesklavaz pese ek lanmor, alors zot pa ti rezwir sa liberte glorye ki Adan ek Ev ti annan okonmansman.
5. Konman ki bann Izraelit ti perdi zot pozisyon spesyal avek Bondye?
5 Toutfwa, bann Izraelit ti annan en pozisyon privilezye devan Bondye. Zot ti osi annan sa responsabilite pour respekte Zeova konman zot Papa e pour travay an armoni avek son plan. Zezi ti met bokou lanfaz lo lenportans pour zot akonpli sa lobligasyon. (Matye 5:43-48) Malerezman, nasyon Izrael pa ti kapab fer sa. Kantmenm bann Zwif ti dir ki “nou annan en sel Papa, Bondye,” Zezi ti deklare ki zot aksyon ek sa latitid ki zot ti demontre ti kontredir sa ki zot ti’n dir. (Zan 8:41, 44, 47) Lannen 33 N.L., Bondye ti aboli sa Lalwa, e sa relasyon spesyal ki Izrael ti annan avek li ti terminen. Me eski sa ti vedir ki dimoun pa ti pou zanmen kapab rezwir en relasyon favorab avek Bondye?
Rasanble “bann Keksoz ki dan Lesyel”
6. Ki bi sa “ladministrasyon” ki Pol ti mansyonnen dan Efezyen 1:9, 10?
6 Zapot Pol ti montre ki serten dimoun pou kapab rezwir en relasyon spesyal avek Bondye. Par egzanp, konsernan laranzman Zeova ki permet bann ki demontre lafwa kapab vin manm Son fanmiy, Pol ti ekri: “[Bondye] i fer nou konn sen sekre son lavolonte. Se dapre son bon plezir ki i’n propoze dan li menm pour en ladministrasyon dan en letan fikse, savedir, pour rasanble tou keksoz ansanm ankor dan Kris, bann keksoz ki dan lesyel ek bann keksoz lo later.” (Efezyen 1:9, 10, NW) Sa “ladministrasyon” i santre lo Zezi. Atraver Zezi, imen i ganny anmennen dan en kondisyon aprouve devan Bondye. En pti group zot i annan sa posibilite pour al dan lesyel. En pli gran kantite pou viv lo later pour touzour.
7. Lekel sa bann “keksoz ki dan lesyel”?
7 Apartir Lapannkot lannen 33 N.L., latansyon prensipal ti ganny donnen avek “bann keksoz ki dan lesyel,” andotmo, sa bann ki pou vin bann zeritye avek Kris dan Rwayonm seles. Lo baz zot lafwa dan valer sakrifis Zezi, zot in ganny deklare drwat par Bondye. (Romen 5:1, 2) Avek letan, bann Zwif ensi ki bann ki sorti dan lezot nasyon ti ganny enkli dan sa group e “bann keksoz ki dan lesyel,” ti pou ariv en total 144,000. (Galat 3:26-29; Revelasyon 14:1) Selman en restan zot ki ankor lo later.
Rasanble “bann Keksoz lo Later”
8. Lekel sa “bann keksoz lo later,” e ki zot relasyon avek Zeova?
8 Sa menm ladministrasyon pe osi rasanble “bann keksoz lo later.” Plizyer milyon dimoun pe aprezan ganny rasanble avek posibilite pour viv pour touzour lo later. Dan linite avek larestan zeritye Rwayonm, zot glorifye non Zeova e zot elev son ladorasyon. (Izai 2:2, 3; Tsefanya 3:9) Zot osi adres Zeova konman “Papa” parski zot rekonnet li konman sours lavi. E zot rezwir en pozisyon aprouve devan li lo baz zot lafwa dan disan Zezi ki’n ganny verse. (Revelasyon 7:9, 14) Me vi ki zot ankor enparfe, alor se dan lavenir ki zot pou ganny totalman rekonnet konman bann zanfan Bondye.
9. Ki promes Romen 8:21 i ofer limanite?
9 Sa bann ki annan lespwar pour viv lo later pe aprezan esper avek pasyans sa letan kan bann imen “pou ganny libere en zour avek pouvwar destrikter ki pe gard [nou] dan lesklavaz.” (Romen 8:21) Sa liberasyon pou konmans apre ki Kris ek son bann larme lesyel pou anmenn gran ladetres ver en lafen par mwayen Armagedon. Sa pou vedir destriksyon sistenm Satan, ki pou swiv par bann benediksyon sa Renny Milener Kris dan pouvwar Rwayal.—Revelasyon 19:17-21; 20:6.
10. Ki kantik louanz ki bann serviter Zeova pou sante?
10 Pa i pou eksitan kan bann serviter Zeova lo later pou ini ansanm pour repet menm santiman avek son bann serviter dan lesyel, ki proklanm avek lazwa: “Senyer Bondye Toupisan! Ou travay i gran e merveye. Lerwa bann nasyon! Tou ou bann plan i zis e vre. Senyer, lekel ki pa pou respekte ou? Lekel ki pou refize rann ou glwar? Zis ou tousel ki sen. Tou nasyon pou vin ador ou, akoz ou zizman in ganny revele.” (Revelasyon 15:3, 4) Wi, tou bann serviter Zeova pou ini dan ladorasyon sa sel vre Bondye. Menm bann mor pou ganny resisite e ganny sa loportinite pour zwenn zot lavwa pour loue Zeova.—Akt 24:15.
Liberte merveye byento
11. Ki liberte merveye sa bann ki sirviv gran ladetres pou rezwir?
11 Apre ki gran ladetres ki pou fini par Armagedon, in retir mesanste lo later, Satan Dyab pou nepli ‘bondye sa syek.’ Bann adorater Zeova pou nepli bezwen lite kont move lenfliyans Satan. (2 Korentyen 4:4; Revelasyon 20:1, 2) Fo relizyon pou nepli la pou mal reprezant Zeova e pou diviz lasosyete imen. Bann serviter sa vre Bondye pou nepli eksperyans lenzistis ek eksplwatasyon dan lanmen bann lotorite imen. Vreman i pou en liberte merveye ki bann adorater Zeova pou rezwir!
12. Konman ki tou dimoun pou ganny libere avek pese ek son bann lefe?
12 Zezi Kri, konman “Lanyo Bondye ki efas pese lemonn,” pou aplik valer son sakrifis pour efas tou pese limanite. (Zan 1:29) Kan Zezi ti lo later e ti pardonn pese en dimoun, i ti geri sa enn ki’n ganny pardonnen konman en laprev. (Matye 9:1-7; 15:30, 31) Demenm, dan en fason mirakile, Kris Zezi, konman Lerwa Rwayonm Bondye, pou geri bann aveg, bann kozpa, bann sourd, bann ki paralize fizikman, bann ki trouble mantalman, e bann ki ganny lezot maladi. (Revelasyon 21:3, 4) Pour bann ki obeisan, “lalwa pese” pou ganny anile afen ki zot bann panse ek aksyon i ava fer zot plezir e osi Bondye. (Romen 7:21-23) Alafen sa Milener, zot pou’n atenn perfeksyon imen, dan ‘zimaz ek resanblans’ sa sel vre Bondye.—Zenez 1:26.
13. Alafen sa Renny Milener, ki aksyon ki Kris pou pran, e avek ki rezilta?
13 Kan Kris pou’n anmenn limanite ver perfeksyon, i pou apre rann son Papa lotorite ki i ti’n donn li pour fer sa travay: “I pou remet Rwayonm dan lanmen Bondye, son Papa, apre ki i’n detri tou lotorite, pouvwar spirityel ek tou pisans. Parski fodre ki Kris i rennyen ziska ki i’n met tou son lennmi anba son lipye.” (1 Korentyen 15:24, 25) Renny Milener sa Rwayonm pou’n antyerman akonpli son plan; alors pou nepli neseser pour en gouvernman siplemanter reste ant Zeova ek limanite. E vi ki pese ek lanmor pou’n konpletman ganny retire e limanite pou’n ganny libere, sa bezwen pour Zezi konman en Liberater pou terminen. Labib i eksplike: “Garson limenm, i a soumet son lekor avek sa enn ki’n soumet tou keksoz avek li, e alor Bondye i ava tou pour tou dimoun.”—1 Korentyen 15:28.
14. Ki tou imen parfe pou pas atraver, e akoz?
14 Swivan sa, imen parfe pou ganny sa loportinite pour demontre ki zot swazir pour servi sa sel vre Bondye pour touzour. Alors, avan ki Zeova i adopte zot konpletman konman son bann zanfan, i pou fer tou bann imen parfe pas atraver en tes final. Satan ek son bann demon pou ganny large dan labim. Sa pa pou afekte bann ki vreman kontan Zeova pour lontan. Me nenport ki ki les li ganny antrennen par enfidelite pour dezobei Zeova pou ganny detri pour touzour, ansanm avek sa rebel orizinal ek son bann demon.—Revelasyon 20:7-10.
15. Ki sitiasyon ki pou ankor enn fwa egziste parmi tou kreasyon entelizan Zeova?
15 Apre, Zeova pou adopte tou bann imen parfe ki’n siport son souvrennte pandan sa tes final konman son bann zanfan. E apartir sa letan, zot pou rezwir plennman sa liberte glorye bann zanfan Bondye konman manm son fanmiy iniversel. Tou kreasyon entelizan dan lesyel oubyen lo later pou ankor enn fwa ini pour ador li konman sa sel vre Bondye. Plan Zeova pou’n atenn en lakonplisman glorye! Eski ou ti a kontan form parti sa fanmiy ere, eternel e iniversel? Si wi, nou ankouraz ou pour pran aker sa ki Labib i dir dan 1 Zan 2:17: “Lemonn pou disparet ek tou son bann dezir; me sa ki fer lavolonte Bondye i reste eternelman.”
Revizyon
• Avan rebelyon an Edenn, ki relasyon ki tou bann adorater Zeova ti annan avek li?
• Ki responsabilite sa bann ki servi Bondye i annan?
• Lekel ki pou byento vin bann zanfan Bondye, e konman ki sa i relye avek plan Zeova konsernan ladorasyon ini?
[Portre lo paz 190]
Bann imen obeisan pou rezwir lavi dan en paradi lo later antye