Ki savedir tousala?

ZEZI KRI ti dir: ‘Lafen sa sistenm’ pou ganny marke par lager, lafanmin, lepidemi, ek tranbleman-d-ter.—Matye 24:1-8; Lik 21:10, 11.

Depi 1914, lager ant bann nasyon e ant bann group etnik in detrir lavi bokou dimoun. Souvan sa bann lager i akoz bann sef relizye i enterfer avek politik. Resaman, bokou dimoun dan lemonn pe perdi zot lavi akoz bann latak teroris.

Menm si lasyans in fer bokou progre, plizyer santenn milyon dimoun partou lo later napa manze. Sak lannen plizyer milyon dimoun i mor lafen.

Lepidemi i osi form parti sa siny ki Zezi ti donnen. Apre Premye Lager Mondyal, en lepidemi lafyev ti touy plis ki 21,000,000 dimoun. Bann maladi dan lepase ti afekte zis en rezyon, me li sa lafyev ti afekte bann pei dan lemonn antye ensi ki bann zil elwannyen. Ozordi, SIDA pe afekte bokou dimoun partou dan lemonn, e bann fleo parey tiberkiloz, malarya, lafyev denge ek maladi Chagas i persiste dan bann pei ki pe devlope.

Sak lannen plizyer dizenn milye tranbleman-d-ter avek diferan lentansite i ganny raporte. Kantmenm i annan lekipman ek bann pli bon metod pour detekte bann tranbleman-d-ter, souvan dan nouvel nou vwar dezas ki tranbleman-d-ter in fer dan bann landrwa kot dimoun i reste.

Labib ti osi predir: “Rapel sa byen: dan bann dernyen zour pou annan letan difisil. Parski zonm pou vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye, zot pou montre en laparans lapiete, me rezet son vre pisans. Pa asosye ou avek bann dimoun koumsa.”—2 Timote 3:1-5.

Eski ou pa dakor ki nou pe viv dan “letan difisil”?

Eski ou’n remarke ki mannyer dimoun i egois, kontan larzan, e arogan?

Lekel ki pa pou aksepte ki lemonn i ranpli avek dimoun ki mazin zis zot lekor e anmenmtan napa rekonesans, antete, e enfidel?

Eski ou konnen ki pa zis dan detrwa landrwa ki pli ale dimoun i annan leker dir e zanfan i dezobei paran, me partou dan lemonn?

San dout ou realize ki nou pe viv dan en lemonn kot dimoun i kontan zis anmize me pa kontan fer dibyen. Sa i fason ki Labib i dekrir latitid bann dimoun dan “dernyen zour.”

Eski ou bezwen plis laprev pour idantifye sa letan ki nou pe viv ladan? Zezi ti osi predir ki pandan sa menm letan, sa bon nouvel lo Rwayonm Bondye ti pou ganny anonse partou lo later. (Matye 24:14) Eski sa pe ganny fer?

Latour Veyer i en magazin ki baze lo Labib. Son bi se pour anons sa bon nouvel Rwayonm Zeova e i ganny enprimen tou le mwan dan plis langaz ki okenn lezot magazin.

Tou le zan, bann Temwen Zeova i dedye plis ki en bilyon er-d-tan pour pres avek lezot lo Rwayonm Bondye.

Temwen Zeova i pibliy bann liv ki eksplik Labib dan apepre 400 langaz, menm bann langaz ki ganny servi par bann pti group dimoun. Temwen Zeova in anmenn sa bon nouvel dan tou nasyon; zot in osi pres dan bokou pti zil ek teritwar. Dan laplipar pei, zot fer bann progranm ledikasyon lo Labib regilyerman.

Vreman, sa bon nouvel Rwayonm Bondye pe ganny anonse partou kot i annan dimoun. Sa travay pe ganny fer pour fer dimoun konn sa mesaz, me i pa pe ganny fer avek lentansyon pour konverti lemonn. Dimoun dan tou kwen lemonn pe ganny en loportinite pour montre si zot enterese avek sa enn ki’n kree lesyel ek later e si zot pou montre respe pour son lalwa ek lanmour pour zot prosen.—Lik 10:25-27; Revelasyon 4:11.

Tre byento, Rwayonm Bondye pou retir tou mesanste lo later e fer later vin en paradi.—Lik 23:43.

[Bwat lo paz 6]

Dernyen Zour pour ki sennla?

I pa dernyen zour pour limanite. Labib i ofer bann ki fer lavolonte Bondye lespwar pour viv pour touzour.—Zan 3:16, 36; 1 Zan 2:17.

I pa dernyen zour pour later. Parol Bondye i promet ki later pou reste la pour touzour.—Psonm 37:29; 104:5; Izai 45:18.

Okontrer, sa i bann dernyen zour sa sistenm ki nou pe viv ladan ki ranpli avek vyolans e ki napa lanmour. I osi bann dernyen zour pour tou dimoun ki kontinyen swiv sa sistenm.—Proverb 2:21, 22.

[Bwat/Portre lo paz 7]

Eski Labib i vreman Parol Bondye?

Plizyer fwa, bann profet dan Labib ti ekrir: “La sa ki Zeova in dir.” (Izai 43:14; Zeremi 2:2) Menm Zezi Kri, Garson Bondye, ti fer resorti ki bann parol ki i ti dir ‘pa vin de li menm.’ (Zan 14:10) Labib li menm i klerman dir: “Tou Lekritir i enspire par Bondye.”—2 Timote 3:16.

Napa en lot liv ki’n ganny pibliye dan plis langaz ki Labib. Dapre United Bible Societies, Labib in ganny pibliye dan 2,200 langaz. Napa lezot liv ki’n ganny distribye plis ki Labib. Anfet, plis ki kat bilyon kopi in ganny distribye. Eski pa sanmenm ki ou ekspekte avek en mesaz sorti kot Bondye pour tou limanite?

Pour en diskisyon detaye lo levidans ki Labib i enspire par Bondye, vwar liv The Bible—God’s Word or Man’s?, pibliye par Temwen Zeova.

Si ou lir Labib e ou rekonnet ki i vreman Parol Bondye, ou pou benefisye en kantite.

[Bwat/Portre lo paz 8]

Kisisa Rwayonm Bondye?

I sa gouvernman dan lesyel ki’n ganny met an plas par vre Bondye, Zeova, ki Kreater lesyel ek later. —Zeremi 10:10, 12.

Labib i dir ki Bondye in donn Zezi lotorite pour dirize. (Revelasyon 11:15) Ler i ti lo later, Zezi ti demontre ki Bondye ti’n donn li en gran lotorite. Son lotorite ti fer li annan kontrol lo bann lafors lanatir, geri tou kalite maladi, e menm lev bann mor. (Matye 9:2-8; Mark 4:37-41; Zan 11:11-44) Dapre profesi enspire dan Labib, Bondye pou osi donn li “dominasyon ek dinite ek rwayonm, pour ki bann pep, kominote nasyonal ek bann lalang, zot tou zot servi li.” (Danyel 7:13, 14) Sa gouvernman i ganny apele Rwayonm lesyel. Ozordi Zezi Kri pe dirize apartir lesyel.

[Portre lo paz 7]

Sa bon nouvel pe ganny anonse dan lemonn antye