Sa bon Nouvel ki zot anvi ou tande

LER Zezi ti lo later, son bann disip ti apros li e demann li: ‘Ki siny ki pou endik ou larive ek lafen sa sistenm?’ I ti reponn ki ti pou annan lager antre bann nasyon, lafanmin, maladi, tranbleman-d-ter, bokou mesanste, bann fo ansennyan relizye ki pou anbet bokou dimoun. I ti osi dir ki son bann disip ti pou eksperyans laenn ek persekisyon, e bokou dimoun ti pou aret kontan sa ki drwat. Ler sa bann keksoz ti pou konmans arive, i ti pou montre ki Kris i prezan dan en fason envizib e ki Rwayonm lesyel i pros. Sa ti pou en bon nouvel! Apre, Zezi ti dir en lot keksoz ki osi form parti sa siny: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:3-14.

Dan zot menm, sa bann keksoz ki pe arive i move, me selman zot montre ki Kris i prezan e sa i en bon keksoz. Sa bann kondisyon ki nou’n mansyonnen pli boner ti konmans vin evidan dan lannen 1914. I ti mark lafen Letan bann non Zwif e konmansman sa peryod tranzisyon sorti dominasyon zonm pour vin Renny Milener Kris.

Psonm 110 verse 1 ek 2, ek Revelasyon 12:7-12 i montre ki ti pou annan en moman tranzisyon. La i montre ki Kris ti pou asiz lo kote drwat Bondye dan lesyel ziska son letan pour vin Lerwa i arive. Apre sa, lager ti pou eklate dan lesyel e Satan ti pou ganny zete lo later. Sa ti pou anmenn maler pour later, e Kris ti pou diriz omilye son bann lennmi. Mesanste pou ganny retire pour touzour par mwayen en ‘gran ladetres’ ki pou fini par lager Armagedon swivi par sa mil an ki Kris pou dirize.—Matye 24:21, 33, 34; Revelasyon 16:14-16.

Me Labib i dir: “Rapel sa byen: dan bann dernyen zour pou annan letan difisil. Parski zonm pou vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye, zot pou montre en laparans lapiete, me rezet son vre pisans. Pa asosye ou avek bann dimoun koumsa.”—2 Timote 3:1-5.

Serten dimoun i kapab dir ki sa bann keksoz in arive avan dan listwar imen. Me an realite zot pa’n zanmen ariv ziska sa degre parey ozordi. Parey bann istoryen ek zournalis i dir, zanmen in deza annan en letan lo later parey sa enn ki nou’n eksperyanse depi 1914 an montan. (Vwar paz 7.) Zanmen bann maler in deza ariv lo sa nivo oparavan. Deplis, konsernan lezot laspe siny Kris lo bann dernyen zour, nou bezwen pa inyor sa bann fe: Prezans Kris ek Rwayonm pe ganny anonse dan lemonn antye lo en degre ki pa’n zanmen egziste dan listwar. Zanmen persekisyon pour pres sa bon nouvel in deza ariv lo sa nivo parey bann Temwen Zeova in sibir. Plizyer santenn zot ti ganny egzekite dan bann kan konsantrasyon Nazi. Menm ziska ozordi, Temwen Zeova i anba restriksyon dan serten pei, e dan lezot pei zot ganny arete, anprizonnen, tortire, e touye. Tousala i form parti sa siny ki Zezi ti donnen.

Parey Revelasyon 11:18 ti predir, ‘bann nasyon in vin ankoler’ kont bann Temwen fidel Zeova, e sa i endike ki Zeova pou montre ‘son lakoler’ kont sa bann nasyon. Sa menm verse i dir ki Bondye pou “detri bann ki detri later.” Zanmen oparavan i’n deza egziste en letan dan listwar imen kot kapasite later pour soutenir lavi in ganny menase. Me ozordi i diferan! Bokou syantis in averti ki si zonm i kontinyen polye later, personn pa pou kapab reste lo la. Me Zeova in “fer li pour dimoun reste lo la,” e i pou retir sa bann ki pe polye later avan ki zot detri later konpletman.—Izai 45:18.

BENEDIKSYON LO LATER ANBA RWAYONM

Sa lide ki dimoun i viv lo later konman sitwayen Rwayonm Bondye i kapab paret drol pour bokou dimoun ki krwar dan Labib e krwar tou bann ki ganny sove i al dan lesyel. Labib i montre ki zis en pti gin dimoun ki al dan lesyel e ki sa bann ki pou viv lo later pou en gran lafoul ki nou pa konn son kantite. (Psonm 37:11, 29; Revelasyon 7:9; 14:1-5) Dapre en profesi dan Danyel, en liv dan Labib, Rwayonm Bondye dan lanmen Kris pou diriz later.

Dan sa profesi, Rwayonm Kris i ganny reprezante konman en ros ki detase avek en montanny ki reprezant lotorite Zeova. I tap e detri en stati ki reprezant bann nasyon pwisan lo later. Apre sa, “sa ros ki tap sa stati . . . ti vin en gro montanny e ti ranpli later antye.” Sa profesi i kontinyen: “Dan bann zour sa bann lerwa, Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm, e li menm i pou dire pour en letan endefini.”—Danyel 2:34, 35, 44.

Bann Temwen Zeova i anvi koz avek ou lo sa Rwayonm ek sa lespwar lavi eternel lo en later prop e zoli. Plizyer milyon dimoun ki pe viv konmela e bokou milyon ki dan zot latonm ozordi pou ganny loportinite pour reste lo sa later pour touzour. Apre sa, ler Zezi Kri i diriz later pour mil an, plan orizinal Zeova pour kree later e met premye koup imen lo la pou akonpli. Lavi dan sa Paradi lo later pou toultan gou. Zis parey Adan ti ganny travay pour fer dan zarden Edenn, pareyman, limanite pou ganny bann proze enteresan pour okip later, bann plant ek zannimo lo la. Zot “pou apresye en kantite travay zot lanmen.”—Izai 65:22, Revised Standard Version; Zenez 2:15.

Bokou verse Labib i kapab ganny prezante pour montre sa kondisyon ki pou egziste ler lapriyer ki Zezi ti ansenny nou i ganny reponn: “Ki ou Renny i ganny etabli; ki ou lavolonte i ganny akonpli lo later parey dan lesyel.” (Matye 6:10) Me get sa enn pour lemoman: “Mon ti tann en lavwa for sorti kot tronn kriye: ‘La aprezan Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.’ Sa ki ti pe asiz lo tronn ti dir, ‘Lala mon refer tou keksoz a-nef.’ Apre i ti dir, ‘Ekri, sa bann parol i serten e i vre.’”—Revelasyon 21:3-5.

[Ekstre lo paz 15]

“Dan bann dernyen zour pou annan letan difisil,”

ME “apre sa, lafen pou arive”

[Portre lo paz 18]

Pei Ba

[Portre lo paz 18]

Nizerya