SAPIT 3

“Zot ti ranpli avek lespri sen”

Sa ki ti arive apre ki bann disip ti ganny lespri sen zour Lapannkot

1. Dekri sa ki pe arive zour Lafet Lapannkot.

I ANNAN en kantite dimoun dan bann semen dan lavil Zerizalenm.a Lafimen sorti lo lotel kot tanp pe monte anmezir ki bann Levit pe sant Alel, setadir Psonm 113 ziska 118. I kapab ki plizyer group pe sante sakenn son tour. I annan en kantite dimoun dan semen ki sorti dan lezot landrwa ki’n vin vizit Zerizalenm. Zot sorti dan bann landrwa byen lwen parey Elam, Mezopotami, Kapados, Pon, Lezip ek Ronm.b Akoz zot in vin Zerizalenm? Sa i akoz i Lafet Lapannkot, sa “zour ki zot selebre Lafet Rekolt bann premye fri.” (Nom. 28:26) Sa lafet i ganny fer tou le lannen ler rekolt lorz i fini e rekolt dible i konmanse. Sa zour bann dimoun i dan lazwa.

En map ki montre bann landrwa kot bann viziter ti sorti pour vin Zerizalenm ler zot ti tann sa bon nouvel pandan Lafet Lapannkot lannen 33. 1. Rezyon: Libi, Lezip, Etyopi, Bitini, Pon, Kapados, Zide, Mezopotami, Babilonn, Elam, Medi ek Parti. 2. Lavil: Ronm, Aleksandri, Menmfis, Antyos (Siri), Zerizalenm ek Babilonn. 3. Lanmer: Lanmer Mediterannen, Lanmer Nwanr, Lanmer Rouz, Lanmer Kaspyann ek Lanmer Golf

ZERIZALENM, SA LANDRWA ENPORTAN POUR LARELIZYON ZWIF

Laplipar bann levennman dan bann premye sapit liv Akt ti ariv dan Zerizalenm. Sa lavil i ganny trouve parmi bann montanny Zide, apepre 55 kilomet les avek Lanmer Mediterannen. Dan lannen 1070 avan Kris, Lerwa David ti pran sa landrwa proteksyon anler lo latet Montanny Siyon e sa lavil ki ti ganny konstrir otour li ti vin kapital ansyen nasyon Izrael.

Montanny Moriya i o bor Montanny Siyon. Dapre ansyen tradisyon Zwif, Abraam ti esey sakrifye Izaak lo Montanny Moriya apepre 1,900 an avan ki sa bann levennman ki’n ganny ekrir dan liv Akt i arive. Montanny Moriya ti form parti sa lavil ler Salomon ti konstri sa premye tanp pour Zeova anler lo sa montanny. Sa batiman ti vin sa landrwa enportan kot bann Zwif ti ale e ador Zeova.

Tou bann Zwif ki ti sorti partou lo later ti rasanble kot tanp Zeova pour fer sakrifis, pour ador Zeova e pour selebre bann lafet tou le-z-an. Zot ti fer sa pour obei lord Bondye ki dir: “Trwa fwa par lannen, tou ou bann zonm i devret al devan Zeova ou Bondye dan sa landrwa ki i swazir.” (Det. 16:16) Gran Sannedren, lakour siprenm Zwif ti Zerizalenm. Sa lakour ti annan lotorite lo bann dimoun, lo gouvernman e lo larelizyon.

2. Ki bann keksoz ekstraordiner ki’n arive zour Lapannkot lannen 33?

² Sa zour bomaten pandan sezon prentan lannen 33, apepre ne-v-er bomaten, en keksoz ekstraordiner i arive ki pou enpresyonn dimoun pour plizyer syek. En sel kou, i annan “en tapaz sorti dan lesyel parey tapaz en gro divan” oubyen “parey en gro tanpet divan.” (Akt 2:2; International Standard Version) Sa apepre 120 disip Zezi ki’n rasanble dan sa lakaz i tann sa gro tapaz. Apre, en lot keksoz ekstraordiner i arive. Zot vwar bann keksoz ki parey bann lalang dife ki pe apoz lo sak disip.c Bann disip i “ranpli avek lespri sen” e zot konmans koz diferan langaz! Apre, bann disip i sorti dan sa lakaz e zot konmans koz avek bann dimoun ki’n vin vizit Zerizalenm ki zot zwenn dan semen. Sa bann dimoun i etonnen akoz sa bann disip i kapab koz avek zot! Anfet, sak dimoun i tann bann disip “pe koz [son] langaz.”—Akt 2:1-6.

3. (a) Akoz sa ki ti arive zour Lapannkot lannen 33 i ganny konsidere konman en levennman enportan dan listwar vre ladorasyon? (b) Ki mannyer diskour Pyer ti relye avek bann “lakle Rwayonm”?

³ Sa ki ti’n arive i dekri en levennman enportan dan listwar vre ladorasyon e sa i sa zour ki Izrael spirityel ti ganny formen, setadir kongregasyon Kretyen swazir. (Gal. 6:16) Me i ti annan lezot keksoz ki ti arive. Ler Pyer ti koz avek bann disip ki ti’n rasanble sa zour, i ti servi sa premye lakle parmi sa trwa “lakle Rwayonm.” Sak sa bann lakle ti pou fer diferan group dimoun ganny en loportinite spesyal. (Mat. 16:18, 19) Sa premye lakle ti fer li posib pour bann Zwif ek bann dimoun ki ti’n konverti dan larelizyon Zwif aksepte sa bon nouvel e ganny swazir avek lespri sen Bondye.d Alor, zot ti pou form parti Izrael spirityel e zot ti pou annan sa lespwar pour al dirize konman bann lerwa ek pret dan sa Rwayonm ki Kris i dirize. (Rev. 5:9, 10) Pli tar, bann Samariten e apre bann dimoun lezot nasyon ti pou ganny sa menm loportinite zot osi. Ki bann Kretyen ozordi i kapab aprann avek sa bann levennman enportan ki ti arive zour Lapannkot lannen 33?

“Zot tou zot ti ansanm dan menm landrwa” (Akt 2:1-4)

4. Ki mannyer kongregasyon Kretyen ozordi i sa menm kongregasyon ki ti ganny formen lannen 33?

⁴ O konmansman i ti annan apepre 120 disip dan kongregasyon Kretyen e “zot tou zot ti ansanm dan menm landrwa,” dan en lasanm anler e zot ti ganny swazir avek lespri sen. (Akt 2:1) A lafen sa lazournen, i ti annan plizyer milye dimoun ki ti’n batize ki ti form parti sa kongregasyon. Sa logmantasyon in kontinyen ziska ozordi! Ozordi, bann zonm ek madanm ki annan en gran respe pour Bondye i form parti kongregasyon Kretyen. Bondye pe servi zot pour pres “sa bon nouvel Rwayonm” ki pe “ganny anonse partou lo later pour donn en temwannyaz avek tou nasyon” avan ki lafen sa move lemonn i arive.—Mat. 24:14.

5. Ki benediksyon bann dimoun ki ti zwenn kongregasyon Kretyen dan premye syek ti gannyen e ki benediksyon bann ki dan kongregasyon Kretyen ozordi i gannyen?

⁵ Kongregasyon Kretyen i osi sa landrwa kot bann Kretyen swazir e pli tar bann ki form parti “lezot mouton” i ganny led spirityel. (Zan 10:16) Ler Pol ti ekri en let pour bann Kretyen Ronm, i ti montre ki i ti apresye ki bann Kretyen dan kongregasyon ti pe ed kanmarad. I ti dir: “Mon vreman anvi vwar zot pour ed zot spirityelman pour ki zot reste ferm oubyen plito ki nou kapab ankouraz kanmarad par nou lafwa, zot par mon lafwa e mwan par zot lafwa.”—Rom. 1:11, 12.

RONM, KAPITAL EN LANPIR

Pandan sa peryod letan ki liv Akt i koz lo la, Ronm ti sa pli gran lavil e sa letan, i ti sa lavil pli enportan dan lemonn dan domenn politik. I ti kapital en lanpir. Sa letan ki Ronm ti annan plis pouvwar, i ti domin bann pei depi Langleter ziska Nor Lafrik e depi Losean Atlantik ziska Lanmer Pers.

Ronm ti en landrwa ki ti annan diferan kiltir, ras, langaz ek siperstisyon. I ti annan en kantite bon semen ki bann dimoun ek bann marsan ki ti sorti dan diferan landrwa dan sa lanpir ti kapab servi pour vin Ronm. Bann bato ti vin lo por Ostia ki ti lanmenm o bor pour zot desarz zot bann prodwi manze ek bann prodwi deliks ki ti pou ganny anmennen dan lavil Ronm.

Dan premye syek, plis ki en milyon dimoun ti reste Ronm. Petet lanmwatye sa popilasyon ti bann lesklav ki ti enkli bann kriminel ki ti’n ganny kondannen, bann zanfan ki ti’n ganny vann oubyen ki zot paran ti’n abandonn zot ek bann prizonnyen ki ti ganny atrape ler larme Romen ti fer bann kanpanny militer. Serten sa bann lesklav ki ti ganny anmennen Ronm ti bann Zwif ki sorti Zerizalenm, apre ki en zeneral Romen ki ti apel Pompey ti pran sa lavil dan lannen 63 avan Kris.

Laplipar dimoun ki pa ti bann lesklav, ti vreman pov e zot ti reste dan bann batiman ki ti annan plizyer letaz e ki ti annan en kantite dimoun. Sa bann dimoun ti depan lo bann led ki gouvernman ti donnen. Par kont, sa bann lanperer ti fer bann zoli batiman dan sa lavil e serten sa bann batiman ti bann pli zoli batiman ki ti’n deza ganny fer. Serten sa bann batiman ti ganny servi pour fer bann pyes teat, serten ti bann gran stad kot zot ti fer bann spektak, bann konpetisyon lager ek bann paryaz saret lager. Bann dimoun ki ti reste Ronm pa ti bezwen peye pour al vwar sa bann spektak.

6, 7. Ki mannyer kongregasyon Kretyen ozordi pe fer sa travay ki Zezi ti donnen pour pres sa bon nouvel avek tou nasyon?

⁶ Ozordi, kongregasyon Kretyen i annan menm lobzektif ki i ti annan dan premye syek. Zezi ti donn son bann disip en travay ki ti pou vreman gou pour fer menm si zot ti pou ganny bann problenm. I ti dir zot: “Al kot bann dimoun dan tou nasyon e fer zot vin mon disip, batiz zot o non Papa, o non Garson e o non lespri sen, ansenny zot pour obei tou sa ki mon’n donn zot lord pour fer.”—Mat. 28:19, 20.

⁷ Ozordi, Zeova pe servi kongregasyon Kretyen bann Temwen Zeova pour fer sa travay. I vre i kapab difisil pour pres avek bann dimoun ki koz en lot langaz. Me bann Temwen Zeova in fer bann piblikasyon ki baze lo Labib dan plis ki 1,000 langaz. Si ou pe vin bann renyon Temwen Zeova regilyerman e ou pe fer sa travay predikasyon e fer disip, ou annan rezon pour ou kontan. Ou form parti sa pti group dimoun lo later ki annan sa loportinite pour rann temwannyaz afon lo non Zeova!

8. Ki mannyer sak dimoun dan kongregasyon i ganny ede?

⁸ Zeova i fer bann frer ek ser dan lemonn antye ed nou pour nou kapab andire avek lazwa dan sa bann letan difisil. Pol ti dir bann Kretyen Ebre: “Annou demontre en lentere senser dan lezot pour ki nou kapab ankouraz kanmarad pour demontre lanmour e fer bann bon aksyon. Annou pa aret rasanble ansanm, parey serten i annan labitid, me annou ankouraz kanmarad plis ankor la ki zot vwar sa zour pe aprose.” (Ebr. 10:24, 25) Kongregasyon Kretyen i en kado ki Zeova in donn nou pour nou kapab ankouraz lezot e pour lezot ankouraz nou. Alor, reste pros avek ou bann frer ek ser dan kongregasyon. Pa zanmen aret vin renyon!

“Bann disip ti pe koz langaz sa bann dimoun” (Akt 2:5-13)

Bann disip Zezi pe pres avek bann Zwif ek bann konverti Zwif lo semen — “Nou tann zot pe koz dan nou langaz bann keksoz merveye ki Bondye in fer.”—Akt 2:11

9, 10. Ki serten dimoun in fer pour zot kapab pres avek bann dimoun ki koz en lot langaz?

⁹ Esey mazin sa lazwa ki bann Zwif ek bann dimoun ki ti’n konverti dan larelizyon Zwif ti santi zour Lapannkot lannen 33. I kapab ki laplipar dimoun ki ti la sa zour ti koz langaz Grek oubyen Ebre. Me la aprezan “bann disip ti pe koz langaz sa bann dimoun.” (Akt 2:6) Bann dimoun ti bezwen kontan pour tann sa bon nouvel dan zot langaz maternel. Ozordi Zeova pa fer mirak pour fer bann Kretyen koz dan bann langaz ki zot pa konnen. Me i annan en kantite Kretyen ki pare pour ede pour anons sa bon nouvel lo Rwayonm avek bann dimoun dan tou nasyon. Ki mannyer zot fer sa? Serten in aprann en nouvo langaz pour zot kapab al ede dan en kongregasyon ki koz sa langaz oubyen zot in menm al dan en lot pei. Souvan, bann dimoun ki ekout zot i vreman apresye ki zot pe fer zefor pour koz zot langaz.

¹⁰ I annan en ser ki apel Christine ki ti aprann langaz Gujarati ansanm avek set lezot Temwen Zeova. En fwa i ti zwenn enn son koleg travay ki ti koz Gujarati e i ti dir sa zenn madanm bonzour dan son langaz. Sa madanm ti enpresyonnen e i ti anvi konnen akoz Christine ti pe fer zefor pour aprann en langaz difisil parey Gujarati. Alor Christine ti kapab donn en bon temwannyaz. Sa zenn madanm ti dir Christine: “Ou bezwen annan en keksoz vreman enportan pour dir.”

11. Ki mannyer nou kapab prepar nou pour anons sa bon nouvel Rwayonm avek dimoun ki koz lezot langaz?

¹¹ I vre, pa nou tou ki kapab aprann en lot langaz. Me kantmenm sa, nou kapab prepar nou pour nou pres sa bon nouvel lo Rwayonm avek dimoun ki koz en lot langaz. Ki mannyer nou kapab fer sa? En fason ki nou kapab fer sa i ler nou servi sa app JW Language^® pour aprann dir bonzour dan en lot langaz. Ou osi kapab aprann detrwa fraz dan sa langaz pour evey lentere bann ki koz sa langaz. Ou kapab montre zot jw.org e petet montre zot bann diferan video ek piblikasyon dan zot langaz. Par servi sa bann zouti predikasyon, nou kapab ganny sa menm lazwa ki nou bann frer dan premye syek ti gannyen ler bann etranze ti vreman etonnen ler zot ti tann sa bon nouvel dan zot prop “langaz.”

BANN ZWIF DAN MEZOPOTAMI EK LEZIP

Liv The History of the Jewish People in the Age of Jesus Christ (175 B.C.–A.D. 135) i dir: “Bann desandans ki sorti dan rwayonm sa dis tribi Izrael e dan rwayonm Zida ti reste Mezopotami, Medi ek rezyon Babilonn apre ki bann Asiryen ek bann Babilonnyen ti’n anmenn zot laba.” Dapre Ezra 2:64, i ti annan zis 42,360 Izraelit ki ti retourn Zerizalenm sorti an egzil Babilonn. Sa ti ariv dan lannen 537 avan Kris. Flavius Josephus i dir ki dan premye syek, i ti annan plizyer dizenn milye Zwif ki “ti reste dan rezyon Babilonn.” Dan trwazyenm syek ziska senkyenm syek, sa bann dimoun ti ekri en liv ki apel Babylonian Talmud.

I annan bann dokiman ki montre ki bann Zwif ti reste Lezip depi sizyenm syek avan Kris. Pandan sa letan, Zeremi ti anvoy en mesaz pour bann Zwif ki ti pe reste dan plizyer landrwa Lezip enkli Menmfis. (Zer. 44:1, not) I paret ki i ti annan en kantite Zwif ti al reste Lezip pandan sa letan ki kiltir Grek ti popiler dan lezot nasyon. Josephus i dir ki bann Zwif ti parmi bann premye dimoun ki ti al reste dan lavil Aleksandri. Apre en pe letan, zot ti donn bann Zwif en bout dan sa lavil. Dan premye syek, en ekriven Zwif ki ti apel Philo ti dir ki i ti annan en milyon Zwif ki ti pe reste partou dan Lezip, depi “Libi ziska lafrontyer Etyopi.”

“Pyer . . . ti debout” (Akt 2:14-37)

12. (a) Ki profet Zoel ti dir konsernan sa mirak ki ti arive zour Lapannkot lannen 33? (b) Akoz zot ti ekspekte ki profesi Zoel ti pou ganny akonplir dan premye syek?

¹² “Pyer . . . ti debout” pour koz avek en lafoul dimoun ki sorti dan plizyer nasyon. (Akt 2:14) I ti eksplik tou dimoun ki ti pare pour ekoute ki Bondye ki ti’n fer sa mirak pour bann disip koz diferan langaz pour akonpli sa profesi ki profet Zoel ti dir. Profet Zoel ti dir: “Mon pou vers mon lespri sen lo tou sort kalite dimoun.” (Zoel 2:28) Avan ki Zezi ti mont dan lesyel, i ti dir son bann disip: “Mon pou demann mon Papa e i pou donn zot en lot led.” Zezi ti dir ki sa led i “lespri sen.”—Zan 14:16, 17.

13, 14. Ki mannyer Pyer ti fer zefor pour tous leker bann dimoun ki ti ekout li e ki mannyer nou kapab swiv son legzanp?

¹³ Ler Pyer ti pe fini fer son diskour, i ti koz dan en fason ferm e i ti dir sa lafoul dimoun: “Nasyon Izrael antye i bezwen konn byen ki Bondye in fer sa Zezi ki zot in touye lo poto vin Senyer ek Kris.” (Akt 2:36) Laplipar dimoun ki ti pe ekout Pyer pa ti la ler Zezi ti ganny touye lo poto. Me kantmenm sa, konman en nasyon, zot ti responsab pour touy Zezi. Remarke ki Pyer ti koz avek bann Zwif avek bokou respe e i ti esey tous zot leker. Pyer ti anvi ki sa bann dimoun ki ti pe ekout li i repantir me i pa ti pe akiz zot. Eski sa bann dimoun ti ankoler avek Pyer akoz sa ki i ti pe dir zot? Non. O kontrer, sa ki zot ti tande “ti desir zot leker.” Zot ti demande: “Ki nou devret fer?” Pyer ti reponn zot dan en fason zantiy e i kapab ki sa ti ed li pour tous leker en kantite dimoun e sa ti fer zot anvi repantir.—Akt 2:37.

¹⁴ Nou kapab swiv legzanp Pyer dan lafason ki i ti tous leker bann dimoun. Ler nou prese nou pa bezwen koriz sak pti keksoz ki en met lakour i dir zis akoz i pa parey sa ki Labib i dir. Plito, nou devret koz lo bann keksoz ki nou tou le de nou dakor lo la. Ler nou trouv en keksoz ki sa dimoun i krwar ladan e ki nou osi nou krwar ladan, nou kapab servi Labib pour rezonn avek sa dimoun avek respe. Souvan, ler nou koz lo laverite ki dan Labib dan sa fason, bann dimoun ki annan sa bon kondisyon leker pou pli pare pour aksepte sa mesaz.

LARELIZYON KRETYEN DAN DISTRIK PON

Bann Zwif ki ti sorti Pon, en distrik dan nor Lazi Miner, ti parmi sa bann ki ti tann sa diskour ki zapot Pyer ti fer zour Lapannkot lannen 33. (Akt 2:9) I evidan ki serten parmi zot ti al anons sa bon nouvel ler zot ti retourn kot zot, parski ler Pyer ti ekri son premye let pour bann Kretyen ki ti’n “disperse” dan plizyer landrwa, sa ti enkli Pon.g (1 Pyer 1:1) Sa ki i ti ekri ti montre ki sa bann Kretyen ti “sagrinen akoz bann diferan leprev” ki zot ti pe pas ladan akoz zot lafwa. (1 Pyer 1:6) Sa ti enkli lopozisyon ek persekisyon.

Dan let ki Pliny ki ti gouverner Romen dan Bitini ek Pon, ti ekri Lanperer Trajan, i ti koz lo lezot problenm ki bann Kretyen dan distrik Pon ti gannyen. Dan son let ki i ti ekri ler i ti Pon, apepre lannen 112, Pliny ti dir ki larelizyon Kretyen ti parey en “maladi” ki ti pe kontamin tou dimoun nenport ki laz ek ran ki zot ti annan. Pliny ti donn bann dimoun ki ti’n ganny akize konman Kretyen sa loportinite pour zot dir ki zot pa Kretyen e bann ki ti pa ti oule fer sa ti ganny touye. Tou dimoun ki ti modi Kris oubyen resit en lapriyer pour bann bondye oubyen avek stati Trajan ti ganny large. Pliny ti konnen ki “bann vre Kretyen pa ti pou zanmen fer sa bann keksoz.”

g Sa mo Grek “Diaspora” in ganny tradwir konman “disperse.” Sa mo i refer avek bann Zwif ki ti’n al reste dan lezot pei. Bokou parmi bann premye Kretyen ti bann Zwif.

“Zot tou batize” (Akt 2:38-47)

15. (a) Ki Pyer ti dir e ki bann dimoun ti fer? (b) Akoz sa plizyer milye dimoun ki ti’n tann sa bon nouvel zour Lapannkot ti kapab batize sa menm zour?

¹⁵ Sa zour Lapannkot lannen 33, Pyer ti dir bann Zwif ek bann dimoun ki ti’n konverti dan larelizyon Zwif ki ti pe ekout li: “Repantir, zot tou batize.” (Akt 2:38) Alor apepre 3,000 dimoun ti batize, petet dan bann basen ki ti dan lavil Zerizalenm oubyen ki ti o bor sa lavil.e Eski sa bann dimoun ti fer sa san reflesir? Eski sa resi i kapab ganny servi pour montre bann etidyan Labib ek bann zanfan ki zot paran i Kretyen, ki zot devret batize menm si zot pa pare? Non. Nou devret rapel ki sa bann Zwif ek sa bann dimoun ki ti’n konverti dan larelizyon Zwif ki ti batize zour Lapannkot lannen 33, ti bann dimoun ki ti kontan etidye Parol Bondye e zot ti form parti sa nasyon ki Zeova ti’n swazir. An plis ki sa, zot ti deza pe montre ki zot ti devoue anver Zeova e serten ti sorti byen lwen e zot ti vin Zerizalenm pour sa lafet ki ti ganny fer tou le lannen. Apre ki zot ti’n aksepte bann laverite enportan konsernan rol Zezi pour akonpli plan Bondye, zot ti pare pour zot kontinyen servi Bondye, me la aprezan konman bann disip Kris ki ti’n batize.

LEKEL SA BANN DIMOUN KI TI KONVERTI DAN LARELIZYON ZWIF?

“Bann Zwif e bann ki’n konverti dan larelizyon Zwif” ti tann sa diskour ki Pyer ti fer zour Lapannkot lannen 33.—Akt 2:10.

“En konverti sorti Antyos” ki ti apel Nikola ti enn sa bann zonm kalifye ki ti ganny swazir pour annan “sa responsabilite” pour distribye manze toulezour. (Akt 6:3-5) Bann dimoun ki ti’n konverti dan larelizyon Zwif, ti sorti dan lezot nasyon. Zot ti ganny konsidere konman bann Zwif vi ki zot ti aksepte Bondye ek Lalwa Izrael, zot ti rezet tou lezot bondye, zot ti ganny sirkonsi (si zot ti en msye oubyen en garson) e zot ti form parti nasyon Izrael.

Apre ki bann Zwif ti sorti an egzil Babilonn dan lannen 537 avan Kris, en kantite zot ti al reste lwen avek pei Izrael me zot ti kontinyen pratik larelizyon Zwif. Alor bann dimoun partou kot bann Zwif ti al reste ti konn larelizyon Zwif. Bann ekriven dan letan pase, parey Horace ek Seneca, i dir ki en kantite dimoun dan diferan pei ki ti enterese avek bann Zwif ek zot krwayans ti zwenn ansanm avek bann Zwif e zot ti konverti dan larelizyon Zwif.

16. Ki mannyer bann Kretyen dan premye syek ti met lentere lezot avan sa ki pour zot?

¹⁶ I ti kler ki Zeova ti beni sa group dimoun. Sa resi i dir: “Tou sa bann nouvo disip ti zwenn ansanm e zot ti partaz tou keksoz ansanm. Zot ti vann zot propriyete ek sa ki zot ti annan e distribye larzan avek tou dimoun dapre bezwen sakenn.”f (Akt 2:44, 45) Sirman, tou bann vre Kretyen i anvi swiv legzanp sa bann Kretyen ki ti demontre lanmour pour lezot e ki ti met lentere lezot avan sa ki pour zot.

17. Ki en dimoun i bezwen fer pour li kapab batize?

¹⁷ I annan plizyer keksoz ki Labib i dir ki en dimoun i bezwen fer pour li dedye son lavi avek Bondye e pour li batize. En dimoun i bezwen aprann konn Parol Bondye. (Zan 17:3) I bezwen demontre ki i annan lafwa e i bezwen repantir pour bann move keksoz ki i’n fer dan lepase, savedir i bezwen vreman regrete pour sa ki i’n fer. (Akt 3:19) I bezwen aret fer bann move keksoz, sanz son lavi e fer bann keksoz dapre lavolonte Bondye. (Rom. 12:2; Efe. 4:23, 24) Ler i fini fer sa, i dedye son lavi avek Bondye dan lapriyer e apre i batize.—Mat. 16:24; 1 Pyer 3:21.

18. Ki loportinite bann disip Zezi ki’n batize i gannyen?

¹⁸ Eski ou en disip Zezi ki’n dedye ou lavi avek Bondye e ki’n batize? Si wi, ou devret rekonesan pour sa loportinite ki ou’n gannyen. Parey bann disip dan premye syek ki ti ganny lespri sen, Zeova i kapab servi ou pour rann temwannyaz afon e pour fer son lavolonte!

a Vwar sa bwat “Zerizalenm, sa landrwa enportan pour larelizyon Zwif.”

b Vwar sa bann bwat “Ronm, kapital en lanpir,” “Bann Zwif dan Mezopotami ek Lezip,” ek “Larelizyon Kretyen dan distrik Pon.”

c Sa bann “lalang dife” pa ti vre dife me zot ti “resanble . . . dife.” Sa i vedir ki sa ki zot ti vwar lo latet sak disip ti parey dife e i ti klate parey dife.

d Vwar sa bwat “Lekel sa bann dimoun ki ti konverti dan larelizyon Zwif?”

e Dan en lasanble enternasyonal Temwen Zeova ki ti ganny fer Kiev, Likrenn le 7 Out 1993, i ti annan 7,402 dimoun ki ti batize dan sis basen. I ti pran de-z-erdtan kenz minit pour batiz tou sa bann dimoun.

f Sa laranzman ti tanporer e sa ti ed sa bann dimoun ki ti’n deside pour reste en pe plis letan Zerizalenm pour zot kontinyen aprann plis keksoz lo sa bon nouvel. Bann frer ek ser pa ti ganny forse pour partaz zot bann keksoz, zot ti fer sa volonterman. Sa pa ti parey sa ki bann gouvernman kominis i fer.—Akt 5:1-4.