Bondye i fer en lalyans avek Abraam

APEPRE 350 an ti’n pase depi ki Deliz dan letan Noe ti’n arive. Patrias Abraam ti pe reste dan en lavil prospere Our ki ozordi i sitye dan sa pei ki apel Irak. Abraam ti en zonm ki ti annan en lafwa vreman remarkab. Me aprezan son lafwa ti pou ganny teste.

Zeova ti demann Abraam pour kit son lavil natal, al Kanaan ki ti en lot pei. San okenn ezitasyon Abraam ti obeir. I ti anmenn tou bann ki ti pe reste ansanm avek li, enkli son madanm Sara ek son neve Lot. Apre sa gran vwayaz, i ti reste dan latant Kanaan. Dan en lalyans ki I ti fer avek Abraam, Zeova ti promet ki I ti pou fer son desandans vin en gran nasyon e ki tou bann fanmir lo later ti pou ganny beni atraver li e osi ki son desandans ti pou ganny pei Kanaan.

Abraam ek Lot ti prospere, zot ti annan en kantite troupo mouton ek bef. San mazin son prop lekor avan, Abraam ti les Lot swazir sa landrwa ki i ti pou kontan. Lot ti swazir en distrik fertil kot Larivyer Zourden e reste pros avek lavil Sodonm. Parkont bann zonm Sodonm ti imoral, zot ti pe fer bann pese vreman grav devan Zeova.

Plitar, Zeova ti reasir Abraam ki son desandans ti pou vin bokou parey bann zetwal dan lesyel. Abraam ti annan lafwa dan sa promes. Pourtan, Sara, son madanm ki i ti kontan en kantite pa ti ankor ganny en zanfan. Me kan i ti annan 99 an e Sara ti pros 90 an, Bondye ti dir Abraam ki zot de Sara zot ti pou ganny en garson. Parol Bondye ti vin vre, Sara ti donn nesans Izaak. Abraam ti osi annan lezot zanfan, me i atraver Izaak ki sa Sover ki ti’n ganny promet dan zarden Edenn, ti pou vini.

Antretan, Lot ek son fanmir ti pe reste Sodonm, me Lot sa zonm drwat pa ti vin parey bann zabitan imoral sa lavil. Kan Zeova ti deside pour egzekit zizman lo Sodonm, i ti anvoy bann lanz avan pour averti Lot konsernan sa destriksyon ki ti pe vini byento. Sa bann lanz ti persyad Lot ek son fanmir pour sove dan sa lavil e pa vir deryer. Apre sa, Bondye ti fer tonbe dife ek souf lo Sodonm, osi byen ki lo en move lavil pros ki ti apel Gomor e detrir tou zot bann zabitan. Lot ek son de fiy ti sove. Me son madanm ti vir deryer, petet avek regre pour bann keksoz ki i ti’n kite. Akoz son dezobeisans, i ti mor.

—Baze lo Zenez 11:10–19:38.