Bondye i delivre bann Izraelit

POUR plizyer lannen, bann Izraelit ti reste Lezip kot zot ti pe prospere e miltipliye. Parkont en nouvo Faraon ti konmans dirize. Sa dirizan pa ti konn Zozef. Sa diktater visye ki ti per bann Izraelit akoz lakantite zot ki ti annan ti fer zot vin lesklav e donn lord pour ki tou bann garson ki fek ne i ganny noye dan Larivyer Nil. Me en manman byen brav ti protez son pti garson, i ti kasyet li dan en pannyen parmi bann gran zerb ver kot larivyer. Fiy Faraon ti vwar sa pti baba, i ti apel li Moiz e i ti sonny li parmi lafanmir rwayal bann Ezipsyen.

Kan Moiz ti annan 40 an, i ti tonm dan problenm apre ki i ti’n defann en lesklav Izraelit ki ti pe ganny bate avek en formenn Ezipsyen. Moiz ti sove e al viv dan en pei byen lwen kot i ti al reste konman en egzile. Kan Moiz ti annan 80-z-an, Zeova ti fer li retourn Lezip pour al devan Faraon e demann li pour larg Son pep.

Faraon ti seryezman refize. Alor Bondye ti anvoy dis fleo lo Lezip. Sak fwa ki Moiz ti debout devan Faraon pour donn li sa loportinite pour evit sa lot fleo ki ti pou vini, byen arogan, Faraon ti refize aksepte demann Moiz ek son Bondye, Zeova. Finalman, dizyenm fleo ti touy tou bann premye ne dan sa pei eksepte bann premye ne parmi bann fanmir ki ti’n obeir lord Zeova pour pas disan en pti mouton ki ti’n ganny sakrifye, lo lankadreman zot laport. En lanz ki ti vin touy tou bann premye ne ti pas parlao sa bann lakour. Apre sa, bann Izraelit ti komemor sa delivrans merveye ki zot ti selebre tou le lannen e ki zot ti apel Lapak.

Apre ki son prop garson premye ne ti’n mor, Faraon ti ordonn Moiz ek tou bann Izraelit pour kit Lezip. Imedyatman, en gran lafoul dimoun ti kit Lezip. Me Faraon ti sanz son lide. I ti swiv zot ansanm avek plizyer solda ek saret lager. I ti paret ki bann Izraelit ti’n pri o bor lakot Lanmer Rouz. Zeova ti separ Lanmer Rouz an de e sa ti permet bann Izraelit pour travers lanmer lo later sek ant de miray delo! Kan bann Ezipsyen ti vini byen vit par deryer zot, Bondye ti ferm lanmer e Faraon ek son larme ti ganny kouver avek sa ta delo, zot tou zot ti noye.

Pli tar, anmezir ki bann Izraelit ti kanpe o bor Montanny Sinai, Zeova ti fer en lalyans avek zot. Bondye ti servi Moiz konman en medyater. I ti donn bann Izraelit bann lalwa ki ti pou gid zot e protez zot dan preski tou laspe lavi. Tan ki bann Izraelit ti aksepte dominasyon Bondye, Zeova ti pou avek zot e i ti pou fer sa nasyon vin en benediksyon pour lezot.

Parkont, laplipar Izraelit ti ofans Bondye akoz zot ti napa ase lafwa dan Li. Alor Zeova ti fer sa zenerasyon pas 40 an dan dezer. Apre sa, Moiz ti demann Zozye, en zonm drwat pour siksed li. Finalman, bann Izraelit ti’n pare pour antre dan sa pei ki Bondye ti’n promet Abraam.

—Baze lo Egzod; Levitik; Nonm; Deterononm; Psonm 136:10-15; Akt 7:17-36.