LESON 6

Ki lespwar i annan pour bann dimoun mor?

1. Ki bon nouvel i annan lo bann dimoun mor?

Lazar ki’n resisite i ganny akeyir par son ser Mart ek Mari

Ler Zezi ti ariv Betani, o bor Zerizalenm, son zanmi Lazar ti’n mor pour kat zour. Zezi ti al kot son tonbo avek Mart ek Mari, ser sa defen. Deswit apre, en kantite dimoun ti vin laba. Eski ou kapab imazin lazwa Mart ek Mari ler Zezi ti redonn lavi Lazar?—Lir Zan 11:21-24, 38-44.

Mart ti deza konn sa bon nouvel lo bann dimoun mor. I ti konnen ki Zeova ti pou resisit bann mor pour ki zot viv ankor lo later.—Lir Zob 14:14, 15, NWT.

2. Ki arive ler nou mor?

Kreasyon Adan e pli tar son lanmor — Bondye ti dir Adan: “Ou’n ganny tire dan lapousyer, ou pou retourn dan lapousyer.”—ZENEZ 3:19.

Bann imen in ganny fer avek lapousyer. (Zenez 2:7; 3:19) Nou pa bann lespri ki pe viv dan lekor imen. Nou annan en lekor fizik e ler nou mor, napa nanryen dan nou ki kontinyen viv. Ler nou mor, nou laservel i mor osi e nou bann panse i fini lanmenm. Sanmenm Lazar pa ti dir nanryen lo sa ki ti arive ler i ti mor akoz bann mor pa konsyan nanryen.—Lir Psonm 146:4; Eklezyast 9:5, 6, 10.

Eski Bondye i fer bann dimoun soufer dan dife apre lanmor? Vi ki Labib i montre ki bann dimoun mor pa konsyan nanryen, lanfer dife i en mansonz ki sali repitasyon Bondye. Zeova pa’n zanmen mazin pour tourmant dimoun dan dife.—Lir Zeremi 7:31.

Get sa video Kote bann mor i ete?

3. Eski bann dimoun mor i kapab koz avek nou?

Bann dimoun mor pa kapab ni koze, ni tande. (Psonm 115:17) Me i annan bann move lanz ki egziste e zot zot kapab koz avek bann dimoun e fer krwar ki se zot sa dimoun ki’n mor. (2 Pyer 2:4) Zeova i demann nou pour pa esey kominik avek dimoun mor.—Lir Deterononm 18:10, 11.

4. Lekel ki pou resisite?

En zonm ki’n ganny resisite dan Paradi i aprann konsernan Bondye. Apre sa zonm i donn lanmen ansenny lezot dimoun ki ganny resisite.

Plizyer milyon dimoun ki’n mor pou ganny resisite lo later. Menm serten ki pa ti konn Bondye e ki ti fer sa ki mal pou ganny resisite.—Lir Lik 23:43; Akt 24:15.

Bann ki pou resisite pou kapab aprann laverite lo Bondye e demontre lafwa dan Zezi par obei li. (Revelasyon 20:11-13) Bann ki resisite e fer sa ki byen pou kapab viv pour touzour lo later.—Lir Zan 5:28, 29.

5. Ki rezireksyon i fer nou konnen lo Zeova?

I annan en lespwar pour bann dimoun mor akoz Bondye in anvoy son Garson pour mor pour nou. Alor, lespwar rezireksyon i montre nou ki Zeova i kontan nou e i demontre labonte ekstraordiner anver nou. Ler bann dimoun mor pou resisite, lekel ki ou ti pou byen kontan revwar?—Lir Zan 3:16; Romen 6:23.

Pour plis lenformasyon, vwar sapit 6, 7 ek 10 dan liv Ki Labib i dir?