Zezi i anvoy 70 disip prese

I ver lafen lannen 32, apepre trwa-z-an depi ki Zezi in batize. Pa tro lontan pase, Zezi ek son bann disip ti asiste Lafet bann Latant, Zerizalenm. I tre probab ki zot ankor dan zanmirant. (Lik 10:38; Zan 11:1) Anfet, Zezi pou pas laplipar sa sis mwan ki reste li dan son minister, dan rezyon Zide oubyen lot kote Larivyer Zourden dan distrik Pere. Bann dimoun dan sa bann landrwa osi i bezwen tann son mesaz.

Avan sa, apre Lapak lannen 30, Zezi ti pran detrwa mwan pour pres Zide e travers Samari. Apre, ver Lapak lannen 31, bann Zwif Zerizalenm ti esey touy li. Pandan sa enn an edmi ki ti swiv, Zezi ti plizoumwen ansenny dan nor, dan rezyon Galile. Pandan sa letan, en kantite dimoun ti vin son disip. Galile, Zezi ti form bann zapot e apre anvoy zot avek sa lenstriksyon: “Prese e dir: ‘Rwayonm lesyel in aprose.’” (Matye 10:5-7) Aprezan, i organiz en kanpanny predikasyon Zide.

Pour konmans sa kanpanny predikasyon, Zezi i swazir 70 disip e i anvoy zot de par de. Alor, i annan 35 per proklanmater Rwayonm ki ganny anvoye dan teritwar, kot “rekolt i gran, me i annan en ptigin travayer.” (Lik 10:2) Zot sipoze al dan bann landrwa kot Zezi pou pase pli tar. Sa 70 disip i bezwen geri bann malad e anons sa menm mesaz ki Zezi pe proklanmen.

Zezi pa demann zot pour al ansennyen dan bann sinagog, me plito pour al kot lakour bann dimoun. I donn zot sa lenstriksyon: “Ler zot ariv kot en lakaz, premyerman dir: ‘Ki lape i avek zot.’ Si i annan en dimoun ki kontan lape laba, ki zot lape i reste avek li.” Ki mesaz zot sipoze anonse? Zezi i dir: “Dir zot: ‘Rwayonm Bondye in aprose.’”​—Lik 10:5-9.

Bann lenstriksyon ki Zezi i donn sa 70 disip i en pe parey sa ki i ti donn son 12 zapot ler i ti anvoy zot prese apepre enn an pase. I averti zot ki pa tou dimoun ki pou byen resevwar zot. Me sa ki zot pe fer pou ede pour prepar bann ki annan en bon leker. Ler Zezi i arive pa tro bokou letan apre, i pou annan en kantite dimoun ki pou enpasyan pour rankontre li e aprann avek li.

Pa bokou letan apre, sa 35 per proklanmater Rwayonm i retourn kot Zezi. Zot dan lazwa e zot dir: “Senyer, menm bann demon in soumet avek nou ler nou’n servi ou non.” Zezi i vreman kontan ler i tann sa bon rapor parski i dir: “Mon vwar Satan pe tonbe parey zekler sorti dan lesyel. Gete! Mon’n donn zot lotorite pour kraz serpan ek skorpyon anba zot lipye.”​—Lik 10:17-19.

La Zezi pe asir son bann disip ki zot pou kapab ranport laviktwar lo bann keksoz ki kapab fer ditor, dan en sans senbolik, zot pou kapab kraz bann serpan ek skorpyon. Deplis, bann disip i kapab asire ki a lavenir Satan pou ganny pouse dan lesyel. Zezi i osi ed sa 70 disip pour konpran kwa ki vreman enportan a lafen dizour. I dir: “Pa bezwen rezouir akoz bann demon in soumet avek zot, plito, rezouir akoz zot non in ganny ekrir dan lesyel.”​—Lik 10:20.

Zezi i dan lazwa e i loue son Papa an piblik akoz I’n servi bann senp serviter dan en fason sitan pwisan. I vire e dir son bann disip: “Ere bann dimoun ki vwar sa bann keksoz ki zot pe vwar. Parski mon dir zot, en kantite profet ek lerwa ti anvi vwar sa bann keksoz ki zot pe vwar me zot pa ti vwar e zot ti anvi tann sa ki zot pe tande me zot pa ti tann sa bann keksoz.”​—Lik 10:23, 24.