Kestyon lekter

Kote sa 70 disip ki Zezi ti’n anvoy prese pli boner ti ete ler Zezi ti entrodwi Repa Senyer? Eski zot ti’n abandonn Zezi?

Nou napa okenn rezon pour krwar ki zis akoz sa 70 disip pa ti la ler Zezi ti entrodwi Repa Senyer, ki Zezi pa ti aksepte zot oubyen ki sa 70 disip ti’n abandonn Zezi. Zezi ti zis anvi pas sa moman avek son bann zapot.

Tou le de group, setadir sa 12 ek sa 70 ti bann disip Zezi. Zezi ti swazir sa 12 zonm ki ti pou vin son bann zapot parmi son bann disip. (Lik 6:12-16) Zezi ti Galile ler i “ti apel son 12 zapot” e “anvoy zot pour pres lo Rwayonm Bondye e pour geri bann dimoun.” (Lik 9:1-6) Pli tar, ler Zezi ti Zide, i ti “swazir 70 lezot disip e anvoy zot de par de.” (Lik 9:51; 10:1) Sa ti fer ki Zezi ti annan disip dan diferan landrwa, setadir dan bann landrwa kot sa bann disip ti anons sa bon nouvel konsernan li.

I tre probab ki bann Zwif ki ti vin disip Zezi ti selebre Lapak tou le lannen avek zot fanmir. (Egz. 12:6-11, 17-20) Pa bokou letan avan ki Zezi ti mor, Zezi ti al Zerizalenm ansanm avek son bann zapot. Me i pa ti demann tou son bann disip, setadir bann ki ti sorti Zide, Galile ek Pere, pour vin selebre Lapak ansanm avek li. Alor, i kler ki Zezi ti anvi pas sa moman zis avek son bann zapot. I ti dir zot: “Mon’n telman anvi manz sa repa Lapak avek zot avan mon soufer.”—Lik 22:15.

I annan en bon rezon akoz Zezi ti fer sa. Zezi ti sa “Pti Mouton Bondye ki tir pese lemonn” e i ti pe al mor byento. (Zan 1:29) I ti pou ganny touye Zerizalenm, sa landrwa kot bann sakrifis pour Bondye ti ganny ofer. Sa mouton Lapak ki bann Izraelit ti manze, ti fer zot rapel ki Zeova ti’n liber zot Lezip. Me sakrifis Zezi ti pou fer plis ki sa. Sakrifis Zezi ti pou liber bann imen avek pese ek lanmor. (1 Kor. 5:7, 8) Sa ki Zezi ti fer, ti fer li posib pour sa douz zapot form parti fondasyon kongregasyon Kretyen. (Efe. 2:20-22) I enteresan pour note ki lavil sen, Zerizalenm, i annan “12 ros dan fondasyon” e lo sa bann ros i annan “non sa 12 zapot sa Pti Mouton.” (Rev. 21:10-14) I kler ki bann zapot fidel ti pou annan en rol enportan dan lakonplisman plan Bondye. Alor nou kapab konpran akoz Zezi ti anvi ki zot avek li pour sa dernyen Lapak e pour sa ki ti pou arive deswit apre, setadir Repa Senyer.

Sa 70 disip e bann lezot disip pa ti la pour sa repa. Me tou bann ki ti reste fidel ti pou ganny bann byenfe atraver Repa Senyer. Tou bann ki ti ganny swazir par lespri sen pli tar, ti pou form parti sa lalyans pour en rwayonm, ki Zezi ti koz lo la sa zour swar avek son bann zapot.—Lik 22:29, 30