En tanp pour Zeova

Apre ki Salomon ti’n vin lerwa Izrael, Zeova ti demann li: ‘Ki ou ti a kontan mon donn ou?’ Salomon ti dir: ‘Mon zenn e mon pa konnen ki mon pe fer. Silvouple donn mwan lasazes pour pran swen avek ou pep.’ Zeova ti dir: ‘Vi ki ou’n demann mwan lasazes, mon pou fer ou vin sa dimoun pli malen lo later. Mon pou osi fer ou byen ris. Si ou obeir mwan, ou pou viv lontan.’

Salomon ti konmans konstri tanp. I ti servi sa pli bon kalite lor, larzan, dibwa ek ros. Plizyer milye zonm ek fanm kalifye ti travay lo tanp. Apre set an, tanp ti’n pare pour ganny dedye avek Zeova. Dan sa tanp, i ti annan en lotel kot zot ti fer bann sakrifis zannimo. Salomon ti azenou devan lotel e i ti priye: ‘O Zeova, sa tanp pa ase gran oubyen ase zoli pour ou, me silvouple, aksepte nou ladorasyon ek nou lapriyer.’ Ki Zeova ti panse lo tanp e lo lapriyer Salomon? Dek ki Salomon ti fini fer son lapriyer, dife ti sorti dan lesyel e bril bann sakrifis lo lotel. Sa ti montre ki Zeova ti kontan sa tanp. Ler bann Izraelit ti vwar sa, zot ti kontan.

Tou dimoun Izrael e menm dimoun dan lezot pei vreman lwen ti konn Lerwa Salomon akoz i ti byen malen. Dimoun ti vin rod konsey pour zot bann problenm. Menm larenn Seba ti vin get li e demann li bann kestyon difisil. Ler i ti tann son larepons, i ti dir: ‘Mon pa ti oule krwar sa ki dimoun ti dir mwan lo ou, me la mon vwar ki ou pli malen ki sa ki zot ti pe dir. Ou Bondye Zeova in beni ou.’ Lavi ti gou pour bann Izraelit e zot ti ere. Me keksoz ti pe al sanze.